នឹម នន មិននឹកស្មានថាខ្លួនឯងអាចយកឈ្នះម្ចាស់មេដាយសំរឹទ្ធ ស៊ីហ្គេម ដោយសន្លប់ដូចនេះទេ

2018-02-05 08:28:27
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់ នឹម នន មកពីក្លឹបឆត្រយោង ៩១១ មិននឹកស្មានថាខ្លួនឯង ផ្ដួលម្ចាស់មេដាយសំរឹទ្ធស៊ីហ្គេម ២០១៧ ឲ្យសន្លប់ដូចនេះទេ ព្រោះដៃគូមានកម្ពស់ខ្ពស់ និងមានបទពិសោធច្រើនមិនថាប្រកួតខ្មែរគ្នាឯង ឬមិត្តភាពអន្តរជាតិនោះទេ។

កីឡាករ នឹម នន

បើតាមការឲ្យដឹងពី នឹម នន ថា មុនពេលប៉ះគ្នារូបគេសង្ឃឹមត្រឹម ៥០% ប៉ុណ្ណោះ ព្រោះដៃគូជាអ្នកប្រដាល់ជើងខ្លាំងម្នាក់ និងជាម្ចាស់មេដាយសំរឹទ្ធស៊ីហ្គេមទៀតផង ហើយណាមួយទៀតនោះកម្ពស់ក៏ខ្ពស់ជាងខ្លួនទៅទៀត។

ទោះមិនសូវសង្ឃឹមឈ្នះច្រើនមែន តែសិស្សប្អូនរបស់ ឡៅ ចន្រ្ទា រូបនេះ បានខំប្រឹងប្រែងហ្វឹកហាត់ខ្លាំង និងជាប់លាប់រហូតដល់ពេលប្រកួតតែម្ដង។ អ្នកប្រដាល់គុនខ្មែរខាងលើតាំងចិត្តថា បើឡើងប្រកួតហើយ ត្រូវតែខំប្រឹងឲ្យអស់ពីសមត្ថភាព មិនថាដៃគូខ្លាំងប៉ុណ្ណានោះឡើយ។

សុខ ទូ ពេលបោះបង់ការប្រកួត

កូនសិស្សលោកគ្រូ ហង្ស សឺន ម្នាក់បន្តថា មូលហេតុឈ្នះ សុខ ទូ នៅទឹកទី៣នេះ គឺដោយសារតែដៃគូភ្លាត់ឲ្យខ្លួនទាត់ចូលជើងក្រោម ហើយក៏ដឹងថាឈឺជើងក៏ព្យាយាមតាមទាត់រហូតដល់គេមិនអាចបន្តការប្រកួតតែម្ដង។ មុនពេលប្រកួតរូបគេក៏បានគិតដែរថា បើប៉ះដៃគូខ្ពស់ដូចនេះ មានតែទាត់ជើងទេបានអាចទៅរួច ព្រោះបើចូលវ៉ៃ ក៏វ៉ៃមិនដល់គេដែរ។

កីឡាករ នឹម នន ពេលឈ្នះ សុខ ទូ

នឹម នន ជាអ្នកបេក្ខភាពម្នាក់ទៀតហើយ ដែលអាចឡើងទៅវគ្គ១៦នាក់ចុងក្រោយ នៃពានរង្វាន់ TV5 knock Out Series By Kcement រជ្ជកាលទី២នេះ បន្ទាប់ពីផ្ដួលម្ចាស់មេដាយសំរឹទ្ធស៊ីហ្គេម សុខ ទូ ឲ្យខូចជើងនៅទឹកទី៣ កាលពីល្ងាចថ្ងៃសៅរ៍ ទី៣ កុម្ភៈ កន្លងទៅនេះ៕