ផលិតករវ័យក្មេងបញ្ចេញស្នាដៃលើកដំបូងចាយទុនជិត១០ម៉ឺនដុល្លារ

2018-02-15 02:55:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ផលិតកម្ម ស៊ីស្ដា បានសម្ពោធខ្សែភាពយន្តខ្នាតធំរបស់ខ្លួន "ប៊ីអាយជី និងខ្មោចយក្សធំ" លើកដំបូង កាលពីល្ងាចមិញនៅរោងភាពយន្ត Prime Cineplex ផ្សារទំនើបសុវណ្ណា ។ រឿងថ្មីមួយនេះចំណាយដើមទុនក្នុងការផលិតជិត១០ម៉ឺនដុល្លារអាមេរិក។

ឈី រដ្ឋា ចាងហ្វាងផលិតកម្មវ័យក្មេង

ឈី រដ្ឋា ចាងហ្វាងផលិតកម្ម ស៊ីស្ដា បានឲ្យដឹងថា រឿង"ប៊ីអាយជី និងខ្មោចយក្សធំ" គឺជាស្នាដៃថ្មីទី១របស់ខ្លួន ដោយចាយទុនក្នុងការផលិតអស់ជាង ៨ ម៉ឺនដុល្លារអាមេរិក។ លោក សង្ឃឹមនិងជឿជាក់ថាភាពយន្តខ្នាតធំមួយនេះ នឹងទទួលបានការចាប់អារម្មណ៍ពីទស្សនិកជន នៅពេលដាក់បញ្ចាំង។

អ្វីដែលពិសេសក្នុងរឿង "ប៊ីអាយជី និងខ្មោចយក្សធំ" ក្រៅពីមានឈ្មោះជាចាងហ្វាងផលិតកម្ម និងអ្នកដឹកនាំសម្ដែងហើយនោះ លោក ឈី រដ្ឋា ក៏ជាតួអង្គសំខាន់នៅក្នុងរឿងផងដែរ។ លោកថា៖" និយាយទៅរឿងមួយនេះជាកម្លាំងញើសឈាមខ្ញុំទាំងអស់ បន្ទាប់ពីថតហើយគឺខ្ញុំជាអ្នកកាត់តវីដេអូ ម៉ាចប់គឺខ្ញុំម្នាក់ឯងទាំងអស់"។

ឈី រដ្ឋា និងម្ចាស់រោងភាពយន្ត Prime Cineplex

រឿង "ប៊ីអាយជី និងខ្មោចយក្សធំ" គឺជាខ្សែភាពយន្តខ្មោចភ័យរន្ធត់លងបន្លាច ជាមួយឈុតឆាកកំប្លែង ស្នេហាអូនបង និងបង្កប់ទៅដោយអត្ថន័យអប់រំជាច្រើន មានការចូលរួមសម្ដែងដោយលោក ឈី រដ្ឋា អ្នកនាង សុខ សោម៉ាវត្តី លោក BIG នាយ ក្រូច និងតារាសម្ដែងប្រុសស្រីផ្សេងទៀត។

រឿង "ប៊ីអាយជី និងខ្មោចយក្សធំ" នឹងដាក់បញ្ចាំងនៅគ្រប់រោងភាពយន្តទំនើបៗ នៅភ្នំពេញ និងខេត្តសៀមរាប ថ្ងៃទី ១៥ ខែ កុម្ភៈ ឆ្នាំ ២០១៨ នេះហើយ៕