មកស្គាល់ ចៅ ចិត្រ ជំនាន់ដើមសម្ដែងកន្លែងណាបាក់រោងកន្លែងហ្នឹង

2018-01-15 08:12:09
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ជា សំនៀង គឺជាតួអង្គ ចៅ ចិត្រ ផ្នែកល្ខោននិយាយដ៏ល្បីឈ្មោះមួយរូបអំឡុងឆ្នាំ១៩៨៣ នៅពេលចេញទៅសម្ដែងម្ដងៗ មិនថានៅក្រុង ឬ តាមខេត្តឡើយមានពុកម៉ែបងប្អូនមកចោមរោមគាំទ្រ និង ទស្សនាស្ទើរតែបាក់ឆាក។

បុរសចំណាស់វ័យ៦៣ ឆ្នាំរូបនេះបានមានប្រសាសន៍ថា ក្នុងឆ្នាំ១៩៧៩ លោកបានសិក្សារៀនសូត្រផ្នែកល្ខោន និយាយ នៅសាលាភូមិន្ទវិចិត្រសិល្បៈ ។ ក្រោយពីទទួលបានចំណេះដឹកនៅវិស័យដែលខ្លួនស្រឡាញ់រួចមក ក្នុងឆ្នាំ ១៩៨៣ លោកបានចេញសម្ដែងល្ខោននិយាយ ជាច្រើនរឿង។ ប៉ុន្តែរឿងដែលទទួលបានការគាំទ្រច្រើនជាងគេពីអ្នកទស្សនាគឺរឿង "កុលាបប៉ៃលិន" សម្ដែងជាតួអង្គចៅចិត្រ។ លោកថា៖" ល្ខោននិយាយខ្ញុំសម្ដែងជាតួអង្គ ចៅ ចិត្រ ហ្នឹងមានការគាំទ្រខ្លាំងណាស់ក្នុងសម័យហ្នឹង សម្ដែងនៅរោងណាបាក់រោង បាក់កៅអីកន្លែងហ្នឹងហើយ មនុស្សមកដណ្ដើមគ្នាទិញសំបុត្រចូលទស្សនាដូចទាកបាក់ទំនប់អ៊ីចឹង"។

ក្រោយមកទៀតក្នុងឆ្នាំ ១៩៩៣ លោក ជា សំនៀង ត្រូវបានផលិតកម្មទាក់ទងឲ្យសម្ដែងខ្សែភាពយន្តមួយចំនួន តែលោកមិនបានចាំចំណងជើងនោះទេ ព្រោះពេលវេលាកន្លងផុតទៅយូរឆ្នាំហើយ។ ចំណែកឯរឿងមួយចំនួនដែលលោក បានថតជាបន្តបន្ទាប់អំឡុងឆ្នាំ ២០០០ ដល់ ២០១៧ មានដូចជារឿង "ខ្មោចដើមចេកជ្វា" “ព្រាយកន្ទោងខៀវ" “ខ្មោចប្រពន្ធអាទុយ" “ហ្លួងព្រះស្ដេចកន" “ធ្មប់" និងជាច្រើនរឿងទៀត។

លោក ជា សំនៀង មានស្រុកកំណើត នៅភូមិ វត្តតាមឹម ឃុំវត្តតាមឹម ស្រុកសង្កែ ខេត្តបាត់ដំបង ។ បច្ចុប្បន្នលោកមានប្រពន្ធ និងកូន ៣ នាក់ ប្រុស២ ស្រី ១ ។ ប៉ុន្តែកូនទាំង៣ មិនមានអ្នកណាមានចំណងចំណូលចិត្តចូលប្រឡូកសិល្បៈដូចខ្លួនឡើយ៕