អ៊ឹង បូរ៉ា នៅតែល្អស្នៀតជើង ទាត់ដៃគូឲ្យសន្លប់ទឹក២ម្សិលមិញនៅTV5

2018-01-21 01:41:20
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកលេងគុនខ្មែរទើបវិលចូលសង្វៀនវិញ អ៊ឹង បូរ៉ា នៅតែល្អស្នៀតទាត់ដូចកាលពីមុន។ ជាក់ស្ដែងល្ងាចម្សិលមិញនេះ រូបគេបានទាត់ផ្កាប់ចានកីឡាករ ឡូញ វ៉ាន់ឌី ឲ្យសន្លប់ក្នុងទឹកទី២។ ទោះជាបាត់មុខពីសង្វៀនប្រហែល៣ឆ្នាំមែន ប៉ុន្តែកីឡាកររូបនេះ នៅតែបង្ហាញស្នៀតដ៏ល្អរបស់ខ្លួននាថ្ងៃបើកឆាកពានរង្វាន់ TV5 Knock Out Series By Kcement រជ្ជកាលទី២នេះ។

កីឡាករ អ៊ឹង បូរ៉ា ក្រហម

ទឹកទី១ភ្លាមកីឡាករទាំងពីរមិនបានស្ទាបស្ទង់យូរនោះទេ ព្រោះប្រកួតតែ៣ទឹក ពោលគឺចាប់ផ្ដើមចេញអាវុធរៀងៗខ្លួនតែម្ដង មានទាំងកណ្ដាប់ដៃ វ៉ៃទៅវ៉ៃមក និងស្នៀតជើងក៏ចេញបណ្ដើរៗផងដែរ។

ធ្វើដំណើរដល់ទឹកទី២ អ៊ឹង បូរ៉ា ម៉ាត់មួយៗផង និងទាត់ជើងក្រោមរបស់ ឡូញ វ៉ាន់ឌី ជាច្រើនស្ទើរតែចាញ់ម្ដង់ៗដោយសារទម្ងន់ជើងនេះទៅហើយ ប៉ុន្តែការប្រកួតនៅតែអាចបន្តទៀតបាន។ ពាក់កណ្ដាលទឹកទី២ ពួកគេចាប់ផ្ដើមទាត់ប្ដូរគ្នា ខណៈពេលនោះ ឡូញ វ៉ាន់ឌី ប្រើជើងស្ដាំទាត់ក្រោម ស្របពេលដែល បូរ៉ា ប្រើជើងស្ដាំដូចគ្នា ប៉ុន្តែគេទាត់លើ ហើយដល់មុន ធ្វើឲ្យដៃគូសន្លប់ត្រឹមនេះមិនអាចបន្តការប្រកួតតែម្ដង។

កីឡាករ ឡូញ វ៉ាន់ឌី ពេលសន្លប់

កីឡាករ អ៊ឹង បូរ៉ា

អ៊ឹង បូរ៉ា និង ម៉ន រដ្ឋា ទទួលបានជ័យជម្នះដូចគ្នា ឡើងទៅវគ្គទី២(១៦នាក់)បន្តទៀត នាថ្ងៃបើកឆាកពានរង្វាន់ TV5 Knock Out Series By Kcement រជ្ចកាទី២ ដែលទើបចាប់ផ្ដើមនៅល្ងាចថ្ងៃទី២០ ខែមករា ២០១៨ នេះ៕

អត្ថបទ៖ នួន ស៊ីណា