ពីរនាក់បានហើយ! ៦ កន្លែង ល្អបំផុត បើចង់ទៅក្រេបទឹកឃ្មុំនៅខ្មែរឲ្យរ៉ូមែនទិក

2018-02-09 05:14:21
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នករៀបការរួច បើមានលុយ ភាគច្រើនប្រាកដជាសម្លឹងមើលគោលដៅដើរលេងក្រេបទឹកឃ្មុំនៅក្រៅប្រទេសជាមិនខាន ព្រោះគេចង់សាករបស់ថ្មីៗ និងប្លែកភ្នែកនៅពិភពខាងក្រៅ។ ប៉ុន្តែ គោលដៅនៅស្រុកខ្មែរ ក៏មិនណយដែរ។ Sabay នឹងលើកយកទីតាំង Honeymoon ទាំង ៦ នៅស្រុកខ្មែរឲ្យស្គាល់នឹងគេវិញម្ដង៖

១. 4 Rivers Floating Lodge

4 Rivers Floating Lodge ជារមណីយដ្ឋានអណ្ដែតទឹកស្ថិតក្នុងធម្មជាតិមានព្រៃបៃតងហ៊ុមជុំជិត នៅ តាតៃ ខេត្តកោះកុង ហើយទទួលបានចំណាត់ថ្នាក់ Rating ៩,៩ ឯណោះ សម្រាប់ការស្នាក់នៅ ២ នាក់ពី Trip Advisor។

ក្រៅពីទេសភាពព្រៃភ្នំស្អាតៗ អមដោយទិដ្ឋភាពទឹកទន្លេ អ្នកអាចទៅលេងកន្លែងល្បីៗជាច្រើនដូចជា ទឹកធ្លាក់តាតៃ ស្ទូចត្រី ឬចែវទូកលេង ជិះទូកមើលថ្ងៃលិច កោះអណ្ដែត ដើរព្រៃ ភ្នំតាគាវ និងកោះកុងក្នុង ដែលអាចអ្នកមើលព្រៃកោងកាង និងជីវភាពរស់នៅរបស់សហគមន៍អ្នកនេសាទ។

កញ្ចប់ទេសចរណ៍ទាំងនេះ មានរៀបចំមួយកំផ្លេដោយ 4 Rivers Floating Lodge។ ចំពោះតម្លៃស្នាក់នៅវិញចាប់ពី ២០០ ដុល្លារ ឡើងទៅក្នុងមួយយប់។

២. កោះសង្សារ

គ្រាន់តែលើឈ្មោះកោះឯកជនស្ថិតក្នុងទឹកដីក្រុងព្រះសីហនុមួយនេះភ្លាម ជឿជាក់ថា ភាគច្រើនប្រាកដជាស្គាល់ដោយមិនបាច់រៀបរាប់ច្រើន។ ទាំងទេសភាព ទាំងសេវាកម្ម ទាំងបរិយាកាសផងនោះ ស័ក្ដិសមសម្រាប់ដំណើរកម្សាន្តក្រេបទឹកឃ្មុំរបស់អ្នក ហើយអ្នកខ្លះក៏បានហៅកន្លែងនេះថាជា Maldives ខ្មែរផងដែរ។

ចំពោះតម្លៃវិញ គឺសម្រាប់អ្នកមានលុយតែម្ដង ដោយមួយយប់ដល់ទៅជាង ១ ពាន់ដុល្លារ ឯណោះ។

៣. The Royal Sands

Resort ស្ថិតនៅលើកោះរ៉ុងមួយនេះ ទើបតែបើកបានមិនយូរប៉ុន្មានទេ តែក៏មិនណយដែរ ទាំងការរៀបចំទូទៅ ម្ហូបអាហារ ទេសភាពជាដើម មិនចាញ់កោះសង្សារណាស់ណាទេ ហើយបន្ទប់វិញមានច្រើនប្រភេទ បន្ទប់ខ្លះមានអាងទឹកដាច់ដោយឡែក ព្រមទាំងអាចមើលទេសភាពមាត់សមុទ្រពេលក្រោកពីដំណេកបានយ៉ាងងាយផងដែរ។

នៅទីនោះ អ្នកអាចមុជទឹកមើលផ្កាថ្ម ស្ទូចត្រី ជិះទូកកៃយ៉ាក់ ជិះទូកក្ដោងបើចង់ ជិះម៉ូតូឡើងភ្នំ ជាដើម។ ចំពោះតម្លៃស្នាក់នៅវិញចាប់ពី ២៥០ ដុល្លារ ក្នុងមួយយប់។

៤. Park Hyatt Resort

ខេត្តសៀមរាប កំពុងក្លាយជាទិសដៅពេញនិយមសម្រាប់អ្នករៀបការរួចទៅដើរលេង និងក្រេបទឹកឃ្មុំនៅទីនោះ ព្រោះមានកន្លែងជាច្រើនដែលរៀបរាប់ស្ទើរមិនអស់។

បើអ្នកប្រាកដជាទៅក្រេបទឹកឃ្មុំនៅខេត្តសៀមរាប មែននោះ អ្នកមិនគួររំលង Park Hyatt Resort មួយនេះឡើយ ព្រោះ Park Hyatt ជាកន្លែងស្នាក់នៅបែប High Class មួយដែលក្រៅពីការរៀបចំបន្ទប់ដ៏ស្រស់ស្អាត ក៏មានបន្ទប់ហ៊ុមព័ទ្ធដោយសួនច្បារ និងអាងហែលទឹកដាច់ដោយឡែកលក្ខណៈឯកជនផងដែរ។

សម្រាប់តម្លៃស្នាក់នៅវិញចាប់ពី ២០០ ដុល្លារ ឡើងទៅក្នុងមួយយប់។

៥. ថ្ងៃបាំងឆត្រ

វីឡានៅ Resort មួយនេះ សង់តាំងទសវត្សរ៍ឆ្នាំ ១៩៥០ មកម្ល៉េះ ពោលគឺជំនាន់បារាំង។ បន្ទប់សរុបមាន ១៨ បន្ទប់ ដេគ័រដោយប្រើវត្ថុបុរាណក្នុងស្រុក និងរបស់ធ្វើពីដៃ។

Resort លក្ខណៈឯកជនមួយនេះ ស័ក្ដិសមសម្រាប់គូស្នេហ៍មកក្រេបទឹកឃ្មុំ ខណៈដែលការ រៀបចំតុបតែង និងសេវាកម្មកន្លែងនេះល្អ ដល់ថ្នាក់មានអ្នកខ្លះហ៊ានចំណាយរៀបការនៅទីនោះទៀតផង។

ក្រៅពីបន្ទប់អាចមើលផ្ទៃសមុទ្របាន អាងហែលទឹក ញ៉ាំអាហារតែ ២ នាក់នៅលើស្ពានឈើលើសមុទ្រ និងទេសភាពស្អាតៗជាច្រើនក្នុង Resort ខេត្តកែបមួយនេះ ថ្ងៃបាំងឆត្រ ក៏មានជាកញ្ចប់សេវាកម្មសម្រាប់ក្រេបទឹកឃ្មុំផងដែរ ដោយមានតម្លៃចាប់ពី ៥០០ ដុល្លារ ឡើងទៅ។

៦. Mayura Hill Hotel & Resort

ដែលស្គាល់អារម្មណ៍ក្រោកពីគេងឡើង បើកភ្នែកឃើញទេសភាពវាលភ្នំពណ៌ខៀវស្រងាត់ដែរអត់? អារម្មណ៍ហ្នឹង ស្រស់ថ្លា មានកម្លាំងពេញតែម្ដង។

ទាំងនេះ មាននៅ Mayura Hill Hotel & Resort ខេត្តមណ្ឌលគិរី! Resort មួយនេះ មានបន្ទប់រៀបចំសម្រាប់ក្រេបទឹកឃ្មុំដាច់ៗដោយឡែកលក្ខណៈឯកជនពេញទំហឹង អាងហែលទឹកនៅលើភ្នំ អាហារឆ្ងាញ់ៗ និងកញ្ចប់សេវាកម្មនាំដើរលេងក្នុងខេត្តភាគឦសាននេះ ដូចជា ទឹកជ្រោះប៊ូស្រា ជិះខ្សែរ៉តនៅទឹកជ្រោះ ទៅមើលដំរី និងទៅលេងភូមិជនជាតិ ជាដើម។

សម្រាប់ការស្នាក់នៅវិញ តម្លៃចាប់ពី ១០៨ ដុល្លារ ឡើងទៅក្នុងមួយយប់៕