រដូវបុណ្យទាន ប្រហុកអាំងស្រុកស្រែឡើងចាងហើយតើ!

2014-09-20 16:16:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រហុកខ្ចប់ដោយស្លឹកចេកស្រស់ៗកំពុងប្រែពណ៌ទៅជាក្រហមក្រមៅដោយសារតែអំណាចរងើកភ្លើងពណ៌ក្រហម បានបង្ហើរក្លិនឈ្ងុយរបស់ ខ្លួនទាក់ចិត្តប្រជាជនខ្មែរដែលមានវប្បធម៌និយមបរិភោគម្ហូបនេះ។ បើអ្នកទ្រាន់នឹងអាហារនៅរដូវបុណ្យភ្ជុំ ដែលមានជាតិខ្លាញ់ច្រើន តោះទៅសាកភ្លក្សប្រហុកអាំងកាត់ខ្លាញ់ម្តងមើល៍!

-អានអត្ថបទ៖ អាហារ៨ប្រភេទជួយសម្រួលការរំលាយអាហារ

គ្រាន់តែ ហែកកញ្ចប់ស្លឹកចេកចេញភ្លាម ក្លិនឈ្ងុយគ្រឿងប្រហុក និងស្លឹកក្រូចសើចហើរមកប៉ះច្រមុះអ្នកមុនគេ។ ចំណែកឯសាច់ប្រហុកវិញពណ៌លឿងស្រស់ ហើយត្រប់ពុតលំញងសម្ងំលាក់ខ្លួនពួនយកជាតិអប់ក្លិនក្នុងប្រហុក អាំងនោះតែម្ដង។ ដាក់ទឹមនឹងអន្លក់បៃតងស្រស់ខ្ចី ប្រហុកអាំងបែបស្រែកំពុងអន្ទងចិត្តអ្នកញុំា ឃើញហើយលេបទឹកមាត់មិនញុំាមិនបានទេ។

គ្រាន់តែហៀបដាក់ចូលទៅក្នុងមាត់ ក្លិនឈ្ងុយងប់ពេញច្រមុះតែម្ដង។ សាច់ប្រហុក និងសាច់ជ្រូកជញ្ជ្រំចូលជាតិគ្នាបានល្អ គ្មានឆ្អឹង មិនស្កាត ហើយរសជាតិមិនប្រៃពេក និងមិនជូរពេក។ ទំពាក្រឹបៗប៉ះនឹងគ្រាប់ក្រសាំងមួយៗ ហើយប៉ះនឹងអន្លក់ត្រួយខ្ចីស្រួយស្រឹបទៀត រឹតបង្កើនរសជាតិ និងមានអារម្មណ៍ថាកំពុងញុំាអាហារបែបស្រុកស្រែថ្មីៗ និងស្រស់អីចឹង!

-អានអត្ថបទ៖ អាហារ៦ប្រភេទស្ត្រីគួរតែទទួលទានអំឡុងពេលមានផ្ទៃពោះ

អ្នកស្រី កុក លក្ខណា ម្ចាស់តូបម្ហូបស្រែក្បែរវត្ត បានប្រាប់ឲ្យដឹងថា ប្រហុកអាំងនេះគឺប្រើប្រាប់ប្រហុកសាច់ត្រីកំភ្លាញមកពីសៀមរាប ហើយគ្មានឆ្អឹង ដែលធ្វើឲ្យអ្នកទទួលទានបានយ៉ាងជិតស្និទ្ធមិនបារម្ភរឿងស្លាក់ ឆ្អឹងឡើយ។ គាត់បានបន្តទៀតថា បើសិនចង់ឲ្យប្រហុកកាន់តែមានរសជាតិងំឈ្ងុយទៅទៀតនោះ ត្រូវខ្ចប់អាំងនឹងស្លឹករមៀត។ ដោយឡែក ប្រហុកអាំងមួយកញ្ចប់នេះមានតម្លៃ៤០០០រៀល។