តួរឿង "Fifty Shade” ឆ្លើយតបនឹងសំនួរអ្នកគាំទ្រ ថារឿងថ្មីនឹងមានឈុតក្ដៅសាច់ច្រើនឫអត់

2018-02-01 06:57:56
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង Jamie Dornan ដែលប្រិយមិត្តជាច្រើនស្គាល់តាមរយៈការសម្ដែងជាតួ Christian Grey នៅក្នុងស៊េរីរឿង "Fifty Shade” បានបង្ហាញខ្លួននៅក្នុងកម្មវិធី Ellen DeGeneres Show កាលពីម្សិលមិញនេះដោយបានលើកឡើងពីរឿងអស់សំណើចជាច្រើន។

តារាសម្ដែង Jamie Dornan

ក្នុងឱកាសនោះ Ellen បាននិយាយបែបកំប្លែងពីបទពិសោធន៍មួយ ពេលនាងកំពុងតែមើលរឿង "Fifty Shade of Grey” ចំឈុតឆាករោលរាល ហើយស្រាប់តែចុងភៅរបស់នាងដើរកាត់។ ពេលនោះ Ellen និយាយថាប្រហែលជាចុងភៅគិតថានាងកំពុងតែមើលភាពយន្តអាសអាភាសហើយ ព្រមទាំងនិយាយថា ចុងភៅម្នាក់នោះដើរកាត់បន្ទប់នាងចំពេលដែលនាងមិនចង់ឲ្យដើរកាត់តែម្ដង និយាយទៅគឺពិតជាគួរឲ្យអស់សំណើចណាស់។

Jamie Dornan នៅក្នុងកម្មវិធី Ellen Show

ប៉ុន្តែអ្វីដែលគួរឲ្យចាប់អារម្មណ៍បំផុតពីការសម្ភាសន៍នោះគឺពេល Jamie លើកឡើងពីមតិរបស់អ្នកគាំទ្រស៊េរីរឿង "Fifty Shade” ជាច្រើនរូបសាកសួរលោកថាតើភាពយន្តវគ្គថ្មីនេះនឹងមានឈុតឆាកក្ដៅសាច់ច្រើនជាងមុនឫអត់។ តារារូបនេះបាននិយាយទាំងអស់សំណើចថា ឈុតឆាកក្ដៅសាច់វាពិតជាមាន ប៉ុន្តែលោកមិនបានកំណត់ម៉ោងថា ឈុតឆាកទាំងនោះមានរយៈពេលវែងជាង ឫច្រើនឈុតជាងវគ្គមុនៗនោះទេ ប៉ុន្តែវាមានឈុតឆាកជាច្រើនគួរឲ្យចាប់អារម្មណ៍ជាជាងឈុតក្ដៅសាច់។

Jamie បានចាបផ្ដើមសម្ដែងក្នុងស៊េរីរឿងនេះ តាំងពីឆ្នាំ ២០១៥ មកម្ល៉េះ។ ចំណុចមួយដែលមនុស្សភាគច្រើនមិនបានដឹងនោះគឺ ភរិយារបស់លោកមិនដែលបានមើលភាពយន្តនេះទេ ព្រោះវាហួសហេតុពេក ឫក៏អាចថាមិនចង់ឃើញស្វាមីខ្លួនស្និទ្ធស្នាលជាមួយនារីផ្សេង៕