EZECOM សហការជាមួយ Microsoft ចែកចាយ Office 365 នៅកម្ពុជា

2018-01-19 08:45:57
ចំនួនមតិ 0 | ចំនួនចែករំលែក 0

ចន្លោះមិនឃើញ

EZECOM ក្រុមហ៊ុនអ៊ីនធឺណិតធំមួយនៅកម្ពុជា បានសហការជាមួយក្រុមហ៊ុនលំដាប់ពិភពលោក Microsoft កាលពីព្រឹកមិញនេះ នៅសណ្ឋាគារ Cambodiana ដើម្បីចែកចាយកម្មវិធី Office 365 ។

លោក Paul Blanche-Horgan អគ្គនាយក EZECOM បាននិយាយថា៖ "EZECOM យើងពិតជារីករាយណាស់ ដែល Microsoft បានរើសជាដៃគូយុទ្ធសាស្ត្រសំខាន់ក្នុងការចែកចាយផលិតផល និងសេវាដ៏ពិសេសនេះនៅកម្ពុជា ហើយយើងក៏បានក្លាយជាដៃគូផ្លូវការដំបូងគេនៅកម្ពុជាទៀតផង"។

លោក Paul Blanche-Horgan

Office 365 ជាបណ្ដុំកម្មវិធីការិយាល័យជាច្រើនដូចជា Word, Excel និង PowerPoint ជាដើម តែអាចឲ្យអ្នកប្រើប្រាស់វាបានគ្រប់កន្លែង និងអាចប្រើតាមទូរសព្ទដៃ ដោយសាររាល់ឯកសារទាំងអស់នឹងត្រូវរក្សាលើបណ្ដាញ Cloud ដែលងាយស្រួល និងសុវត្ថិភាពខ្ពស់ ព្រមទាំងមានប្រព័ន្ធអ៊ីម៉ែលថ្មី មុខងារផ្ញើសារ និងឆ្លើយឆ្លងតាមវីដេអូផងដែរ។

រាល់អ្នកប្រើប្រាស់ទាំងអស់ នឹងទទួលបាន ១TB សម្រាប់រក្សាទុក និងចែករំលែកឯកសារនៅលើអ៊ីនធឺណិត ហើយរាល់ឯកសារទាំងអស់ត្រូវបានការពារយ៉ាងមានសុវត្ថិភាព និងអាចស្ដារមកវិញបានស្រួល។

លោកស្រី Rena Chai អគ្គនាយកផ្នែកទីផ្សារ និងប្រតិបត្តិ Microsoft ក៏បានលើកពីចំណុចពិសេសមួយចំនួនដូចជា មិនពិបាកក្នុងការប្រើប្រាស់ សក្ដិសមសម្រាប់គ្រប់ក្រុមហ៊ុនមិនថាមានបុគ្គលិកតិច ឬច្រើនក្ដី អាចប្រើប្រាស់តាមទូរសព្ទបាន សុវត្ថិភាព និងអាចប្រើពេលគ្មានអ៊ីនធឺណិត។

EZECOM បង្កើតក្នុងឆ្នាំ២០០៧ ជាក្រុមហ៊ុនផ្គត់ផ្គង់សេវាកម្មគមនាគមន៍ដូចជា សេវាអ៊ីនធឺណិតតាមខ្សែអុបទិក ដំណោះស្រាយប្រព័ន្ធអ៊ីនធឺណិតតាមសហគ្រាស សេវា Cloud សេវាការពារការវាយប្រហារលើអ៊ីនធឺណិត និងសេវាជាច្រើនទៀត៕