តោះមកដឹង ថាតើកាតក្រហមក្នុងពិភពបាល់ទាត់មានប្រវត្តិយ៉ាងដូចម្តេច?
- 2018-02-03 08:08:48
- ចំនួនមតិ 0 | ចំនួនចែករំលែក 0
តោះមកដឹង ថាតើកាតក្រហមក្នុងពិភពបាល់ទាត់មានប្រវត្តិយ៉ាងដូចម្តេច?
ចន្លោះមិនឃើញ
វីដេអូជំនួយអាជ្ញាកណ្តាល (VAR) ត្រូវបានប្រើប្រាស់ក្នុងការជួយសម្រេចចិត្តមួយចំនួនជួសអាជ្ញាកណ្តាលនៅលើទីលាន គឺជារឿងគួរចាប់អារម្មណ៍នៅពេលនេះ។ ប៉ុន្តែនៅទសវត្សរ៍ទី៧០ រឿងរ៉ាវដ៏គួរឲ្យចាប់អារម្មណ៍ពេលនោះ គឺជុំវិញប្រវត្តិកាតក្រហម ដែលត្រូវបានបង្កើតឡើងតាមគំនិតរបស់អាជ្ញាកណ្ដាលម្នាក់។ នេះបើតាម The Sun។
កីឡាករបាល់ទាត់ដំបូងគេ នៅប្រទេសអង់គ្លេសដែលទទួលបានកាតក្រហម គឺខ្សែបម្រើស្លាប David Wagstaffe របស់ក្រុម Blackburn Rovers នៅក្នុងឆ្នាំ ១៩៧៦។ ប៉ុន្តែកីឡាករដំបូងគេដែលត្រូវបណ្តេញចេញពីទីលាន បានកើតឡើងមុននោះទៅទៀត ពោលគឺតាំងពី១០ឆ្នាំមុនម្ល៉េះនៅក្នុងព្រឹត្តិការណ៍ World Cup ឆ្នាំ ១៩៦៦ នៅពេលដែលការប្រកួតដ៏ក្តៅគគុកក្នុងវគ្គពាក់កណ្តាលផ្តាច់ព្រ័ត្ររវាង អង់គ្លេស និងអាហ្សង់ទីន។
កាលណោះ កីឡាករ Antonio Rattin របស់អាហ្សង់ទីន ត្រូវបានអាជ្ញាកណ្តាលអាឡឺម៉ង់ លោក Rudolf Kreitlein បណ្តេញចេញ ព្រោះច្រលំថាបានប្រព្រឹត្តកំហុស។ ដូច្នេះហើយ Rattin ប្រកែកមិនព្រមចេញ ដែលបានធ្វើឲ្យអាជ្ញាកណ្តាល ខឹងសម្បារ ហើយលោកបានទៅនិយាយជាមួយកាពីតែនក្រុមរបស់ អាហ្សង់ទីន ធ្វើយ៉ាងណាត្រូវតែឲ្យ Rattin ចេញពីទីលាន។
ឆ្លងតាមបទពិសោធន៍ជូរចត់ខាងលើ លោកអាជ្ញាកណ្តាលសញ្ជាតិអង់គ្លេស Ken Aston មានគំនិតមួយកុំឲ្យកំហុសច្រំដែលដូចនេះកើតឡើងទៀត។ ថ្ងៃមួយពេលកំពុងធ្វើដំណើរ ឡានរបស់លោកបានជាប់ស្តុប លោកក៏មានគំនិតបង្កើតកាតក្រហម កាតលឿងដោយយកតាមភ្លើងសញ្ញាចរាចរណ៍។ កាតលឿង ទុកដូចជាការព្រមាន ខណៈកាតក្រហម គឺបញ្ឈប់កីឡាករ ប្រៀបដូចនឹងភ្លើងលឿង ដែលឲ្យអ្នកបើកបរប្រុងប្រយ័ត្ន ហើយភ្លើងក្រហមអ្នកត្រូវតែឈប់។
ហេតុដូច្នេះកាតលឿង កាតក្រហម ត្រូវបានណែនាំឲ្យប្រើដំបូងនៅព្រឹត្តិការណ៍ World Cup ក្នុងឆ្នាំ ១៩៧០ នៅប្រទេសម៉ិកស៊ិចកូ៕