សួង ស៊ីធឿន ពីសម្ដែងមិនយកលុយ១រៀល មកជាតួមានតម្លៃខ្លួនខ្ពស់មិនគួរជឿ

2018-02-14 09:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង និងជាអតីត Freshie កញ្ញា សួង ស៊ីធឿន បង្ហាញក្ដីសប្បាយរីករាយជាខ្លាំង បន្ទាប់ពីឃើញទីផ្សារសិល្បៈរបស់ខ្លួន ហាក់រីកចម្រើនខ្លាំងត្រឹមរយៈពេលជាងមួយឆ្នាំប៉ុណ្ណោះ។ មិនត្រឹមតែសប្បាយរីករាយនឹងទីផ្សារកំពុងត្រូវប៉ាន់ តារាវ័យក្មេងរូបនេះ ថែមទាំងមានតម្លៃខ្លួនខ្ពស់មិនគួរឱ្យជឿថែមទៀត។

កញ្ញា សួង ស៊ីធឿន និយាយថា ប្រមាណជាជិតមួយឆ្នាំមុន កញ្ញាសុំត្រឹមតែថតអាចលេចវត្តមានតាមកញ្ចក់ទូរទស្សន៍ ឬក្នុងភាពយន្តណាមួយប៉ុណ្ណោះ មិនប្រាថ្នាប្រាក់កម្រៃនោះទេ។ តែយ៉ាងណា អាចថាជាឱកាស ឬសំណាងក៏ថាបាន ដែលនាងអាចក្លាយជាតួឯកក្នុងរឿង ”សសរកន្លោង” របស់ផលិតកម្ម ឥន្ទ្រានិម្មិត មានភាពល្បីល្បាញនាពេលកន្លងទៅ ហើយបានប្រែក្លាយតារាសម្ដែងរូបនេះឱ្យមានទីផ្សារល្អមួយរំពេចន។

អតីត Freshie រូបនេះ បញ្ជាក់ថាក្រោយបញ្ចប់រឿង”សសរកន្លោងរួច” មានបណ្ដាផលិតកម្ម និងក្រុមហ៊ុនជាច្រើនទាក់ទងថតស្ប៉ត និងសម្ដែងភាពយន្តនានា។ ក្នុងនោះកញ្ញាអះអាងថា តម្លៃខ្លួនរបស់នាងបានប្រែក្លាយពី សូន្យឡើងដល់ ៣ពាន់ដុល្លារនាពេលបច្ចុប្បន្ន។ កញ្ញា សួង ស៊ីធឿន ពិតជានឹកស្មានមិនដល់ ដោយត្រឹមរយៈពេលជាង ១ឆ្នាំប៉ុណ្ណោះ អាចប្រែក្លាយទីផ្សារ និងតម្លៃខ្លួនដល់កម្រិតនេះ។

កញ្ញា សួង ស៊ីធឿន ក្នុងថ្ងៃសម្ពោធរឿង «សសរកន្លោង»

យ៉ាងណាក៏ដោយ តារាសម្ដែងវ័យក្មេងរូបនេះ នៅតែទទួលស្គាល់ថា ការសម្ដែងរបស់ខ្លួននៅមានកម្រិតនៅឡើយ ដោយត្រូវការពេលវេលាច្រើនថែមទៀត ដើម្បីពង្រឹងសមត្ថភាពឱ្យកាន់តែប្រសើរ។ កញ្ញាបានតាំងចិត្តថាប្រឹងប្រែងសម្ដែង មិនឱ្យអ្នកគាំទ្រខកបំណងនោះទេ ចំពោះភាពយន្តក្រោយៗទៀត។

បច្ចុប្បន្នកញ្ញា សួង ស៊ីធឿន កំពុងមមាញឹកថតខារ៉ាអូខេ ភាពយន្ត និងស្ប៉តឱ្យក្រុមហ៊ុនមួយ បន្ទាប់ពីកេរ្តិ៍ឈ្មោះត្រូវទស្សនិកជនទទួលស្គាល់។ តារាសម្ដែងរូបនេះ គឺជាអតីត Freshie ជំនាន់ទី១៥ ដែលទើបបោះជំហានចូលសិល្បៈ បានជាង ១ឆ្នាំប៉ុណ្ណោះ។ ការប្រឡងជា Freshie កញ្ញាជាប់ត្រឹម Top 10 ដោយមិនទទួលបានចំណាត់ថ្នាក់អ្វីឡើយ៕

អត្ថបទ៖ ដេត ធន្នី