៩ កន្លែងជុំវិញពិភពលោក មានតែអ្នកក្លាហានប៉ុណ្ណោះហ៊ានទៅលេង

2017-12-27 02:48:17
ចំនួនមតិ 0 | ចំនួនចែករំលែក 0

ចន្លោះមិនឃើញ

មុនពេលយើងចេញទៅវិស្សមកាល យើងតែងរៀបចំផែនការសម្រាប់ការធ្វើដំណើររបស់យើងយ៉ាងប្រុងប្រយ័ត្ន ហើយយើងក៏អាចរៀនសូត្របានច្រើនតាមដែលអាចធ្វើបានអំពីកន្លែងដែលទៅលេង។ មនុស្សជាច្រើនទៅវិស្សមកាលដោយហេតុផលផ្សេងៗគ្នា ដោយអ្នកខ្លះចង់ស្វែងរកភាពស្ងប់ស្ងាត់ ហើយអ្នកខ្លះទៀតចង់ជម្នះភាពភ័យខ្លាចរបស់ពួកគេដោយប្រឈមមុខនឹងបញ្ហាខ្លួនឯង។ ខាងក្រោមនេះ គឺជាកន្លែងទាំង ៩ ជុំវិញពិភពលោកដែលមានតែអ្នកក្លាហានប៉ុណ្ណោះហ៊ានទៅលេង ៖

១. វិហារឆ្អឹង

វិហារនេះមានទីតាំងនៅទីក្រុងÉvoraប្រទេសព័រទុយហ្គាល់ ហើយវាជាវិមានដ៏ល្បីល្បាញបំផុតមួយនៃទីក្រុង។ វិហារនេះត្រូវបានគេដាក់ឈ្មោះដូចនេះ ដោយសារតែជញ្ជាំងរបស់វាគ្របដណ្តប់ដោយលលាដ៍ក្បាល និងឆ្អឹងមនុស្ស។ វិហារឆ្អឹង ត្រូវបានសាងសង់ឡើងនៅសតវត្សទី ១៦ ដោយ សង្ឃ Fransiscan ដែលចង់ប្រាប់បងប្អូនរបស់ព្រះអង្គថាជីវិតគឺខ្លីណាស់។ នេះហើយជាមូលហេតុដែលជញ្ជាំងត្រូវបានគ្របដណ្ដប់ដោយឆ្អឹង។

២. ព្រៃ Hoia

ព្រៃ Hoia មានទីតាំងស្ថិតនៅតំបន់ Transylvania និងមានភាពល្បីល្បាញសម្រាប់រឿងរ៉ាវអាថ៌កំបាំងជាច្រើនរបស់វា។ អ្នកស្រាវជ្រាវជាច្រើនបានអះអាងថា ពួកគេធ្លាប់មានការភ័យខ្លាច និងស្លន់ស្លោ ហើយពួកគេបានឮសម្លេងផ្សេងគ្នានៅក្នុងព្រៃនេះ។ ចំណែកឯអ្នកផ្សេងទៀតបានជឿជាក់ថា ពួកគេបានឃើញឋានហោះមួយនៅទីនោះ ហើយអ្នកផ្សេងទៀតប្រាកដថាពួកគេបានឃើញខ្មោចផងដែរ។

៣. ភ្នំឈើឆ្កាង

ភ្នំឈើឆ្កាង គឺ ជាកន្លែងដ៏ពិសិដ្ឋមួយនៅក្នុងប្រទេស Lithunia ហើយវាគឺជាភ្នំមួយដែលមានឈើឆ្កាងជាច្រើន។ ចំនួនពិតប្រាកដនៃឈើឆ្កាង មិនត្រូវបានគេដឹងទេ ប៉ុន្តែយោងទៅតាមការគណនាមួយចំនួននៅទសវត្សរ៍ ៩០ ឈើឆ្កាងទាំងអស់មានប្រហែល ៥០ ០០០។ តំបន់នេះមិនមែនជាទីបញ្ចុះសពនោះទេ ប៉ុន្តែឈើឆ្កាងកាន់តែច្រើនឡើងៗ លេចឡើងនៅទីនោះ ដោយសារមនុស្សជឿថា ប្រសិនបើអ្នកទុកឈើឆ្កាងនៅលើភ្នំ អ្នកនឹងមានសំណាង។

៤. តំបន់ទេសចរ Caminito Del Rey

El Caminito del Rey គឺជាសំណង់បេតុងមួយ ដែលដាក់ផ្លូវដែកទៅក្នុងដុំថ្ម។ ផ្លូវនេះមានទីតាំងស្ថិតនៅចន្លោះទឹកធ្លាក់ Chorro និង Gaitanejo ទីក្រុង Malaga ប្រទេសអេស្ប៉ាញ ហើយវាមានកម្ពស់ខ្ពស់ពីដីខ្លាំងណាស់។ ផ្លូវនេះមានបណ្តោយ ១,៨ ម៉ាយ (ជាង ២គីឡូម៉ែត្រ) និងទទឹង ៣,២ ហ្វីត (០,៩ ម៉ែត្រ)។ វាត្រូវបានកសាងឡើងក្នុងឆ្នាំ ១៩០៥ ជាផ្លូវជំនួយសម្រាប់កម្មករដែលកំពុងសាងសង់ទំនប់ទឹក។

៥. មឈូសព្យួរ

ក្រុង Sagada ពិតជាមានភាពទាក់ទាញណាស់សម្រាប់ភ្ញៀវទេសចរ ដោយសារតែតំបន់នេះពីមុន ជាផ្នែកមួយនៃមហាសមុទ្រ។ ឥឡូវនេះវាមានរូងភ្នំ និងថ្មជាច្រើន ហើយថ្មមួយក្នុងចំណោមថ្មទាំងអស់មានព្យួរមឈូសយ៉ាងច្រើន។ ការកប់ក្នុងមឈូស គឺជាប្រពៃណីចំណាស់មួយដែលមឈូសត្រូវបានឆ្លាក់ពីបំណែកឈើ។ ក្រោយពីអ្នកស្លាប់ត្រូវបានដាក់នៅក្នុងមឈូស គេយកមឈូសនោះទៅដាក់នៅលើច្រាំងថ្មចោទខ្ពស់រហូតដល់ទៅ ៣៨០ ហ្វីត (ជាង ១១៥ ម៉ែត្រ) ឬនៅក្នុងរូងភ្នំ។ យោងទៅតាមរឿងព្រេងបុរាណ ភ្នំនេះគឺជាជណ្ដើររវាងផែនដី និងស្ថានសួគ៌។

៦. ការរត់នៃគោញី (ប្រពៃណីជាតិអេស្ប៉ាញ)

Encierro គឺជាប្រពៃណីដែលអ្នកត្រូវរត់ចេញពីគោ ដែលត្រូវបានដោះលែងឱ្យមានសេរីភាព។ ប្រពៃណីនេះនៅតែជាទម្រង់កម្សាន្តពេញនិយម នៅតាមភូមិជាច្រើនក្នុងប្រទេសអេស្ប៉ាញ។ ប្រពៃណី Encierro ដ៏ពេញនិយមបំផុតត្រូវបានប្រារព្ធឡើងនៅទីក្រុង Pamplona ក្នុងអំឡុងពិធីបុណ្យ San Fermin។

៧. ផ្នូរខ្មោច Capuchin

នៅ Palermo ប្រទេសអ៊ីតាលីមានផ្នូរខ្មោចមួយដែលជាកន្លែងកប់សាកសពជាង ៨០០០ នាក់។ កន្លែងនេះ គឺជាកន្លែងតាំងពិពណ៌ខោ្មចម៉ាំមីដ៏ល្បីបំផុតមួយ ។ ផ្នូរនេះ ត្រូវបានសាងសង់នៅចុងសតវត្សទី ១៦ នៅពេលចំនួននៃវត្តអារាម Capucci បានកើនឡើងហើយពួកគេត្រូវការទីបញ្ចុះសពកាន់តែធំ។ នៅសតវត្សទី ១៨ ដល់ទី ១៩ ទីកន្លែងនេះបានក្លាយជា កន្លែងប្រណីតសម្រាប់ការបញ្ចុះសពបព្វជិត និងគ្រួសារគហបតី។ នៅឆ្នាំ ១៨៨២ គេបានបិទទ្វារផ្នូរនេះ ហើយគ្មាននរណាម្នាក់ត្រូវបានកប់នៅទីនោះទៀតទេ។

៨. កប៉ាល់ខ្មោចនៅកោះ Solomon

កន្លែងនេះ គឺជាទឹកដីដែលនាវាមិនអាចបើកបរបាន ដោយសារតែមានផ្កាថ្មជាច្រើននៅក្រោមទឹក។ នៅឆ្នាំ ២០០០ នាវារបស់ជនជាតិ Liberian ឈ្មោះថា World Discoverer បានជាប់គាំងនៅជិតកោះ Solomon នៅមហាសមុទ្រប៉ាស៊ីហ្វិក។ គ្មានអ្នកដំណើរណាម្នាក់ត្រូវបានរងរបួសនោះទេ ប៉ុន្តែពុំមានមធ្យោបាយដើម្បីជួយសង្គ្រោះនាវានោះ ដូច្នេះវាត្រូវបានទុកចោល និងក្លាយទៅជាជម្រកសម្រាប់ត្រី និងសត្វសមុទ្រដទៃទៀត។

៩. កន្លែងបញ្ចុះខ្មោចឡាន

កន្លែងនេះមើលទៅដូចជា ការផ្សព្វផ្សាយខ្សែភាពយន្តខ្មោចឆៅថ្មីៗនេះ ប៉ុន្តែការពិតវាជាកន្លែងពិតប្រាកដមួយនៅក្នុងប្រទេសបែលហ្ស៊ិក។ បន្ទាប់ពីសង្គ្រាមលោកលើកទី ២ ទាហានអាមេរិកបានចាកចេញ និងទុកឡានរបស់ពួកគេនៅក្នុងព្រៃ។ ជាច្រើនឆ្នាំក្រោយមក ធម្មជាតិបានកាន់កាប់ទីនោះ ហើយព្រៃឈើបានដុះជុំជិតឡានទាំងនោះ៕