តែប៉ុណ្ណេះជិះខ្ជិលបាត់! រថភ្លើង៣គ្រឿង កប៉ាល់២គ្រឿង ដឹកមកដល់កម្ពុជាមុនចូលឆ្នាំ

2018-02-01 04:25:14
ចំនួនមតិ 0 | ចំនួនចែករំលែក 0

ចន្លោះមិនឃើញ

មន្ត្រីជាន់ខ្ពស់នៃក្រសួងសាធារណការ និងដឹកជញ្ជូន បានបញ្ជាក់កាលពីពេលថ្មីៗនេះថា រទេះភ្លើងធុនស្រាលចំនួន ៣គ្រឿង គ្រោងនឹងដំណើរការក្នុងពេលឆាប់ៗនោះ កំពុងដឹកមកកម្ពុជា ស្របគ្នានឹងកប៉ាល់ចំនួន ២គ្រឿងទៀត ក៏នឹងមកដល់មុនចូលឆ្នាំខ្មែរផងដែរ។

ឯកឧត្តម ស៊ុន ចាន់ថុលទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូនឲ្យដឹងថា រថភ្លើងធុនស្រាល៣គ្រឿងកំពុងដំឡើងនឹងរួចរាល់នៅថ្ងៃទី ២៨ ខែកុម្ភៈនេះ ហើយត្រូវចេញដំណើរពីប្រទេសមិចស៊ីកូ យ៉ាងយូរបំផុតដាច់ ខែមីនា នឹងធ្វើដំណើរមកដល់ប្រទេសកម្ពុជាហើយ។ រីឯការស្ថាបនា ឯកឧត្តមបញ្ជាក់ថា បច្ចុប្បន្នកំពុងតភ្ជាប់ផ្លូវដែកទៅព្រលានយន្តហោះ ទន្ទឹមនឹងក្រុមការងារបច្ចេកទេសតែងសម្រុកធ្វើនៅពេលយប់ជារៀងរាល់ថ្ងៃ ដើម្បីកុំឲ្យមានផលរំខានដល់ការធ្វើដំណើររបស់បងប្អូនប្រជាពលរដ្ឋ។

(ឯកឧត្តម ស៊ុន ចាន់ថុលទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន)

ឯកឧត្ដម ស៊ុន ចាន់ថុល បញ្ជាក់ច្បាស់ថា រឿងសម្ពោធដាក់ឲ្យប្រើប្រាស់រទេះភ្លើងដឹកអ្នកដំណើរ ពីស្ថានីយទៅព្រលានយន្តហោះអន្តរជាតិភ្នំពេញ គឺប្រាកដ១០០% មិនមានការប្រែប្រួលឡើយ។

ដោយឡែកចំពោះគម្រោង កាណូតដឹកអ្នកដំណើរពី ព្រែកព្នៅ-ភ្នំពេញ-តាខ្មៅ ក៏ត្រៀមសម្ពោធមុនចូលឆ្នាំខ្មែរដូចគ្នា រដ្ឋមន្រ្តីក្រសួងសាធារណការ និងដឹកជញ្ជូន បានប្រកាសកាលពីព្រឹកថ្ងៃទី៣០មករានេះថា កប៉ាល់ ២គ្រឿង ដែលក្រសួងសាធារណការ បានកម្មង់ទិញ សម្រាប់សេវាដឹកជញ្ជូនអ្នកដំណើរតាមផ្លូវទឹក នៅរាជធានីភ្នំពេញ នឹងមកដល់ប្រទេសកម្ពុជា មុនពិធីបុណ្យចូលឆ្នាំថ្មីប្រពៃណីជាតិ នៅខែមេសាខាងមុខដូចគ្នា។

ស្របគ្នានេះ គម្រោងនឹងដំណើរការជាផ្លូវការនូវសេវាដឹកជញ្ជូនអ្នកដំណើរតាមផ្លូវទឹក នៅរាជធានីភ្នំពេញនៅកំពង់ផែចំនួន ១៥កន្លែង ក្នុងនោះមាននៅក្នុងភូមិសាស្រ្តរាជធានីភ្នំពេញ ចំនួន១៣ ទីតាំង និងខេត្តកណ្តាល ចំនួន ២ទីតាំង៕

ចុចអានបន្ថែម៖

អត្ថបទ៖ ស៊ិន សាវ៉េត