ធ្លាប់ដឹងអត់? អធិរាជដំបូងរបស់ចិន ធ្លាប់បញ្ជាឲ្យស្វែងរកថ្នាំជីវិតអមត

2017-12-28 08:59:02
ចំនួនមតិ 0 | ចំនួនចែករំលែក 0

ចន្លោះមិនឃើញ

អធិរាជដំបូងរបស់ប្រទេសចិនQin Shihuang មិនត្រឹមតែនៅពីក្រោយការបង្កើតកងទ័ព Terracotta ដ៏អស្ចារ្យនោះទេ ព្រះអង្គក៏ធ្លាប់បានបញ្ជាឱ្យស្វែងរកថ្នាំជីវិតអមតនៅទូទាំងប្រទេសផងដែរ នេះបើយោងតាមការស្រាវជ្រាវបុរាណវិទ្យាថ្មីៗ។

ភស្តុតាងទាំងនោះត្រូវបានរកឃើញក្នុងបន្ទះឈើឯកសារមួយនៅក្នុងខេត្ត ហ៊ូណាន ដែលមានព្រះរាជបញ្ជារបស់ព្រះចៅអធិរាជ ដែលតម្រូវឱ្យប្រជាជនទាំងអស់ស្វែងរកថ្នាំជីវិតអមត។ បន្ទះឈើសរុបជាង ៣៦ ០០០ ត្រូវបានគេរកឃើញដំបូងនៅឆ្នាំ ២០០២ ក្នុងបាតអណ្តូង។ បន្ទះឈើទាំងនោះ គ្របដណ្តប់លើវប្បធម៌, សេដ្ឋកិច្ច, ច្បាប់, វេជ្ជសាស្ត្រ, យោធា និងនយោបាយ។

ភូមិមួយឈ្មោះ Duxiang ត្រូវបានរាយការណ៍ថា អ្នកភូមិបានបរាជ័យក្នុងការស្វែងរក ថ្នាំជីវិតអមត ដ៏មានតម្លៃ ប៉ុន្តែបានបញ្ជាក់ថាការស្វែងរកនៅតែបន្ត។ ភូមិមួយទៀតហៅថា Langya ដែលឥឡូវនេះស្ថិតក្នុងខេត្ត សានដុង ធ្លាប់បានបង្ហាញឱសថរុក្ខជាតិមួយដែលប្រមូលពីភ្នំល្អក្នុងតំបន់ផងដែរ។

លោក Zhang Chunlong ជាអ្នកស្រាវជ្រាវម្នាក់នៅវិទ្យាស្ថានបុរាណវិទ្យាខេត្ត បានសិក្សាទៅលើបន្ទះឈើឯកសារដែលទាក់ទងនឹងថ្នាំចំនួន ៤៨មុខ និងបានរកឃើញ រាជវង្ស Qin មានប្រព័ន្ធវេជ្ជសាស្ត្រទំនើប ជាមួយនឹងនីតិវិធីនៃការចងក្រងឯកសារខ្លាំងក្លា។ លោកបាននិយាយថា ព្រះរាជបញ្ជានេះត្រូវបានសាយភាយទៅដល់តំបន់ព្រំដែន និងភូមិដាច់ស្រយាល។

យោងតាមទីភ្នាក់ងារ AFP, ព្រះចៅអធិរាជ Qin ក៏ត្រូវបានទទួលស្គាល់ផងដែរសម្រាប់ស្នាព្រះហស្តរបស់ព្រះអង្គក្នុងការបង្រួបបង្រួមប្រទេស។ ហេតុដូច្នេះហើយ ការស្វែងរកថ្នាំជីវិតអមតនៅទូទាំងប្រទេស បានបង្ហាញភស្តុតាងយ៉ាងច្បាស់ពីការប្រមូលផ្ដុំអំណាចរបស់ព្រះអង្គ៕