៤០ក្រុមហ៊ុន ជុំវិញពិភពលោកមកបង្ហាញគ្រឿងអលង្ការលើកទី៣នៅកម្ពុជា

2017-06-15 10:57:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្ងៃសម្ពោធពិព័រណ៍គ្រឿងអលង្ការ និងត្បូងមានតម្លៃអន្តរជាតិ-កម្ពុជា លើកទី៣ នៅមជ្ឍមណ្ឌលកោះពេជ្រ នារសៀលថ្ងៃទី ១៥ ខែ មិថុនា លោក ជំទាវ ឧកញ៉ា លីម ឈីវហួរ ប្រធានសមាគមពាណិជ្ជកម្មគ្រឿងអលង្ការ និងត្បូងមានតម្លៃនៅកម្ពុជា បានមានប្រសាសន៍ថា នៅក្នុងពិព័រណ៍គ្រឿងអលង្ការលើកទី៣ បានអូសទាញចំណាប់អារម្មណ៍ក្រុមអ្នកវិនិយោគ និងក្រុមហ៊ុនចូលរួមតាំងបង្ហាញប្រមាណ៤០តាមបណ្ដាប្រទេសចំនួន៦នៅជុំវិញពិភពលោក។

ប្រទេសធំបានរួមចូលដាក់តាំងបង្ហាញគ្រឿងអលង្ការ និងត្បូងមានតម្លៃ មានដូចជា ប្រទេសឥណ្ឌា ហុងកុង ថៃ វៀតណាម អារ៉ាប់ និងប្រទេសកម្ពុជាតែម្ដង។

លោកជំទាវ ឧកញ៉ា លីម ឈីវហួរ បានថ្លែងពីគោលបំណងដែលបានរៀបចំការតាំងពិព័រណ៍នេះ គឺដើម្បីលើកតម្កើងពីផលិតផលត្បូងមានតម្លៃរបស់ខ្មែរ ឲ្យប្រទេសដទៃកាន់យល់ដឹង និងចង់ឲ្យកូនខ្មែរកាន់តែយល់ច្បាស់ពីបច្ចេកទេសកែច្នៃត្បូង ដើម្បីឲ្យក្លាយផលិតផលមានតម្លៃលំដាប់អន្តរជាតិ។

ឯកឧត្តម ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្ម បានគូសបញ្ជាក់ដែរថា វិស័យកែច្នៃត្បូងនៅកម្ពុជា មានទីផ្សារធំណាស់ តែកម្ពុជានៅមិនទាន់មានបច្ចេកទេសគ្រប់គ្រាន់ ដើម្បីធ្វើឲ្យក្លាយជាវត្ថុមានតម្លៃលំដាប់អន្តរជាតិ។

គួរជម្រាបបន្ថែមដែរថា ពិព័រណ៍គ្រឿងអលង្ការ និងត្បូងមានតម្លៃអន្តរជាតិ-កម្ពុជា លើកទី៣ មានរយៈពេលបីថ្ងៃ ចាប់ថ្ងៃទី ១៥ ដល់ ១៨ មិថុនា ឆ្នាំ ២០១៧៕

សូមទស្សនាវីដេអូ