ប៉ូលិសស្ទាក់ចាំចាប់ខ្លាជិត ១ម៉ោង ទីបំផុតទទួលលទ្ធផលស្ទើរក្អួតឈាម

2018-02-07 02:33:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ប៉ូលិសប្រដាប់អាវុធ បានបើកប្រតិបត្តិការភ្លាមៗមួយ បន្ទាប់ពីទទួលបានការរាយការណ៍ពីកសិករម្នាក់ថា មានសត្វខ្លាមួយក្បាលនៅកសិដ្ឋានរបស់ខ្លួន។

បុរសជាកសិករម្នាក់ឈ្មោះ Bruce Grubb អាយុ ២៤ ឆ្នាំ បានទូរសព្ទទៅលេខ ៩៩៩ បន្ទាប់ពីប្រទះសត្វខ្លា ដ៏ធំមួយក្បាលកំពុងដេកក្នុងក្រោលគោ កាលពីល្ងាចថ្ងៃ អាទិត្យ។ ភ្លាមៗនោះ ប៉ូលិសបានបញ្ជូនក្រុមប្រតិកម្មរហ័សប្រដាប់ដោយអាវុធ និងរថយន្តមួយចំនួនទៅកសិដ្ឋានក្នុងភូមិ Hatton ប្រទេស ស្កុតឡែន ហើយព្រមទាំងបាន ទូរសព្ទទៅកាន់សួនសត្វក្នុងតំបន់ ដើម្បីបញ្ជាក់ថាតើមានសត្វខ្លាបានរួចចេញមកដែរឬទេ។

ផ្ទុយទៅវិញ ក្រោយពីរង់ចាំអស់រយៈពេល ៤៥ នាទី ទើបមន្ត្រីប៉ូលិសដឹងឃើញថា តាមពិតខ្លានោះ គឺជាតុក្កតាធំមួយប៉ុណ្ណោះ ហើយចាត់ទុកហេតុការណ៍នេះជាការទូរសព្ទបោកបញ្ឆោតប៉ូលិសដោយចេតនាទៀតផង។

ទោះជាយ៉ាងណាក៏ដោយ លោក Grubb ដែលជាម្ចាស់កសិដ្ឋាន មានការខ្មាសអៀនយ៉ាងខ្លាំង និងបាននិយាយថា "ខ្ញុំមានអារម្មណ៍ថា ភ្លីភ្លើខ្លាំងណាស់សម្រាប់ការទូរសព្ទទៅប៉ូលិស ប៉ុន្តែខ្ញុំគិតថាវាជាការសង្គ្រោះបន្ទាន់។ យើងកំពុងសើចអំពីហេតុការណ៍ដែលបានកើតឡើង ប៉ុន្តែវាពិតជាគួរឲ្យខ្លាចខ្លាំងណាស់នៅពេលនោះ"៕