ប៉ារូលរឿងថ្មីរបស់ សុខ វិសាល ជាប់ក្នុងកម្មវិធី Saff Singapore

2015-12-02 13:30:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ប៉ារូលរឿងថ្មីរបស់ម្ចាស់ផលិតកម្ម 802AD សុខ វិសាល មានចំណងជើងថា"ចូលម្លប់" បានជាប់ក្នុងជម្រើសទាំង ១០ ក្នុងកម្មវិធី Saff Singapore ក្នុងចំណោម ១២៤ ប្រទេសចូលរួមប្រកួតប្រជែង។

លោកបានចេញដំណើរពីប្រទេសកម្ពុជាល្ងាចមិញ ដើម្បីទៅចូលរួមកម្មវិធីខាងលើ ដែលប្រារព្ធឡើងនៅប្រទេសសិង្ហបុរីចាប់ពីថ្ងៃនេះ រហូតដល់ថ្ងៃទី៥ខាងមុខ។ អ្នកដឹកនាំរឿងរូបនេះអះអាងថា ក៏មានការចែករំលែកបទពិសោធន៍គ្នាពីការផលិតកុន និងរបៀបស្វែងរកស្វែងរកលុយ សម្រាប់ដំណើរការផលិតផងដែរ។ ចំពោះម្ចាស់រឿងជាប់ក្នុងជម្រើសទាំងអស់ នឹងបានជួបជាមួយអ្នកវិនិយោគទុនរបស់សិង្ហបុរី។

“ខ្ញុំនឹងព្យាយាមរកវិធីសាស្ត្រនិយាយយ៉ាងណា ដើម្បីឱ្យគេពេញចិត្ត ហើយគេចាយលុយសម្រាប់ដំណើរការថតរឿងនេះ"។ លោក សុខ វិសាល ថ្លែងមកកាន់ Sabay រសៀលនេះមុនឡើងយន្តហោះ។ លោកបន្ថែមថា មានហេតុផលមួយចំនួននាំឱ្យប៉ារូលរឿងថ្មីរបស់ត្រូវបានគណៈកម្មការរៀបចំសម្រេចចិត្តជ្រើសរើសរួមមាន ខ្លឹមសាររឿង ប្រវត្តិអ្នកដឹកនាំរឿង ដែលស្របតាមអ្វីដែលកម្មវិធីចង់បា។ ក្នុងនោះសមត្ថភាពភាសាអង់គ្លេសក៏ត្រូវបានរាប់បញ្ចូលផងដែរ។

អ្នកដឹកនាំរឿងដដែលមិនអាចដាក់ក្ដីសង្ឃឹមទាំងស្រុងទេថា លោកអាចស្វែងរកដៃគូអ្នកវិនិយោគបាន ឬយ៉ាងណានោះ ព្រោះជាការសម្រេចចិត្តរបស់ពួកគេ។ ប៉ុន្តែអ្នកដឹកនាំរឿងនេះចាត់ទុកថា ជាមោនភាពមួយសម្រាប់លោក ខណៈស្នាដៃរបស់លោកត្រូវបានជ្រើសរើស និងជាជនជាតិខ្មែរតែម្នាក់បានទៅចូលរួម៕

អានអត្ថបទ៖ លោក ប៉ាន់ រិទ្ធី នឹងជួបសន្ទនាជាមួយសមិទ្ធិករភាពយន្តជំនាន់ក្រោយ អំពីវិស័យភាពយន្តកម្ពុជា

អត្ថបទ៖ សំ ជំនាញ