ស្ពាន៦កន្លែងវែងអន្លាយនៅកម្ពុជាឆ្លងប្រទេស សមុទ្រ បង្អួតសម្រស់មិនចាញ់គេឡើយ
- 2018-02-23 07:17:55
- ចំនួនមតិ 0 | ចំនួនចែករំលែក 0
ស្ពាន៦កន្លែងវែងអន្លាយនៅកម្ពុជាឆ្លងប្រទេស សមុទ្រ បង្អួតសម្រស់មិនចាញ់គេឡើយ
ចន្លោះមិនឃើញ
ប្រិយមិត្តដឹងទេថា ស្ពានដ៏វែងអន្លាយ លាតសន្ធឹង ឆ្លងខេត្ត ទន្លេ សមុទ្រ និងប្រទេសរបស់កម្ពុជាណាខ្លះមានសម្រស់ស្រស់ ដែលបានសាងសង់រួច និងស្ថិតនៅតំបន់ណាខ្លះ? ចំណាយប៉ុន្មាន? និងសាងសង់នៅពេលណា? សូមអានអត្ថបទខាងក្រោមនេះ និងចូលរួមចែករំលែកទាំងអស់គ្នា៖
១. ស្ពានអ្នកលឿង ឫស្ពានត្សឹបាសា
ស្ពានអ្នកលឿង ឫស្ពានត្សឹបាសា ស្ថិតនៅខេត្តព្រៃវែង ជាស្ពានដែលវែងបំផុតនៅកម្ពុជាទី១ មានប្រវែងសរុប ២២១៥ម៉ែត្រ និងដាក់សម្ពោធឲ្យប្រើប្រាស់កាលពីថ្ងៃទី០៦ ខែមេសា ឆ្នាំ២០១៥ កន្លងទៅ ដោយចំណាយអស់ទឹកប្រាក់សាងសង់អស់ប្រមាណ ១២៧លានដុល្លារជាជំនួយឥតសំណងរបស់រដ្ឋាភិបាលជប៉ុន និង១៩លានដុល្លាររបស់រដ្ឋាភិបាលកម្ពុជា។
២. ស្ពានកោះកុងឆ្លងទៅប្រទេសថៃ
ស្ពាននេះមានប្រវែងសរុបចំនួន១៩០០ម៉្រែត ជាច្រកសេដ្ឋកិច្ចយ៉ាងសំខាន់ក្នុងការជួយសម្រួលដល់ ការដឹកជញ្ជូនទំនិញទៅមករវាងប្រទេសទាំងពីរ ពិសេសជួយសម្រួលដល់បងប្អូនប្រជាពលរដ្ឋក្នុងខេត្តកោះកុង ពេលមានជំងឺ ឬជួបគ្រោះអាសន្នផ្សេងៗត្រូវបញ្ជូនទៅព្យាបាលនៅប្រទេសថៃជាបន្ទាន់។ កាលពីថ្មីៗនេះរដ្ឋាកម្ពុជាបានសម្រេចទិញយកស្ពានកោះកុងនេះ មកគ្រប់គ្រងវិញ ដោយប្រជាពលរដ្ឋមិនចាំបាច់បង់ប្រាក់ពេលឆ្លងកាត់ទៀតឡើយ។
៣. ស្ពានស្ទឹងត្រែងភ្ជាប់ទៅខេត្តព្រះវិហារ
ស្ពានឆ្លងកាត់ទន្លេមេគង្គពីខេត្តស្ទឹងត្រែងតភ្ជាប់ទៅស្រុកត្បែងមានជ័យ ខេត្តព្រះវិហារ មានប្រវែងជាង ១ ៧០០ ម៉ែត្រ ។ ការស្ថាបនាស្ពាននេះ ក៏មានការស្ថាបនាកំណាត់ផ្លូវលេខ ២១៤ ពីភូមិបាចុង សង្កាត់ព្រះបាទ ក្រុងស្ទឹងត្រែង ទៅស្រុកត្បែងមានជ័យ ខេត្តព្រះវិហារ មានប្រវែងជាង ១៤០គីឡូម៉ែត្រ។ គម្រោងស្ថាបនាស្ពានថ្នល់នេះ បានចំណាយថវិកាសរុបចំនួន ១១៦,៥ លានដុល្លារ ដែលជាប្រាក់កម្ចីឥណទានសម្បទានពីប្រទេសចិន រួមជាមួយថវិកាបដិភាគរបស់រដ្ឋាភិបាលកម្ពុជា។
៤.ស្ពានឆ្លងទន្លេសេកុង
ស្ពានឆ្លងកាត់ទន្លេសេកុងមានប្រវែង ១ ០៧៥ ម៉ែត្រ ស្ថាបនារយៈពេល ៤៤ ខែ ជាមួយនឹងការស្ថាបនាស្ពាននេះក៏មានការស្ថាបនាកំណាត់ផ្លូវលេខ ៧ ផងដែរ ដែលមានប្រវែង ១៩៦,៩ គីទ្បូម៉ែត្រ ។ ការស្ថាបនាស្ពាន និងផ្លូវនេះ រដ្ឋាភិបាលនៃសាធារណរដ្ឋប្រជាមានិតចិនបានផ្តល់ប្រាក់កម្ចីចំនួន៧០ លានដុល្លារ និងថវិកាបដិភាគរបស់រដ្ឋាភិបាលកម្ពុជាចំចំនួន ៤,៣ លានដុល្លារ ប្រើប្រាស់នៅខែមេសា ឆ្នាំ ២០០៨ ។
៥. ស្ពានកោះពស់
ស្ពានកោះពស់ ជាស្ពានឆ្លងសមុទ្រ មានប្រវែង ៩០០ម៉ែត្រ ទទឹង ១២ម៉ែត្រ និងកម្ពស់ ៣២ ម៉ែត្រកន្លះ ពីលើផ្ទៃទឹក ក្នុងខេត្តព្រះសីហនុ។ ស្ពាននេះ សាងសង់រយៈពេល ៣០ខែ ចាប់ពីដើមឆ្នាំ ២០០៨ និងសម្ពោធប្រើប្រាស់នៅខែកក្កដា ឆ្នាំ ២០១១ ដោយចំណាយទឹកប្រាក់ ចំនួន ៣០០លានអឺរ៉ូ។
៦.ស្ពានព្រែកតាមាក់
ស្ពានព្រែកតាមាក់មានបណ្ដោយប្រវែង ១ ០៦៦ ម៉ែត្រ ចំណាយថវិកាអស់ចំនួន ៤៣,៥ លានដុល្លារ ជាប្រាក់កម្ចីពីប្រទេសចិនជាង ៤២ លានដុល្លារ និងប្រាក់បដិភាគរបស់រដ្ឋាភិបាលកម្ពុជាប្រមាណ ២លាន ដុល្លារ ។ ស្ពាននេះសង់នៅខែមិថុនា ឆ្នាំ ២០០៧ ប្រើរយៈពេល ៥០ ខែ និងដាក់ឲ្យប្រើប្រាស់នៅខែមករា ឆ្នាំ ២០១១៕