មិនមែនលំៗទេ ការងារ IT ខ្លះ រកមួយខែ អាចទិញ Prius បានមួយគ្រឿង

2017-12-22 04:45:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ទីផ្សារការងារក្នុងពិភពលោកបច្ចុប្បន្ន វិស័យបច្ចេកវិទ្យាត្រូវបានគេស្គាល់ជាអាជីពមួយ ដែលអាចផ្ដល់ប្រាក់ចំណូលខ្ពស់សម្រាប់អ្នកមានជំនាញច្បាស់លាស់។ Sabay លើកយកមុខតំណែង ៥ ផ្នែក IT សម្រាប់ទីផ្សារសកលដែលអាចទទួលបានប្រាក់កម្រៃក្នុងមួយខែក្បែរមុឺនដុល្លារ។

១.អ្នកវិទ្យាសាស្ត្រស្រាវជ្រាវផ្នែកកុំព្យូទ័រនិងព័ត៌មានវិទ្យា:

ជាទូទៅប្រាក់ខែលើមុខតំណែងនេះ ប្រហែល ៩៨,២០០ ដុល្លារ ក្នុងមួយឆ្នាំឬជាង ៨,១៥០ ដុល្លារ ក្នុងមួយខែ។ កាតព្វកិច្ចរបស់ពួកគេគឺត្រូវរចនានិងអភិវឌ្ឍនូវដំណោះស្រាយថ្មីនៃវិស័យបច្ចេកវិទ្យា ដែលជួយសម្រួលសឹងគ្រប់ឧស្សាហកម្មមិនថាផ្នែកសុខាភិបាល, វិទ្យាសាស្ត្រនិងការងារហត្ថកម្ម។

សិក្សានិងដោះស្រាយនៅបញ្ហាគ្រឿងម៉ាស៊ីនដោយប្រើបច្ចេកវិទ្យា ក្នុងការពង្រឹងល្បឿនដំណើរការនិងប្រព័ន្ធសុវត្ថិភាពជាដើម។ តម្រូវការអប្បបរមាក្នុងតំណែងនេះ ចាំបាច់ត្រូវបញ្ចប់ការសិក្សាបរិញ្ញាបត្រឲ្យត្រូវផ្នែកដែលបានកំណត់។

២.អ្នករចនា UX ជាន់ខ្ពស់:

អ្នករចនា UX (User Experience) ត្រូវធ្វើការជាមួយ Designer, វិស្វករកម្មវិធី, ប្រធានផលិតផល ហើយត្រូវមានជំនាញផ្នែករឹងច្បាស់លើបច្ចេកវិទ្យាគួបផ្សំការរចនា ជាមួយភាពច្នៃប្រឌិតនៃការស្វែងយល់ជុំវិញអន្តរកម្មឆ្លើយតបពីមនុស្សជាមួយនិងបច្ចេកវិទ្យា។ ក្នុងមួយខែអាចរកបានប្រហែល ៨,២០០ ដុល្លារ ឬជាង ៩៨,៣០០ ដុល្លារ ក្នុងមួយឆ្នាំ។

៣.ស្ថាបត្យករផ្នែកទន់:

Software Architect ជាអាជីពត្រូវប៉ាន់មួយផ្សេងទៀត ដែលខុសគ្នាពី Architect ធម្មតា ព្រោះតួនាទីរបស់មុខតំណែងនេះចាំបាច់ត្រូវសិក្សាពីបច្ចេកវិទ្យាឲ្យស៊ីជម្រៅបំផុត។ ត្រូវមានទំនួលខុសត្រូវខ្ពស់លើការរចនានិងអភិវឌ្ឍនូវ Software ជំនាន់ថ្មី បន្សំនឹងការបង្កើតនូវលក្ខណៈសម្បត្តិនៃស្ថាបត្យកម្មកម្មវិធីកម្រិតខ្ពស់ថែមទៀតផង។ ប្រាក់ខែប្រចាំឆ្នាំ ៩៨,៩០០ ដុល្លារ ដោយក្នុងមួយខែអាចរកបានប្រហែល ៨,២៤១ ដុល្លារ ។

៤.វិស្វករកម្មវិធីជាន់ខ្ពស់:

មានកាតព្វកិច្ចក្នុងការរចនា, អភិវឌ្ឍនិងដោះស្រាយចន្លោះប្រហោងនៃកម្មវិធីមិនថាជំនាន់ថ្មីឬចាស់។ ជាពិសេសក៏មានទំនួលខុសត្រូវលើការគ្រប់គ្រងនិងហ្វឹកហាត់អ្នកអភិវឌ្ឍកម្មវិធីកម្រិតទាប ដើម្បីជួយពួកគេឲ្យទទួលបានចំណេះដឹងនិងបទពិសោធន៍បន្ថែម។ ប្រាក់ខែប្រចាំឆ្នាំខ្ទង់ ១០៣,៤០០ ដុល្លារ ឬជាង ៨,៦១៦ ដុល្លារ ក្នុងមួយខែ។

៥.នាយកផ្នែកវិស្វករកម្មវិធី:

ដឹងស្ទើរគ្រប់ជ្រុងនៃបច្ចេកទេសលើគម្រោងកម្មវិធី ដោយមានទំនួលខុសត្រូវក្នុងការបង្កើតគម្រោងនិងកាត់បន្ថយការចំណាយ។ ទៀតសោតក៏ត្រួតពិនិត្យលើក្រុមអភិវឌ្ឍនិងសម្របសម្រួលនូវយុទ្ធសាស្ត្រ ដើម្បីឲ្យប្រាកដថាបច្ចេកវិទ្យានិងចង្វាក់ផលិតផលធ្វើការព្រមគ្នា។

តម្រូវការទូទៅបរិញ្ញាបត្រផ្នែកវិទ្យាសាស្ត្រកុំព្យូទ័រ បន្សំនឹងចំណេះដឹងផ្នែកសរសេរកូដ ជាមួយសញ្ញាប័ត្រ CSDP រួមជាមួយបទពិសោធន៍ផ្ទាល់នៅខាងក្រៅមុនទទួលបានតំណែងនេះ។ មួយឆ្នាំបានជាង ១២៤,៨០០ ដុល្លារ ឬប្រហែល ១០,៤០០ ដុល្លារ ក្នុងមួយខែ។

ប្រភព: https://www.cio.com/article/2848235/it-skills-training/5-top-paying-it-jobs-for-every-stage-of-tech-careers.html#