“Winchester” មកដឹងពីហេតុការណ៍ពិតនៃផ្ទះខ្មោចសង់ (វីដេអូវិភាគ)

2018-02-12 08:15:00
ចំនួនមតិ 0 | ចំនួនចែករំលែក 0

ចន្លោះមិនឃើញ

“Winchester” គឺជាភាពយន្តបែបរន្ធត់ លងបន្លាចនិងអាថ៌កំបាំង ដែលជាស្នាដៃរបស់បងប្អូនត្រកូល Spierig លោក Michael Spierig និង Peter Spierig ឬ "The Spierig Brothers” ដែលជាអ្នកពីក្រោយភាពយន្តល្បីៗជាច្រើនដូចជា "Jigsaw”, “Day Breaker” និង "Pedestrian” ជាដើម។

ភាពយន្តនេះនិយាយអំពីភូមិគ្រឹះមួយមានទីតាំងនៅ San Jose រដ្ឋកាលីហ្វ័រញ៉ា សហរដ្ឋអាមេរិកមានឈ្មោះថា The Winchester Mansion ជាកម្មសិទ្ធិរបស់របស់ស្រ្ដីមេម៉ាយម្នាក់ឈ្មោះ Sarah Winchester ដែលបន្តមរតកពីស្វាមីដែលស្លាប់លោក William Wirt Winchester។ ភូមិគ្រឹះនេះចាប់ផ្ដើមសាងសង់តាំងពីឆ្នាំ ១៨៨៤ មកម្ល៉េះប៉ុន្តែ នៅក្នុងសាច់រឿងដែលលើកយកនិយាយគឺជាបណ្ដាហេតុការណ៍ កើតឡើងអំឡុងឆ្នាំ ១៩០៨។

តួអង្គសំខាន់ៗ គឺមានដូចជា អ្នកស្រី Hellen Mirren សម្ដែងជាតួ Sarah Winchester លោក Jason Clarke សម្ដែងជាតួអង្គ Dr. Eric Price, Sarah Snooke ជាតួ Marion និងក្មេងប្រុស Finn Scicluna-O'Prey សម្ដែងជាតួ Henry Marriott។ សាច់រឿងផ្ដោតសំខាន់ទៅលើ អ្នកស្រី Winchester ដែលនាងបានអះអាងថា តែងតែជួបជាមួយព្រលឹងជាច្រើន ដែលស្លាប់ទៅដោយសារតែអាវុធផលិតចេញដោយគ្រួសារ Winchester ហើយព្យាយាមមករកនាង ដើម្បីឲ្យសាងសង់បន្ទប់ផ្សេងៗនៅក្នុងភូមិគ្រឹះនេះ ដើម្បីអាចឲ្យព្រលឹងទាំងនោះរកកន្លែងស្ងប់សុខបាន។

ដូច្នេះទើបលោកវេជ្ជបណ្ឌិត Eric Price ត្រូវបានគេជួលឲ្យទៅស្នាក់នៅ ភូមិគ្រឹះ Winchester ដើម្បីតាមដានសកម្មភាពរបស់អ្នកស្រី Sarah Winchester ថាតើនាងមានបញ្ហាសតិឫអត់? ក្រោយពេលលោកបានទៅដល់ ពេលនោះទើបលោកបានដឹងខ្លួនថា កំពុងស្នាក់នៅទីកន្លែងដ៏ចម្លែកមួយ។ គ្រាន់តែមកដល់ភ្លាមៗ Eric ជួបប្រទះនឹងរឿងហេតុចម្លែកៗជាច្រើន ដែលធ្វើឲ្យលោកនិងអ្នកទស្សនាភ័យចង់លស់ព្រលឹងគ្រប់ៗគ្នា។

ប៉ុន្តែភ្លាមៗនោះ Eric គិតថាខ្លួនគ្រាន់តែមានអារម្មណ៍រវើរវាយតែខ្លួនឯង ព្រោះតែការប្រើប្រាស់ថ្នាំរំងាប់អារម្មណ៍អស់រយៈពេលជាយូរមកហើយ។ ដោយមិនមានការភ័យខ្លាច ដុកទ័រម្នាក់នេះក៏ខិតខំប្រឹងប្រែងស្វែងរកអាថ៌កំបាំងផ្សេងៗនៅក្នុងភូមិគ្រឹះនេះ ហើយក៏បានជួបជាមួយរឿងមិនគួរឲ្យនឹកស្មានដល់ជាច្រើន។ ទីបំផុតលោកនិងអ្នកស្រី Winchester ក៏ត្រូវប្រឈមមុខនឹងបញ្ហាមួយ ដែលទាក់ទងទៅហ្នឹងគ្រួសារភូមិគ្រឹះនេះទាំងមូល ព្រមទាំងគ្រួសាររបស់លោកដុកទ័រ Eric ផងដែរ។

ចំពោះមូលន័យក្នុងភាពយន្តនេះវិញ គេបានលើកយកពីបញ្ហាគ្រួសារ ការស្រលាញ់ការលះបង់ និងគំនុំសកសឹក ដែលធ្វើឲ្យមានការចងគំនុំគុំកួនទៅបីជាលាចាកលោកទៅហើយក្ដី។ ការសម្ដែងរបស់អ្នកស្រី Hellen Mirren គឺពិតជាល្អនិងបញ្ចូលអារម្មណ៍ ធ្វើឲ្យអ្នកទស្សនាពេញចិត្តនាងគ្រប់គ្នា នេះមិនមែនជារឿងចម្លែកទេ ដោយសារតារាជើងចាស់រូបនេះធ្លាប់លើកពានអូស្ការពីមុនរួចមកហើយ។ ចំណែកឯការសម្ដែងរបស់លោក Jason Clarke ក៏មិនអន់ប៉ុន្មានដែរ ធ្វើឲ្យភាពយន្តនេះជាភាពយន្តមួយដែលអ្នកមិនគួររំលង។

ទោះបីជាយ៉ាងណាក៏ដោយ រឿងនេះក៏មានចំណុចខ្វះខាតខ្លះៗផងដែរ តួយ៉ាងសាច់រឿងនៅមានកម្រិតនៅឡើយ បើប្រៀបធៀបទៅនឹងរឿងហេតុពិត ដែលបានដកស្រង់ចេញមក។ តួអង្គ Eric គឺមានលក្ខណៈមិនច្បាស់លាស់ និងសមាជិកគ្រួសារពីររូបទៀតគឺ Marian និង Henry Marriott ហាក់ដូចជាមិនមានអ្វីគួរឲ្យកត់សម្គាល់ពីក្នុងសាច់រឿងទាល់តែសោះ។ ចំពោះឯឈុតឆាកបន្លាចវិញ គឺមានលក្ខណៈដដែលៗ មិនសូវខុសពីភាពយន្តដទៃទៀត ដែលអាចឲ្យអ្នកភ្លេចពីឈុតឆាកទាំងនោះងាយស្រួល ដោយមិនមានអ្វីគួរឲ្យកតចំណាំឬអស្ចារ្យ។

សរុបសេចក្ដីមក "Winchester” ជាភាពយន្តរន្ធត់ដែលមាន ស្ថានភាពដកស្រង់ចេញពីហេតុការណ៍ដែលគួរឲ្យចាប់អារម្មណ៍ ព្រមទាំងមានការរចនាឈុតឆាកសម្ដែងបានយ៉ាងល្អប្រណិត។ ប្រសិនជាចង់ដឹងកាន់តែច្បាស់ លោកអ្នកអាចទៅទស្សនាបាននៅគ្រប់រោងកុននៅទីក្រុងភ្នំពេញ៕

នេះជាវីដេអូវិភាគ៖

អានអត្ថបទ៖

អត្ថបទ៖ ធារ៉ូ