Lana Del Rey ប្រាប់អ្នកគាំទ្រថាខ្លួនមិនអីទេ ក្រោយមានអ្នកប៉ុនប៉ងចាប់ខ្លួន

2018-02-05 09:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីថ្ងៃអាទិត្យម្សិលមិញនេះ តារាចម្រៀងចូលចិត្តច្រៀងបទលន្លង់លន្លោច Lana Del Rey បានប្រកាសប្រាប់អ្នកគាំទ្រ ថាខ្លួនមិនមានបញ្ហាអ្វីនោះទេ បន្ទាប់មានព័ត៌មានទាក់ទងនឹងបុរសវ័យ ៤៣ឆ្នាំម្នាក់ឈ្មោះ Michael Hunt ប៉ុនប៉ងចាប់ជំរិតនាង។

Lana Del rey

ម្ចាស់បទ "Summertime Sadness” រូបនេះបានសរសេរលើបណ្ដាញសង្គម Twitter ថា៖ "សួស្ដី! ក្មេងៗទាំងអស់គ្នា។ ពេលនេះខ្ញុំអត់អីទេ ហើយអរគុណចំពោះសាររំលែកទុក្ខ។ ស្អែកនេះខ្ញុំនឹងទៅសម្ដែងនៅ Hotlanta (រដ្ឋអាត្លង់តា) ហើយពិតជាចង់ជួបអ្នកទាំងអស់គ្នាឆាប់ៗ។"

សារដែល Lana បង្ហោះលើបណ្ដាញសង្គម Twitter

ជនដែលប៉ុនប៉ងចាប់ជំរិត តារារូបនេះត្រូវបានគេចាប់បាន នៅទីក្រុង Orlando រដ្ឋ ហ្លរីដារ ក្នុងរយៈពេលខ្លីមួយ ក្រោយតារាវ័យ ៣២ឆ្នាំរូបនេះ ឡើងឆាកសម្ដែងនៅលើឆាក Amway Center ក្នុងទីក្រុងដដែលកាលពីរាត្រីថ្ងៃសុក្រ។ Lana កំពុងតែស្ថិតនៅក្នុងការប្រគំតន្ត្រីទេសចរណ៍ "LA To The Moon” ដែលតម្រូវឲ្យនាងសម្ដែងម្ដងទៀតនៅថ្ងៃច័ន្ទ នៅទីក្រុង អាត្លង់តា រដ្ឋ Georgia។

ខណៈពេលនោះដែរ បុរសវ័យ ៤៣ឆ្នាំរូបនោះត្រូវបានគេចាប់និងឃុំខ្លួនទុកនៅក្នុង មន្ទីរឃុំឃាំងកាលពីថ្ងៃអាទិត្យ។ បុរសរូបនេះបាន បញ្ជាក់ប្រាប់ប៉ូលិសថា ខ្លួនពិតជាឈ្លក់វង្វេងនឹងតារារូបនេះខ្លាំង ហើយគ្មានអ្វីអាចធ្វើឲ្យលោកផ្លាស់ប្ដូរចិត្តបានឡើយ៕