សុះ ស៊ូហាណា បង្ហើបថា ពេលជាប់ជម្រើសជាតិបានជួយគ្រួសារបានច្រើន

2017-12-22 01:59:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែបម្រើប្រយុទ្ធរបស់ជម្រើសជាតិកម្ពុជា និងកីឡាកររបស់ណាហ្គាវើល សុះ ស៊ូហាណា បង្ហើបថា មុនពេលបានជាប់ជម្រើសជាតិកាលពីឆ្នាំ២០១១ ក្រោមការដឹកនាំរបស់លោក Lee Tae Hoon គ្រូសាររបស់គេមានភាពខ្វះខាតយ៉ាងខ្លាំង។

សុះ ស៊ូហាណា (លេខ ១២)

សុះ ស៊ូហាណា ចាប់ផ្ដើមលេងបាល់នៅអាយុ ១៦ឆ្នាំនាកំឡុងឆ្នាំ២០០៩ ដោយពេលនោះចូលលេងឲ្យក្លឹបព្រែកប្រាកីឡា។ កូនខ្មែរឥស្លាមរួបនេះកើតនៅខែមេសា ឆ្នាំ១៩៩២ នៅភ្នំពេញ មានឪពុកឈ្មោះ សុះ អ៊ីសា ម្ដាយឈ្មោះ ឯលអាស៊ីយ៉ាស់។ បច្ចុប្បន្នឪពុកចាស់នៅផ្ទះ ស្របពេលម្ដាយរកស៊ីលក់ដូរនៅផ្ទះបន្តិចបន្តួច។

ខ្សែបម្រើណាហ្គារូបនេះតែងយកប្រាក់ខែរបស់ខ្លួនផ្ដល់ទៅឲ្យគ្រួសារចំនួនពាក់កណ្ដាល ដើម្បីផ្គត់ផ្គង់ជីវភាពគ្រួសារជារៀងរាល់ខែ។ ក្រោយពេលបានជួយគ្រួសារច្រើន រូបគេទទួលបានការលើកទឹកចិត្តពីឪពុកម្ដាយ ឲ្យប្រឹងប្រែងលេង និងហ្វឹកហាត់ឲ្យបានកាន់តែល្អ។

ហាណា មិនដែលត្អូញត្អែរក្នុងអាជីពរបស់ខ្លួន បើទោះមិនមានសល់អ្វីជាដំកំភួន ដោយសារមានភារកិច្ចជួយជ្រោមជ្រែងគ្រួសារក្ដី។ ខ្សែបម្រើជម្រើសជាតិរួបនេះទម្លាយថា មុនពេលរូបគេបានជាប់ជម្រើសជាតិកម្រិតជីវភាពគ្រួសារមានការខ្វះខាតខ្លាំង ប៉ុន្តែក្រោយមានឱកាសបានបង្ហាញខ្លួនឲ្យជម្រើសជាតិ ក្នុងកំឡុងឆ្នាំ២០១១ ដែលពេលនោះលេងឲ្យក្លឹបភ្នំពេញក្រោន គឺជាពេលដែលជីវភាពគ្រួសាររបស់គេមានភាពប្រសើរឡើងពីថ្ងៃទៅមួយថ្ងៃ។

ចំពោះសំនួរដែលសួរថា ទទួលបានបទពិសោធអ្វីខ្លះពីលោក Lee Tae Hoon ក្នុងកំឡុងហាត់ជាមួយគ្រូបង្វឹកសញ្ជាតិកូរ៉េខាងត្បូងរូបនេះ ហាណា និយាយថា ទាំងបច្ចេកទេសបញ្ជូនបាល់ និងសមត្ថភាពលើទីលានមានភាពកើនឡើងយ៉ាងរហ័ស។ សម្រាប់ជម្រើសជាតិកម្ពុជា ចំពោះគេបើទោះមិនសូវមានឈ្មោះបោះសំឡេងល្បីដូចមិត្តរួមជាតិ ចាន់ វឌ្ឍនាកា ឬ កែវ សុខផេង ក៏នៅតែសប្បាយចិត្ត និងប្រឹងប្រែងលេងឲ្យជម្រើសជាតិឲ្យអស់ពីចិត្តពីថ្លើម។

ចំពោះបញ្ហាអនាគត ហាណា មិនទាន់កំណត់បានឡើយ ដោយសារមិនមានប្រាក់គ្រប់គ្រាន់ក្។ គោលដៅរបស់គេនាកំឡុងអាយុប្រហែលជា ៣០ ឬ៣១ឆ្នាំ នឹងឈប់លេងបាល់ ដើម្បីបង្កើតមុខរបររកស៊ី។ ជាមួយគ្នានោះ ហាណា បានសន្យាថា នឹងបង្កើនការខំប្រឹងប្រែងបន្ថែមទៀតប្រសិនបានជាប់ជម្រើសជាតិជាថ្មីនៅលើកក្រោយៗទៀត។ ខ្សែបម្រើរូបនេះនៅសល់កុងត្រាមួយឆ្នាំទៀតជាមួយណាហ្គាវើល ពោលគឺរហូតផុតឆ្នាំ២០១៨៕