ជប៉ុន គ្រោងសាងសង់អគារឈើខ្ពស់បំផុតក្នុងពិភពលោក ក្រោមហេតុផលគួរឲ្យស្ញប់ស្ញែង

2018-02-14 04:14:32
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីពេលថ្មីៗនេះ ក្រុមហ៊ុនសាងសង់របស់ជប៉ុនមួយឈ្មោះ Sumitomo Forestry បានបង្ហាញគម្រោងសាងសង់អគារឈើខ្ពស់បំផុតក្នុងពិភពលោក ដែលមានឈ្មោះថា "គម្រោង W350”។

អគារឈើខ្ពស់បំផុតក្នុងគម្រោង W350 នេះនឹងត្រូវបញ្ចប់ការសាងសង់នៅឆ្នាំ ២០៤១ ហើយមានកម្ពស់រហូតដល់ ៣៥០ ម៉ែត្រ ដើម្បីគម្រប់ខួបលើកទី ៣៥០ របស់ក្រុមហ៊ុនដែលដំណើរការតាំងពីឆ្នាំ ១៦៩១។ លើសពីនេះទៀត ការសាងសង់ទាំងមូល នឹងត្រូវប្រើប្រាស់ឈើចំនួន ១៨៥ ០០០ ម៉ែត្រគូប។ គម្រោងប្រកបដោយភាពច្នៃប្រឌិតនេះ ធ្វើឡើងក្នុងគោលបំណងជំនួសការប្រើប្រាស់បេតុង និងជួយកាត់បន្ថយកម្រិតកាបូនឌីអុកស៊ីតដែលបំផ្លាញបរិយាកាស។

យោងតាមក្រុមហ៊ុនខាងលើ ឲ្យដឹងថាពួកគេនឹងចាប់ដៃជាមួយក្រុមហ៊ុនស្ថាបត្យកម្ម Nikken Sekkei ដើម្បីផលិតឈើរឹងមាំដូចដែក (wooden steel hybrid) ដើម្បីសាងសង់អគារ។ ចំណែកឯរចនាសម្ព័ន្ធនៃអគារ នឹងត្រូវរចនាជាពិសេសដើម្បីទប់ទល់ខ្យល់បោកបក់ខ្លាំង និងគ្រោះរញ្ជួយដីទៀតផង។

នៅពេលការសាងសង់បញ្ចប់ អគារឈើនេះ នឹងមានកម្ពស់រហូតដល់ ៧០ជាន់ជាមួយនឹងហាងទំនិញ, ការិយាល័យ, សណ្ឋាគារ និងលំនៅឋាន។ ជាមួយគ្នាផងដែរ ការសាងសង់ទាំងមូល ត្រូវបានប្រមាណថានឹងត្រូវចំណាយទឹកប្រាក់ ៦០០ លានយេន (ជាង ៥,៥ ពាន់លានដុល្លារ) ដើម្បីឲ្យក្លាយជាអគារឈើខ្ពស់បំផុតក្នុងពិភពលោក៕