ហាងមួយនៅថៃ លក់សេះសមុទ្រអាំង ធ្វើឲ្យអ្នកលេងបណ្តាញសង្គមផ្ទុះកំហឹងខ្លាំង

2018-01-24 03:11:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ហាងមួយកន្លែងដែលលក់អាហារសម្រន់សមុទ្រ សម្រាប់អ្នកទេសចរនៅផ្សារអណ្ដែតទឹក ក្នុងទីក្រុង Pattaya ប្រទេសថៃ ត្រូវបានបិទដោយបង្ខំ បន្ទាប់ពីមានការបង្ហោះរូបសេះសមុទ្រអាំងលើបណ្ដាញសង្គមហ្វេសប៊ុក សួរនាំអំពីភាពស្របច្បាប់នៃការលក់នោះ។

កាលពីថ្ងៃទី២២ កន្លងទៅនេះ អ្នកប្រើបណ្ដាញសង្គមជនជាតិថៃម្នាក់ បានថតរូបសេះសមុទ្រអាំងនោះ រួចបង្ហោះទៅលើបណ្ដាញសង្គមហ្វេសប៊ុក ដោយសួរគេថា ការលក់សត្វសេះសមុទ្រធ្វើជាអាហារបែបនេះ ស្របច្បាប់ ឬក៏អត់ ព្រោះពួកវាត្រូវបានគេចាត់ទុកថាជាសត្វសមុទ្រ ដែលកំពុងទទួលរងការគំរាមកំហែង។

គួរបញ្ជាក់ថា សត្វសេះសមុទ្រអាំងមួយក្បាល ត្រូវបានគេលក់ក្នុងតម្លៃ ១៥០បាត ឬ ៤,៧០ដុល្លារ ខណៈវាគឺជាសត្វដែលទទួលបានការការពារដោយ CITES (អនុសញ្ញាស្តីអំពីពាណិជ្ជកម្មអន្តរជាតិលើប្រភេទសត្វដែលជិតផុតពូជ)។

យោងតាមលោក Umaporn Pimonbut អនុប្រធាននាយកដ្ឋានជលផល បានឲ្យដឹងថា ដោយសារតែសេះសមុទ្រមិនត្រូវបានការពារដោយច្បាប់របស់ប្រទេសថៃ ទើបធ្វើឲ្យមានការលក់វាជាអាហារស្របច្បាប់ក្នុងស្រុក។

ប្រព័ន្ធផ្សព្វផ្សាយក្នុងស្រុកបានរាយការណ៍ថា សេះសមុទ្រមានប្រជាប្រិយភាពក្នុងចំណោមអ្នកទេសចរចិននៅរមណីយដ្ឋានខាងលើ ដូចនៅចិនដីគោកអីចឹង ដោយការបរិភោគសត្វសេះសមុទ្រ ត្រូវបានគេជឿជាក់ថា នឹងបង្កើនអានុភាពផ្លូវភេទ ហើយត្រូវគេយកទៅធ្វើជាថ្នាំដើម្បីព្យាបាលជំងឺហឺត និងការគេងមិនលក់៕

ចុចអាន៖

ប្រភព៖ Coconut ប្រែសម្រួល៖ សេង ឡុង