ទីក្រុងហាណូយ គ្រោងចុះឈ្មោះឲ្យសត្វឆ្កែ និងឆ្មា ក្រោមហេតុផលមួយ

2018-02-06 02:31:58
ចំនួនមតិ 0 | ចំនួនចែករំលែក 0

ចន្លោះមិនឃើញ

អាជ្ញាធរនៅទីក្រុងហាណូយ ប្រទេសវៀតណាម បានដាក់ចេញនូវផែនការទប់ស្កាត់ជំងឺថ្មីក្នុងចំណោមបទបញ្ញត្តិផ្សេងទៀត ដែលតម្រូវឲ្យអ្នកស្រុកចុះឈ្មោះសត្វឆ្កែ និងឆ្មារបស់ខ្លួនជាមួយមន្ត្រី។

គម្រោងនេះគឺជាផ្នែកមួយនៃយុទ្ធនាការជាតិដើម្បីគ្រប់គ្រង និងលុបបំបាត់ជំងឺឆ្លងសត្វក្នុងអំឡុងឆ្នាំ ២០១៨-២០២១។ ដូច្នោះហើយប្រជាពលរដ្ឋដែលជាម្ចាស់ឆ្កែ និងឆ្មា ត្រូវតែចុះឈ្មោះសត្វជាមួយអាជ្ញាធរមូលដ្ឋាន ដែលនឹងទទួលខុសត្រូវក្នុងការរក្សាកំណត់ត្រាសត្វចិញ្ចឹមទាំងអស់ នៅក្នុងសិទ្ធិអំណាចរបស់ពួកគេ។

សត្វឆ្កែដែលបានម្ចាស់នាំយកទៅខាងក្រៅ ត្រូវតែមានមនុស្សម្នាក់ដើរអមជាមួយ ហើយអាចពាក់ប្រដាប់ឃ្លុំមាត់ ឬត្រូវប្រើខ្សែ ដើម្បីសុវត្ថិភាពរបស់អ្នកដទៃ។ នេះបើយោងតាមគ្រោងការណ៍ខាងលើ។

ជាមួយគ្នានេះដែរ ម្ចាស់សត្វឆ្កែត្រូវចំណាយសម្រាប់ការដែលមិនបានមើលថែរក្សាសត្វឆ្កែរបស់ខ្លួននៅទីសាធារណៈ រួមទាំងចំណាយលើការដែលសត្វរបស់ពួកគេ ត្រូវបានឃាត់ទុក ចិញ្ចឹម ឬ ដុតសម្លាប់ចោលប្រសិនបើចាំបាច់។ មិនតែប៉ុណ្ណោះ ម្ចាស់ក៏ត្រូវតម្រូវឲ្យចំណាយលើថ្លៃថ្នាំពេទ្យ និងសំណងសម្រាប់អ្នករងគ្រោះដោយសត្វឆ្កែដែលមិនបានថែទាំផងដែរ។

លើសពីនេះទៅទៀត ការចាក់វ៉ាក់សាំងលើសត្វចិញ្ចឹមជាទៀងទាត់ ក៏ត្រូវស្ថិតនៅក្រោមគ្រោងការណ៍ថ្មីនោះផងដែរ ហើយម្ចាស់សត្វនឹងត្រូវទទួលពិន័យ ប្រសិនបើមិនយកសត្វឆ្កែ និង ឆ្មារបស់ខ្លួនទៅចាក់វ៉ាក់សាំង តាមការវិភាគដែលបានណែនាំ។

យ៉ាងណាមិញ ការពិភាក្សាវែកញែកបានរីករាលដាលយ៉ាងខ្លាំងក្លា នៅលើប្រព័ន្ធផ្សព្វផ្សាយ និងនៅតាមបណ្ដាញអ៊ីនធឺណិត នៅក្នុងប្រទេសវៀតណាម ស្ដីអំពីការថែរក្សាសត្វឆ្កែដោយប្រើខ្សែ ឬប្រដាប់ឃ្លុំមាត់សត្វនៅកន្លែងសាធារណៈ និងការហាមប្រាមមិនឲ្យឆ្កែដែលម្ចាស់មើលថែ ឬឆ្កែអនាថាដើរតាមផ្លូវ។

គួររំលឹកឲ្យដឹងថា ចាប់តាំងពីខែកញ្ញាឆ្នាំមុន ប្រជាជននៅទីក្រុងហូជីមិញ នឹងប្រឈមការផាកពិន័យរហូតដល់ទៅ ៨០០ ០០០ ដុង (ប្រហែល ៣៥ ដុល្លារអាមេរិក) សម្រាប់ការអនុញ្ញាតឲ្យសត្វឆ្កែរបស់ពួកគេរត់នៅតាមដងផ្លូវ៕

ចុចអាន៖

ប្រភព៖ tuoitrenews ប្រែសម្រួល៖ សេង ឡុង