ជិត ៣ ឆ្នាំ ក្រោយដួលរលំ អតីតអាគារការិយាល័យក្រុមហ៊ុន Beeline បន្តបិទទ្វារ

2018-01-04 07:22:16
ចំនួនមតិ 0 | ចំនួនចែករំលែក 0

ចន្លោះមិនឃើញ

អំឡុងដើមឆ្នាំ ២០១៥ ក្រុមហ៊ុន Beeline (Sotelco Ltd) បានប្រកាសក្ស័យធន ក្រោយប្រតិបត្តិការបានជាង ៥ ឆ្នាំ។ ក្នុងពេលស្ថានភាពអាជីវកម្មមិនអាចបន្តឈរជើងទៅមុខទៀតបាន ក្រុមហ៊ុនបានប្រកាសលក់អាជីវកម្មឲ្យក្រុមហ៊ុនជាគូប្រកួតប្រជែង Metfone។

បើក្រឡេកមើលអាគារការិយាល័យរបស់ក្រុមហ៊ុន ដែលស្ថិតនៅជ្រុងមួយផ្នែកតាមបណ្តោយរុក្ខវិថីខេមរភូមិន្ទកែងវិថីស្រុកទ្រាំង នៅតែបន្តបិទទ្វារនៅឡើយ។ ពេល Sabay ដើរទៅមើលច្រកផ្នែកខាងមុខនៅសល់ស្លាកស្នាមឡូហ្គោបង្ហាញពីអតីតក្រុមហ៊ុនម្ចាស់គ្រប់គ្រងអគារនេះពីមុនតែប៉ុណ្ណោះ។

ក្រុមហ៊ុន Sotelco (Beeline) បានបើកដំណើរការអាជីវកម្មនៅប្រទេសកម្ពុជាក្នុងខែឧសភា ឆ្នាំ២០០៩ ស្ថិតនៅក្រោមអាណាព្យាបាលរបស់ក្រុមហ៊ុនមេ Vimple Com ដែលមានមូលដ្ឋាននៅប្រទេសហុល្លង់ បន្ទាប់ពីទទួលបានអាជ្ញាប័ណ្ណកាលពីខែ កក្កដា ២០០៨ ដោយប្រើប្រាស់ឈ្មោះក្រុមហ៊ុន Sotelco និងយីហោ Beeline។

ការចាប់ដំណើរការអាជីវកម្មដំបូង ក្រុមហ៊ុនបានសម្រេចជោគជ័យដោយបានក្លាយជាក្រុមហ៊ុនឈានមុខគេមួយ ក្នុងការផ្តល់សេវាទូរសព្ទលំដាប់ខ្ពស់ដល់អតិថិជន។ យ៉ាងណាស្ថានភាពអាជីវកម្មរបស់ក្រុមហ៊ុនចាប់ផ្ដើមវិវត្តទៅរកស្ថានភាពមិនសូវល្អនៅនៅឆ្នាំបន្តបន្ទាប់។