អ៊ឹង បូរ៉ា ឡើងសង្វៀនបច្ចុប្បន្នមិនចេះខ្លាចផ្លែសម្លាប់គេទេ ប៉ុន្តែបារម្ភរឿងមួយ

2018-01-25 02:01:26
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់ជើងខ្លាំងកាលពី ៣-៤ឆ្នាំមុន អ៊ឹង បូរ៉ា ថា ការវិលចូលប្រឡូកគុនខ្មែរជាថ្មីនេះ មិនដែលចេះខ្លាចផ្លែរបស់ដៃគូប្រកួតនោះទេ បើទោះជាបច្ចុប្បន្នទម្ងន់ ៥៧គីឡូក្រាម មានជើងខ្លាំងសំបូរស្នៀតប្រយុទ្ធច្រើនដូចនេះក្ដី។

កីឡាករ អ៊ឹង បូរ៉ា

អ៊ឹង បូរ៉ា បានឲ្យដឹងថា សព្វថ្ងៃនេះអ្នកប្រដាល់ក្មេងៗស្រករក្រោយមានច្រើនមែនទែន មិនថាប្រភេទទម្ងន់ណានោះទេ ចំណែកស្នៀតប្រយុទ្ធក៏ល្អផងដែរ។ ទាក់ទិននិងការប្រកួតវគ្គ១៦នាក់ចុងក្រោយពានរង្វាន់ TV5 នៅពេលខាងមុខដែលត្រូវប៉ះសិស្សប្អូនជំនាន់ក្រោយ ម៉ន រដ្ឋា នោះ កីឡាករខាងលើបន្ថែមថា មិនខ្លាចស្នៀតទាត់ ឬផ្លែអ្វីផ្សេងនោះទេ ប៉ុន្តែបារម្ភទៅលើកម្លាំងវិញទេ។

កីឡាករ អ៊ឹង បូរ៉ា ពេលប្រកួតនៅ TV5

អ្នកលេងគុនខ្មែរខាងលើបន្តថា បើគិតពីអាយុមែនទែនជាង៣០ឆ្នាំទៅហើយ ដូច្នេះកម្លាំងក៏ធ្លាក់ចុះទៅតាមវ័យផងដែរ បើប្រៀបធៀបជាមួយក្មេងៗនោះអាចនឹងចាញ់កម្លាំង ប៉ុន្តែស្នៀតប្រយុទ្ធនិងទឹកចិត្តមិនខុសគ្នានោះទេ។ បូរ៉ា ថានឹងខំប្រឹងប្រែងហ្វឹកហាត់ឲ្យខ្លាំងដើម្បីបន្តអាជីពមួយនេះ ជាពិសេសការប្រកួតក្នុងកម្មវិធីដណ្ដើមពានរង្វាន់ TV5។

កីឡាករ អ៊ឹង បូរ៉ា ពេលឈ្នះពាននៅ CNC

អ៊ឹង បូរ៉ា ពេលឈ្នះជុំដំបូងនៅ TV5

ក្រោយបាត់មុខរយៈពេល ៣-៤ឆ្នាំ កន្លងទៅនេះ អ្នកប្រដាល់ល្អស្នៀតទាត់ អ៊ឹង បូរ៉ា លេចមុខជាថ្មីនៅចុងឆ្នាំ២០១៧ ថែមទាំងឈ្នះពានរង្វាន់នៅសង្វៀន CNC ផងដែរ។ ឥលូវក៏ជាបេក្ខភាពម្នាក់ដែលជាប់ទៅវគ្គ១៦នាក់ ពានរង្វាន់ TV5 ផងដែរ បន្ទាប់ពីផ្ដួល ឡូញ វ៉ាន់ឌី ឲ្យសន្លប់នៅទឹកទី២ នាថ្ងៃសៅរ៍សប្ដាហ៍មុននេះ៕

អត្ថបទ៖ នួន ស៊ីណា