កូនស្រីអកតញ្ញូលួចលុយឪពុកជាង ៤០ ម៉ឺនដុល្លារ ទៅធ្វើរឿងហួសចិត្តជាមួយមិត្តប្រុស

2018-02-06 23:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

បុរសជាឪពុកម្នាក់រស់នៅប្រទេសចិន បានព្យាយាមទាក់ទងទៅកូនស្រីដែលរស់នៅប្រទេស កាណាដា បន្ទាប់ពីនាង លួចលុយជាង ៣ លានយ័ន (៤៧៦ ៥៥០ ដុល្លារ) និងផ្ដាច់ការទាក់ទងទាំងអស់ពីខ្លួន។

ឪពុក និងកូនស្រីខាងលើ មានបញ្ហាក្នុងគ្រួសារចាប់តាំងពីនាងមានអាយុ ៧ ឆ្នាំ មកម្ល៉េះ នៅពេលដែលលោកលែងលះជាមួយប្រពន្ធ។ ដោយមានអារម្មណ៍ខុសឆ្គងជាមួយកូនស្រី លោកព្យាយាមឲ្យអ្វីគ្រប់យ៉ាងដែលនាងចង់បាន។ លោកបានសន្សំប្រាក់ជាង ៣ លានយ័ន សម្រាប់ថ្លៃសិក្សា និងរស់នៅប្រទេស កាណាដា តាមសំណើរបស់កូនស្រី ទៀតផង។

ប៉ុន្តែ រយៈពេលមួយសប្ដាហ៍ក្រោយពីនាងទៅដល់ កាណាដា ឪពុកក៏ដឹងឃើញថា កូនស្រីបានលួចផ្ទេរលុយទាំងអស់ ទៅក្នុងគណនីរបស់នាង។ លើសពីនេះទៀត វាជារឿងដ៏រន្ធត់មួយ ដោយកូនស្រីមិនបានទុកលុយសម្រាប់ការសិក្សានោះទេ តែបែរជាចំណាយទៅសណ្ឋាគារផ្កាយប្រាំ , ភោជនីយដ្ឋានថ្លៃៗ និងរបស់ទំនើបៗជាមួយមិត្តប្រុសទៅវិញ។

ក្រោយពីដឹងរឿងទាំងនេះ ឪពុក បានព្យាយាមទាក់ទងទៅកូនស្រីជាច្រើនលើកច្រើនសារ និងគំរាមថា បើនាងមិនត្រលប់មកវិញជាមួយលុយទាំងនោះទេ លោកនឹងបង្ហោះរឿងរ៉ាវទាំងអស់ទៅលើបណ្ដាញសង្គម Weibo។ ផ្ទុយទៅវិញ ជាលទ្ធផល កូនស្រីមិនត្រឹមតែមិនឆ្លើយតបប៉ុណ្ណោះទេ តែថែមទាំងផ្ដាច់ទំនាក់ទំនងទាំងអស់ពីឪពុកតែម្តង។

ការរៀបរាប់ទាំងអស់របស់ឪពុកខាងលើ ត្រូវបានអ្នកលេងបណ្ដាញសង្គមមានប្រតិកម្មផ្សេងៗគ្នា។ អ្នកខ្លះ សម្ដែងភាពតក់ស្លុតចំពោះទង្វើដ៏ចិត្តដាច់បំផុតរបស់កូនស្រី ចំណែកអ្នកខ្លះទៀតថា រឿងទាំងអស់នេះ គឺជាកំហុសរបស់ឪពុកទាំងស្រុង៕