កុំចេះតែរកស៊ីតាមគេ បើមិនដឹងវិធីការពារអាជីវកម្ម

2018-01-18 01:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្របពេលសេដ្ឋកិច្ចកំពុងរីកចម្រើននិងតម្រូវការកើនឡើង ធ្វើឲ្យអ្នកដែលមានទុនសមល្មមចាប់អារម្មណ៍ទៅលើវិស័យទទួលទាន ជាពិសេសនៅក្នុងផ្នែកចំណីអាហារ Fast Food និងភេសជ្ជៈ ដែលគេសង្កេតឃើញថា កំពុងមានសន្ទុះខ្លាំង និងធ្វើអាជីវកម្មតាមគ្នា ខណៈមានមតិខ្លះលើកឡើងថា ការរកស៊ីតាមគ្នាគឺប្រឈមហានិភ័យ។

ឆ្លើយតបទៅនឹងមតិតខាងលើរបស់និស្សិតសាកលវិទ្យាល័យកម្ពុជាកាលពីកន្លងទៅ លោក ចាង ប៊ុនលាង សហគ្រិនវ័យក្មេងកម្ពុជា និងជាស្ថាបនិកហាងកាហេ្វរបស់ខ្មែរឈ្មោះថា Brown ដែលជាហាងកាហ្វេមួយទទួលបានជោគជ័យទទួលស្គាល់ថា មិនមែនតែកម្ពុជានោះទេ ដែលធ្វើអាជីវកម្មតាមគ្នា ប្រទេសជឿនលឿនឯទៀតក៏ធ្វើដែរ។ ច្បាប់អាជីវកម្មនៅក្នុងទីផ្សារសេរី គឺមិនមានចំណុចណាដែលអាច បិទសិទ្ធិដល់អ្នកជំនួញដែលមានទុន ចាប់អារម្មណ៍លើផ្នែកណាមួយបានឡើយ។

លោក ប៊ុនលាង បន្តថា ការរកស៊ីតាមគ្នា ពិតជាប្រឈមហានិភ័យ ប៉ុន្តែក៏មានដំណោះស្រាយ សហគ្រិនត្រូវសិក្សាពីអ្វីជាចំណុចខ្លាំងនិងចំណុចខ្សោយរបស់ខ្លួន។ ត្រូវសិក្សាពីចំណុចប្រកួតប្រជែងដែលប្រឈមថាយើងមានអ្វីខ្លះក្នុងដៃហើយត្រូវខិតខំពង្រឹងនិងបំពេញចំណុចដែលខ្វះខាតនេះ។

គន្លឹះសំខាន់មួយទៀត អាជីវករត្រូវមើលពីតម្រូវការរបស់អតិថិជនថាតើពួកគាត់ចង់បានអ្វីខ្លះ និងមានទំនោរចិត្ដអ្វីខ្លះ។ ប្រសិនបើយើងអាចបំពេញនូវតម្រូវការរបស់គាត់បាន យើងមិនបាច់ព្រួយបារម្ភពីការប្រកួតប្រជែងនោះទេ។

អ្វីដែលសំខាន់ថែមទៀតនោះ ម្ចាស់អាជីវកម្មត្រូវពង្រឹងផលិតផលរបស់ខ្លួនក្នុងការរក្សានូវគុណភាពអាហារសេវាកម្មត្រូវរក្សាឲ្យល្អ។ អាហារត្រូវប្រាកដថាមានអនាម័យនិងរក្សានូវរសជាតិដើម មិនមែនលក់កាន់តែដាច់គុណភាពកាន់តែអន់នោះទេ។ ការរចនាហាង ត្រូវបង្កើតជាបរិយាកាសមួយឲ្យប្លែក ចាប់អារម្មណ៍ហើយរកភាពច្នៃប្រឌិតថ្មីៗ ដើម្បីទាក់ទាញអតិថិជនមកម្តងហើយចង់មកម្តងទៀត៕

អត្ថបទ៖ ស៊ិន សាវ៉េត