នៅពីក្រោយ ចំណងស្នេហ៍រឹងមាំ៣៥ឆ្នាំ របស់ ហែម សុវណ្ណ និង គ្រូ បា

2015-06-08 21:43:19
ចំនួនមតិ 0 | ចំនួនចែករំលែក 0

ចន្លោះមិនឃើញ

“ប្ដីគេដកចិត្តពីយើងមិនរួច ដោយសារអី? ដោយសារយើងជាអតីតមេម៉ាយមែន ប៉ុន្តែយើងចេះគោរពប្ដីរឹងមាំណាស់"។ នេះជាការអះអាងរបស់តារាចម្រៀងជើងចាស់ ហែម សុវណ្ណ រៀបរាប់ពីចំណងប្ដីប្រពន្ធដ៏រឹងមាំជាមួយតន្ត្រីករ សួង ទិតធានី ហៅលោកគ្រូ បា។

តារាចម្រៀងរួមជំនាន់អ្នកស្រី រស់ សេរីសុទ្ធា ខាងលើបញ្ជាក់ទៀតថា ទោះបីជាមានសមត្ថភាពរកលុយដូចគ្នាក៏ពិតមែន ប៉ុន្តែអ្នកទាំងពីរមិនដែលបោះបង់ការគោរពគ្នានោះទេ។ ម្យ៉ាងទៀត បើទោះបីជាប្ដីរបស់ខ្លួនមានវ័យក្មេងជាងក៏ពិតមែន ប៉ុន្តែអ្នកស្រីមិនដែលបោះបង់ការគោរពក្នុងនាមជាស្វាមីនោះទេ ។ ហេតុផលទាំងនេះធ្វើឱ្យចំណងស្នេហ៍៣៥ឆ្នាំមិនដែលធូរ ឬរបូតឡើយ។

ទោះបីជាយ៉ាងណា ដៃគូចម្រៀងអធិរាជសំឡេងមាស ស៊ីន ស៊ីសាមុត រូបនេះបញ្ជាក់ថា គ្រួសាររបស់អ្នកស្រីក៏មិនខុសពីគ្រួសារទូទៅដែរ តែងមានការប៉ះពាល់ដោយពាក្យសំដីរវាងគ្នា និងគ្នាសម្រាប់ការរស់នៅកន្លងមក។ ប៉ុន្តែអតីតជយលាភីលេខ២ក្នុងការប្រឡងចម្រៀងទូទាំងប្រទេសសមាជជាតិឆ្នាំ១៩៦៨ដដែលបញ្ជាក់ថា រាល់ការប៉ះទង្គិចពាក្យសំដីនានា ធ្វើឡើងដោយស្ងាត់ស្ងៀមបំផុតមិនឱ្យមាននរណាដឹងឡើយ សូម្បីកូនចៅក្នុងផ្ទះក៏ដោយ។

ទោះបីជាមានបញ្ហាជាមួយគ្នាខ្លះក៏ពិតមែន ប៉ុន្តែអ្នកទាំងពីរមិនដែលនឹកនារឿងចែកផ្លូវនោះទេ ព្រោះការសាងអនុស្សាវរីយជាផ្នែកមួយ ធ្វើឱ្យនឹកឃើញគ្នាជានិច្ច។ ហែម សុវណ្ណ បញ្ជាក់ថា៖“ទោះបីជាលែងក៏លែងមិនដាច់ដែរ តាយាយខ្ញុំកម្សត់ណាស់ ទៅច្រៀងគេរកបាញ់ គេភ្ជង់ ធ្វើឱ្យយើងមិនអាចបែកគ្នាបាន"។

អ្នកស្រីបន្តថា ប្រសិនបើអ្នកសិល្បៈជំនាន់ក្រោយយកគំរូតាម ប្រហែលជាមិនមានការបែកបាក់គ្នានោះទេ ព្រោះកន្លងមកឃើញមានប្ដីប្រពន្ធសិល្បៈជំនាន់ក្រោយមួយចំនួនជួបរឿងបែកបាក់មិនអាចផ្សះផ្សាគ្នាបាន ព្រោះតែការចង់ឈ្នះរៀងខ្លួន។ អ្នកស្រីថា ស្នើឱ្យគ្រប់គ្រួសារទាំងអស់ ត្រូវចេះអត់ឱនគ្នាទៅវិញទៅមក ទើបអាចរួមរស់នៅជាមួយគ្នាបាន៕

អានអត្ថបទ៖ លី ច័ន្ទសីហា ពន្យារពេលរៀបការ ព្រោះមិនទាន់ដាច់ស្រេច

អានអត្ថបទ៖ តារាវាយតប់ សុខ សុវណ្ណាដែន ត្រៀមថតភាពយន្តវាយតប់ហុងកុង