ម្ចាស់ជើងឯក Tiger Street មណ្ឌលទី២ កីឡាករអាយុច្រើនមែន តែបច្ចេកទេសលេងមិនធម្មតា

2018-01-30 01:59:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានក្រុមបាល់ទាត់ ABA (A) ថា ការឈ្នះជើងឯក Tiger Street Football Festival 2018 នៅមណ្ឌលទី២ ខេត្តកំពង់ស្ពឺ ថ្ងៃអាទិត្យ កន្លងទៅនេះជាប្រវត្តិសាស្ត្ររបស់ក្រុមពួកគេ ព្រោះមិនដែលបានចូលរួមលេងជាមួយគ្នាក្នុងព្រឹត្តិការណ៍ធំបែបនេះទេ។

ក្រុម ABA(A) ពេលឈ្នះជើងឯក

លោក អូ សាំហុាំង ប្រធានក្រុម ABA (A) បានឲ្យដឹងថា ក្រុមទាំងមូលមានចិត្តសប្បាយរីករាយជាខ្លាំងដែលបានឈ្នះជើងឯកនៅមណ្ឌលទី២នេះ ព្រោះត្រូវឆ្លងឧបសគ្គច្រើនមែនទែនទម្រាំឈ្នះដូចនេះ។ ពួកគេត្រូវលេងរហូតដល់ទៅ៥ប្រកួតទើបឈ្នះជើងឯក ខណៈការប្រកួតត្រូវបន្តរហូត និងបានសម្រាកត្រឹមកន្លះម៉ោង ឬមួយម៉ោងប៉ុណ្ណោះប្រកួតទៀតហើយ។

ទោះមានឧបសគ្គច្រើនដូចនេះក្ដី ប៉ុន្តែដោយការសហការគ្នាបានល្អ ចេះស្ដាប់គ្នា និងលេងយល់ចិត្តគ្នាផងនោះ ទើបសម្រេចបានលទ្ធផលល្អដូចនេះ។ ជ័យជម្នះខាងលើនេះចាត់ទុកជាប្រវត្តិតែម្ដង ព្រោះពួកគេមិនដែលបានបង្កើតជាក្រុមលេងពានរង្វាន់ធំៗដូចនេះពីមុនមកឡើយ។

ទិដ្ឋភាពពេលប្រកួត

សម្រាប់ការត្រៀមខ្លួនឡើងទៅវគ្គផ្ដាច់ព្រ័ត្រ Tiger Street Football Festival 2018 ខែមិនា ខាងមុខនៅរាជធានីភ្នំពេញនោះ ម្ចាស់ជើងឯកខាងលើក៏បារម្ភពីបញ្ហាកម្លាំងផងដែរ ព្រោះកីឡាករភាគច្រើនមានអាយុច្រើនទៅហើយ ខណៈពួកគេគឺជាអ្នកធ្វើការមិនជាអ្នកលេងបាល់ច្រើនដូចក្រុមដទៃនោះទេ ប៉ុន្តែនឹងខំប្រឹងព្យាយាមតាមដែលអាចធ្វើទៅបាន។

ផ្លាកប្រាក់រង្វាន់ក្រុមនិមួយៗ

ការប្រកួតជម្រុះពានរង្វាន់ Tiger Street Football Festival 2018 មណ្ឌលទី២ខេត្តកំពង់ស្ពឺបានបញ្ចប់ទៅហើយ កាលពីថ្ងៃអាទិត្យ ទី២៨ មករា ២០១៨នេះ ដោយក្រុមលេខ១ បានទៅលើ ABA(A) ក្រុមលេ២ បានទៅលើ Vitou MK និងលេខ៣ បានទៅលើក្រុម Black Lion ហើយក្រុមទាំងនេះនឹងបន្តទៅវគ្គផ្ដាច់នៅភ្នំពេញខែមិនាទៀត៕