Lexus LS500 ស៊េរីឆ្នាំ ២០១៨ ៣ ម៉ូដែល ដាក់តម្លៃលក់ប្រជែងគ្នា

2018-01-17 10:34:48
ចំនួនមតិ 0 | ចំនួនចែករំលែក 0

ចន្លោះមិនឃើញ

នាពិព័រណ៍ Detroit Auto Show នៅសហរដ្ឋអាមេរិកក្រុមហ៊ុនប្រទេសជប៉ុន Lexus បានប្រកាសពីការចេញលក់នូវរថយន្តត្រកូល LS500 ស៊េរីឆ្នាំ២០១៨ ចំនួន ៣ ម៉ូដែលក្នុងតម្លៃខ្ពស់ទាបជាងគ្នាបន្តិចបន្តួច។ ផ្នែកតួរថយន្តស្រស់ស្អាតមិនចាញ់ត្រកូល LC អមដោយចង្កៀងរាង V ប្រភេទ LED សាកសមនឹងសំណាញ់នៃចម្រឹងដែកខាងមុខដ៏កំណាច។

ផ្នែកខាងក្នុងរថយន្តបំពាក់ដោយអេក្រង់លាតសន្ធឹង ១២.៣ អ៊ីញ ហើយម្ចាស់រថយន្តប្រណីតមួយនេះក៏ទទួលបានមុខងារថ្មីនៃកៅអីផ្លាស់ប្ដូរសីតុណ្ហភាព អាចជួយម៉ាស្សាដល់អ្នកធ្វើដំណើរតាមបែបជប៉ុនឲ្យឈ្មោះ Shiatsu ។ ជាងនេះទៅទៀតកន្លែងដាក់ជើងនៃកៅអីខាងក្រោយមានទំហំធំ ជាងម៉ូដែល LS ណាៗទាំងអស់ប្រចាំប្រវត្តិសាស្ត្រ។

បំពាក់នូវម៉ាស៊ីន V6 Turbocharger ចំណុះ ៣.៥ លីត្រ អាចផលិតកម្លាំងបាន ៤១៥ សេះខ្លាំងជាងត្រកូល LS ម៉ូដែលបច្ចុប្បន្នចំនួន ២៩ សេះ។ប្រើចង្កឹះលេខស្វ័យប្រវត្តិ ១០ វគ្គ មានល្បឿនស្ទុះពី ០ ទៅ ១០០ គ.ម/ម៉ ប្រើពេល ៤.៥ វិនាទី អមនឹងប្រព័ន្ធរត់ដោយកង់ក្រោយ។

Lexus LS ឆ្នាំ ២០១៨ នឹងមានតាំងបង្ហាញតាមបណ្ដាហាងចែកចាយក្រៅស្រុកនាដើមឆ្នាំ ២០១៨ ចាប់ពីតម្លៃ ៧៥,០០០ ដុល្លារ ម៉ូដែលធម្មតា, ប្រភេទ Hybrid (LS500h) តម្លៃ ៧៩,៥១០ ដុល្លារ និងម៉ូដែល F Sport ដែលទទួលការតុបតែងបន្ថែមមួយកម្រិតទៀត បន្សំនឹងការរត់ដោយកង់ទាំង ៤ ហើយថែមលុយពីលើនោះ ៣,២២០ ដុល្លារ។