ឃាត់ខ្លួនមហាសេដ្ឋីផ្នែកសំណង់ថៃ ក្រោយបរបាញ់សត្វខុសច្បាប់

2018-02-06 08:55:17
ចំនួនមតិ 0 | ចំនួនចែករំលែក 0

ចន្លោះមិនឃើញ

នាយកគ្រប់គ្រងនៃក្រុមហ៊ុន Italian-Thai Development ដែលជាក្រុមហ៊ុនសំណង់ធំបំផុតនៅក្នុងប្រទេសថៃ ត្រូវបានចាប់ខ្លួនបន្ទាប់ពីបរបាញ់សត្វព្រៃដែលទទួលបានការការពារ នៅក្នុងដែនជម្រកសត្វព្រៃ Thungyai Naresuan ក្នុងខេត្ត Kanchanaburi កាលពីព្រឹកថ្ងៃអាទិត្យ កន្លងទៅនេះ។

យោងតាមសេចក្ដីថ្លែងការណ៍ពីនាយកដ្ឋានអភិរក្សឧទ្យានជាតិ សត្វព្រៃ និងរុក្ខជាតិ បានឲ្យដឹងថា លោក Premchai Karnasuta និងមនុស្ស ៤ នាក់ទៀត ក្នុងនោះមានបុរស ៣ នាក់ និងស្ត្រីម្នាក់ បានបោះជំរំនៅក្នុងតំបន់ហាមឃាត់នៃទីជម្រកខាងលើ កាលពីយប់ថ្ងៃសៅរ៍។

ក្រុមមន្ត្រីបានឃើញពួកគេជាមួយនឹងគ្រោងឆ្អឹងខ្លារខិនខ្មៅមួយក្បាល ដែលត្រូវបានគេរលាត់ស្បែក , សត្វបក្សី Kalij Pheasant និង សត្វក្តាន់ Barking Deer ដែលសុទ្ធសឹងតែជាប្រភេទសត្វស្ថិតក្រោមការការពារនៅក្នុងប្រទេសថៃ។ ជាមួយគ្នានេះដែរ ក្រុមមន្រ្តីខាងលើក៏រឹបអូសបានកាំភ្លើងវែង រួមទាំងគ្រាប់កាំភ្លើងជាច្រើនគ្រឿងទៀតផងដែរ។

ជនសង្ស័យទាំង ៥ នាក់ ត្រូវបានគេចោទប្រកាន់ពីបទបរបាញ់សត្វដែលស្ថិតក្រោមការការពារ , បរបាញ់សត្វនៅក្នុងជម្រកសត្វព្រៃ , រក្សាទុកសាកសពសត្វដែលស្ថិតក្រោមការការពារ , នាំយកសម្ភារៈបរបាញ់ចូលក្នុងទីជម្រកសត្វព្រៃដោយគ្មានការអនុញ្ញាត និង ប្រមូលផលព្រៃឈើ។

មិនតែប៉ុណ្ណោះ យោងតាមការស៊ើបអង្កេតដែលមិនទាន់បានសម្រេចមួយ ពួកគេក៏អាចត្រូវចោទប្រកាន់នៅក្រោមច្បាប់កាំភ្លើងផងដែរ។

គួរបញ្ជាក់ឲ្យដឹងថា លោក Premchai អាយុ ៦៣ ឆ្នាំ គឺជាកូនប្រុសរបស់លោក Chaijudh Karnasuta សហស្ថាបនិកក្រុមហ៊ុនអភិវឌ្ឍន៍អ៊ីតាលី-ថៃ។ យោងតាមគេហទំព័រ Forbes លោក Premchai និង បងប្អូនឈ្មោះ Nijaporn បានជាប់ចំណាត់ថ្នាក់លេខ ៣៥ ជាអ្នកមានបំផុតនៅប្រទេសថៃ ក្នុងឆ្នាំ២០១៦៕