ត្រៀមលុយឲ្យហើយ! អ្នកធ្លាប់ល្មើសច្បាប់ចរាចរណ៍ ប៉ូលិសឆែកឃើញខ្ទេចក្នុងកាមេរ៉ា
- 2018-01-03 04:47:42
- ចំនួនមតិ 0 | ចំនួនចែករំលែក 0
ត្រៀមលុយឲ្យហើយ! អ្នកធ្លាប់ល្មើសច្បាប់ចរាចរណ៍ ប៉ូលិសឆែកឃើញខ្ទេចក្នុងកាមេរ៉ា
ចន្លោះមិនឃើញ
កន្លងមកឯកឧត្ដម រុន រ័ត្នវាសនា ប្រធាននាយកដ្ឋាននគរបាលចរាចរណ៍ និង សណ្ដាប់ធ្នាប់ សាធារណៈ នៃអគ្គស្នងការដ្ឋាននគរបាលជាតិ សមត្ថកិច្ចនឹងត្រួតពិនិត្យមើលកាមេរ៉ាសុវត្ថិភាពឡើងវិញ ចំពោះអ្នកបើកបរណាដែលមិនគោរពភ្លើងសញ្ញាចរាចរណ៍ មិនពាក់មួកសុវត្ថិភាពកន្លងមក និងផ្ញើសំបុត្រផាកពិន័យដល់ផ្ទះតែម្ដង តាម មាត្រា ៨ នៃអនុក្រឹត្យស្ដីពីការពិន័យអន្តរការណ៍ចំពោះអំពើល្មើសនឹងច្បាប់ស្ដីពីចរាចរណ៍ផ្លូវគោក។
កាន់តែច្បាស់ការក្នុងកិច្ចប្រជុំបូកសរុបការងារចរាចរណ៍របស់អនុគណៈកម្មការទី២ នៃគណៈកម្មការជាតិសុវត្ថិភាពចរាចរណ៍ផ្លូវគោក លោកឧត្តមសេនីយ៍ឯក ហ៊ឹម យ៉ាន អគ្គស្នងការរងនគរបាលជាតិ បានបញ្ជាក់ថា សមត្ថកិច្ចនឹងពិនិត្យតាមកាមេរ៉ាសុវត្ថិភាព ដែលដាក់នៅតាមភ្លើងស្តុប តាមរកអ្នកដែលជិះម៉ូតូមិនពាក់មួកសុវត្ថិភាព ដើម្បីធ្វើការផាកពិន័យ និងបញ្ជូនសំណុំរឿងទៅតុលាការចំពោះអ្នកដែលមិនព្រមបង់ប្រាក់ពិន័យ។
លោកឧត្ដមសេនីយ៍ឯកបន្តទៀតថា សមត្ថកិច្ចនឹងឃាត់អ្នកជិះម៉ូតូដែលមិនពាក់មួកសុវត្ថិភាព នឹងតម្រូវឲ្យម្ចាស់ម៉ូតូរកមួកសុវត្ថិភាពពាក់នៅចំពោះមុខសមត្ថកិច្ចទើបអនុញ្ញាតឲ្យបន្តដំណើរបាន។
សូមជម្រាបជូនថា សមត្ថកិច្ចនឹងប្រើពេលត្រឹម១០វិនាទីប៉ុណ្ណោះ ដើម្បីដឹងពីអាសយដ្ឋានរបស់អ្នកល្មើសច្បាប់ចរាចរណ៍ តាមរយៈកាមេរ៉ាបំពាក់តាមភ្លើងស្តុប។ កាមេរ៉ាជិត១០០០គ្រឿងត្រូវបានដំឡើងដើម្បីអាចត្រួតពិនិត្យ និង តាមដានសកម្មភាពជនល្មើសបានយ៉ាងងាយ។
ក្នុងកិច្ចសម្ភាសន៍ជាមួយ Sabayកន្លងមកឯកឧត្ដម រុន រ័ត្នវាសនា ប្រាប់ថា កាមេរ៉ាទាំងនោះមានសមត្ថភាពពិសេសគឺអាច Zoom មើលបានរហូតដល់ចម្ងាយ ២ ទៅ ៣ គីឡូម៉ែត្រឯណោះ។ ដូចនេះវាផ្ដល់នូវរូបភាពច្បាស់ ក្នុងការថតយកផ្លាកលេខយានយន្តរបស់ជនល្មើស និង រូបជនល្មើសផ្ទាល់ដែលរត់គេចខ្លួន។
បន្ទាប់មកសមត្ថកិច្ចនឹងធ្វើការស្វែងរកអាសយដ្ឋានរបស់ម្ចាស់យានយន្តនោះដោយចំណាយពេលត្រឹមតែ១០វិនាទីប៉ុណ្ណោះ តាមរយៈម៉ាស៊ីនកុំព្យូទ័ររបស់ក្រសួង ដែលបានផ្ទុកទិន្នន័យផ្លាកលេខយានយន្ត។ ជាងនេះទៅទៀត សមត្ថកិច្ចក៍នឹងមានបញ្ជូនជាលិខិតផាកពិន័យទៅដល់ផ្ទះម្ចាស់យានយន្តទៀតផង។
ដូច្នេះម្ចាស់យានយន្តទាំងអស់ប្រញាប់ប្រញាល់ទៅកាត់ឈ្មោះ និង ផ្ទេរសិទ្ធកាន់កាប់អោយបានត្រឹមត្រូវ ដើម្បីកុំអោយជាប់ឈ្មោះក្នុងបទល្មើសយានយន្តនានាដោយមិនដឹងខ្លួន៕