ហ្សាកាតា៖ ប្រទេសឥណ្ឌូនេស៊ី កំពុងរៀបចំផែនការបង្កើតកម្មវិធីអភិវឌ្ឍន៍ថាមពលពន្លឺព្រះអាទិត្យដ៏ធំបំផុតមួយនៅលើពិភពលោក ដោយកំណត់គោលដៅផលិតថាមពលឱ្យបានរហូតដល់ ១០០ ហ្គីហ្គាវ៉ាត់ (GW) ជាមួយទុនវិនិយោគប៉ាន់ស្មានប្រមាណ ៧១,៣ ប៊ីលីយែនដុល្លារអាមេរិក។ នេះជាជំហានដ៏ធំមួយក្នុងគោលបំណងពន្លឿនការផ្លាស់ប្តូរថាមពល និងកាត់បន្ថយការពឹងផ្អែកលើឥន្ធនៈហ្វូស៊ីល។

ក្រសួងថាមពល និងធនធានរ៉ែឥណ្ឌូនេស៊ី (ESDM) បានឱ្យដឹងថា ខ្លួនបានសហការជាមួយក្រសួងកិច្ចការកសិកម្ម និងរៀបចំដែនដី ដើម្បីរៀបចំដីធ្លីទំហំប្រមាណ ២៤.០០០ ហិកតា នៅលើកោះជ្វា (Java Island) សម្រាប់បម្រើឱ្យគម្រោងថាមពលពន្លឺព្រះអាទិត្យខ្នាតធំនេះ។

លោក Yuliot Tanjung អនុរដ្ឋមន្ត្រីក្រសួងថាមពល និងធនធានរ៉ែ បានបញ្ជាក់ថា អាជ្ញាធរបានបញ្ចប់ការវាយតម្លៃដីធ្លីរួចរាល់ហើយ និងបានរកឃើញតំបន់ដែលមានផ្ទៃដីគ្រប់គ្រាន់សម្រាប់កម្មវិធីអភិវឌ្ឍន៍នេះ។ នៅក្នុងដំណាក់កាលដំបូង រដ្ឋាភិបាលនឹងផ្តល់អាទិភាពលើគម្រោងដែលមានសមត្ថភាពផលិតថាមពលសរុបប្រហែល ១៧ ហ្គីហ្គាវ៉ាត់ (GW)។

ទន្ទឹមនឹងនេះ ឥណ្ឌូនេស៊ីក៏មានផែនការអភិវឌ្ឍប្រព័ន្ធផ្ទុកថាមពលថ្ម (Battery Energy Storage Systems - BESS) ដែលមានសមត្ថភាពសរុបប្រហែល ៣៣ ហ្គីហ្គាវ៉ាត់ (GW) ផងដែរ ដើម្បីធានាបាននូវស្ថិរភាពបណ្តាញអគ្គិសនី ខណៈពេលដែលចំណែកនៃថាមពលកកើតឡើងវិញនៅក្នុងប្រព័ន្ធផ្គត់ផ្គង់ថាមពលជាតិបន្តកើនឡើង។

គម្រោងមហិច្ឆតានេះ គឺជាផ្នែកមួយនៃយុទ្ធសាស្ត្រផ្លាស់ប្តូរថាមពលដ៏ទូលំទូលាយរបស់ឥណ្ឌូនេស៊ី បន្ទាប់ពីប្រធានាធិបតីលោក Prabowo Subianto បានកំណត់គោលដៅអភិវឌ្ឍន៍ថាមពលពន្លឺព្រះអាទិត្យឱ្យបាន ១០០ ហ្គីហ្គាវ៉ាត់ ចន្លោះឆ្នាំ២០២៦ ដល់ឆ្នាំ២០២៨។

ក្រុមអ្នកសង្កេតការណ៍បានលើកឡើងថា គោលដៅនេះគឺពិតជាមានមហិច្ឆតាខ្ពស់ខ្លាំងណាស់ ដោយសារតែបច្ចុប្បន្ន សមត្ថភាពផលិតថាមពលពន្លឺព្រះអាទិត្យដែលបានដំឡើងរួចរាល់របស់ឥណ្ឌូនេស៊ីមានត្រឹមតែប្រហែល ១,៥ ហ្គីហ្គាវ៉ាត់ (GW) ប៉ុណ្ណោះ។ ប្រសិនបើសម្រេចបានជោគជ័យ កម្មវិធីនេះនឹងជួយបង្កើនសមត្ថភាពថាមពលពន្លឺព្រះអាទិត្យរបស់ប្រទេសនេះ រហូតដល់ទៅជាង ៦៦ ដង ក្នុងរយៈពេលត្រឹមតែប៉ុន្មានឆ្នាំប៉ុណ្ណោះ។

ឥណ្ឌូនេស៊ី ដែលជាប្រទេសមានសេដ្ឋកិច្ចធំបំផុតក្នុងតំបន់អាស៊ីអាគ្នេយ៍ ក៏ជាប្រទេសមួយក្នុងចំណោមប្រទេសដែលបញ្ចេញឧស្ម័នផ្ទះកញ្ចក់ដ៏សំខាន់នៅលើពិភពលោកផងដែរ ដោយសារតែការពឹងផ្អែកយ៉ាងខ្លាំងលើការបង្កើតថាមពលអគ្គិសនីដើរដោយធ្យូងថ្ម។ ដូច្នេះ ការពង្រីកថាមពលកកើតឡើងវិញត្រូវបានមើលឃើញថាជាជំហានដ៏សំខាន់មួយក្នុងការសម្រេចបាននូវការប្តេជ្ញាចិត្តកាត់បន្ថយការបំភាយឧស្ម័ន និងឈានទៅសម្រេចបាននូវការបំភាយឧស្ម័នកម្រិតសូន្យ (net-zero emissions) ក្នុងរយៈពេលប៉ុន្មានទសវត្សរ៍ខាងមុខ។

ជាមួយនឹងសមត្ថភាពគ្រោងទុក ១០០ ហ្គីហ្គាវ៉ាត់ គម្រោងនេះត្រូវបានរំពឹងថាមិនត្រឹមតែជួយពង្រឹងសន្តិសុខថាមពលរបស់ឥណ្ឌូនេស៊ីប៉ុណ្ណោះទេ ប៉ុន្តែថែមទាំងជួយរុញច្រានប្រទេសនេះឱ្យក្លាយជាមជ្ឈមណ្ឌលថាមពលពន្លឺព្រះអាទិត្យឈានមុខគេមួយ នៅក្នុងតំបន់អាស៊ីប៉ាស៊ីហ្វិកទៀតផង៕