កម្ពុជា ចំណាយជិត៤០០លានរៀល បញ្ជូនកីឡា៥ប្រភេទទៅប្រកួតកីឡាអាស៊ីឆ្នេរខ្សាច់
- 2016-09-20 16:48:56
- ចំនួនមតិ 0 | ចំនួនចែករំលែក 0
កម្ពុជា ចំណាយជិត៤០០លានរៀល បញ្ជូនកីឡា៥ប្រភេទទៅប្រកួតកីឡាអាស៊ីឆ្នេរខ្សាច់
ចន្លោះមិនឃើញ
ក្រសួងអប់រំ យុវជន និងកីឡា បានបញ្ជាក់ថាកម្ពុជានឹងបញ្ជូនកីឡាចំនួន៥ប្រភេទទៅចូលរួមប្រកួតកីឡាអាស៊ីឆ្នេរខ្សាច់លើកទី៥ (Asian Beach Games) ដែលប្រព្រឹត្តិទៅនៅទីក្រុងដាណាង ប្រទេសវៀតណាមចាប់ពីថ្ងៃទី ២៤ ខែ កញ្ញា ដល់ថ្ងៃទី ០៣ ខែតុលា ឆ្នាំ២០១៦ ។
មុនការចេញទៅនេះដែរ ឯកឧត្ដមបណ្ឌិត ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានអនុញ្ញាតឲ្យប្រតិភូកីឡាដែលត្រូវចូលរួម ការប្រកួតកីឡាអាស៊ីឆ្នេរខ្សាច់ទាំងអស់បានចូលប្រជុំគ្នា។ ឯកឧត្ដម បាននិយាយប្រាប់ទៅប្រតិភូទាំងអស់ថាត្រូវយកចិត្តទុកដាក់ខ្ពស់ក្នុងការថែរក្សាសុខភាព ទាំងមុនប្រកួតនិងក្រោយប្រកួត។ មួយវិញទៀត ត្រូវខិតខំប្រកួតឱ្យអស់ពីសមត្ថភាពដើម្បីដណ្ដើមបានមេដាយជូនជាតិមាតុភូមិ។
ការប្រកួតកីឡាឆ្នេរខ្សាច់លើកទី ៥ នេះ កម្ពុជាបញ្ជូនកីឡាចំនួន ៥ ប្រភេទដែលក្នុងនោះមានបាល់ទះលើឆ្នេរខ្សាច់ ចំបាប់លើឆ្នេរ វ៉ូវីណាម Combat in Traditional Martial Art និងប៉េតង់។ ដោយមានប្រតិភូសរុប៥៨នាក់ ជាការចំណាយទាំងស្រុងរបស់ក្រសួងអប់រំ យុវជន និងកីឡា ទាំងការធ្វើដំណើរទៅមក ការស្នាក់នៅ ហូបចុក សំលៀកបំពាក់ផ្លូវការ សំលៀកបំពាក់ប្រកួត ព្រមទាំង ប្រាក់ហោប៉ៅផងដែរ។ ដោយគិតជារួមចំណាយសរុបអស់ថវិកា ៣៨១ ២៩៦ ០០០រៀល។
កាលពីការប្រកួត កីឡាឆ្នេរខ្សាច់អាស៊ីលើកទី ៤ នៅ ផូកេត ប្រទេសថៃ កម្ពុជាបញ្ជូនប្រភេទកីឡាចំបាប់ទៅចូលរួមដែលកាលនោះ កីឡាការិនី នី សំណាង ដណ្ដើមបានមេដាយ សំរឹទ្ធ ១ គ្រឿង៕
អត្ថបទ៖ មុន្នី រម្យ ប្រភព៖ អគ្គនាយកដ្ឋានកីឡា