កូនប្រុសមិត្តភ័ក្ដិជិតស្និទ្ធរបស់តួ Olaf ស្លាប់ក្នុងហេតុការណ៍បាញ់ប្រហារថ្មីៗនេះ

2018-02-16 07:10:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង Josh Gad ដែលយើងធ្លាប់ដឹងថា ជាអ្នកបញ្ចូលសំឡេងតួអង្គ Olaf ក្នុងរឿង "Frozen” និងដើរតួជាតួអង្គ Gaston ក្នុងរឿង "Beauty and the Beast” បានប្រើប្រាស់បណ្ដាញសង្គម Twitter ដើម្បីចូលរួមរំលែកទុក្ខដល់ក្មេងម្នាក់ត្រូវជាកូនប្រុសរបស់មិត្តជិតស្និទ្ធខ្លួន ដែលបានស្លាប់ក្នុងហេតុការណ៍បាញ់ប្រហារកាលពីថ្ងៃពុធ។

Josh បានសរសេរដូច្នេះថា៖ "យប់មិញ ខ្ញុំទទួលបានសារមួយខណៈពេលកំពុងគេង ថាកូនប្រុសរបស់មិត្តខ្ញុំម្នាក់ទើបតែបានស្លាប់ ដោយសាររបួសគ្រាប់កាំភ្លើង។ សេចក្ដីទុកសង្រេងនិងសោកស្ដាយចំពោះគ្រួសារនេះនឹងគ្រួសារផ្សេងៗទៀតដែលបានជួបរឿងនេះ គឺធំធេងខ្លាំងណាស់។ ខ្ញុំសោកស្ដាយណាស់ ដែលហេតុការណ៍នេះបានកើតឡើង ខ្ញុំសុំទោសដែលអ្នកដឹកនាំរបស់យើងគ្មានបានការ។ ខ្ញុំសោកស្ដាយណាស់ ព្រោះហេតុការណ៍ស្រដៀងគ្នានេះអាចនឹងកើតឡើងម្ដងទៀត។"

ហេតុការណ៍បាញ់ប្រហារនៅវិទ្យាល័យ Marjory Stoneman Douglas នៅទីក្រុង Parkland រដ្ឋ Florida បានធ្វើឲ្យមនុស្សបាត់បង់ជីវិត១៧នាក់កាលពីថ្ងៃពុធ។

គ្រាន់តែព័ត៌មាននេះបានផ្ទុះឡើង Josh ពិតជាខឹងសម្បារនិងពិបាកចិត្តជាខ្លាំង ហើយសុំទាមទារឲ្យមានច្បាប់កាន់តែតឹងតែងពីការប្រើប្រាស់អាវុធ។

ជនសង្ស័យឈ្មោះ Nikolas Cruz ត្រូវបានគេចាប់បាននឹងកំពុងតែឃុំខ្លួន៕