ក្លឹបធំៗទាំង ៦នៅអង់គ្លេស មានតែមួយប៉ុណ្ណោះមិនទាន់ស្គាល់ពាក្យថាចាញ់នៅ ៥ប្រកួតចុងក្រោយ

2018-02-23 12:15:23
ចំនួនមតិ 0 | ចំនួនចែករំលែក 0

ចន្លោះមិនឃើញ

គិតត្រឹមប្រាំប្រកួតចុងក្រោយ ក្នុងចំណោមក្លឹបធំៗទាំង ៦ នៅអង់គ្លេស មានតែក្លឹបមាន់ខ្នាយមាស Totenham Hotspur មួយប៉ុណ្ណោះដែលមិនទាន់ស្គាល់ទេពាក្យថាចាញ់។

បើទោះជាបែបនេះក្ដី ក្នុង ៥ប្រកួតចុងក្រោយ Spurs (DWWDD) យកឈ្នះបានតែ ពីរប្រកួតប៉ុណ្ណោះ ពោលគឺយកឈ្នះ ២-០ លើ Newport Countyក្នុងកម្មវិធី FA Cup និងលើ Arsenal ក្នុងលទ្ធផល ១-០ ក្នុងក្របខ័ណ្ឌ Premier League។ ក្រៅពីហ្នឹង គឺស្មើទាំងអស់។ អ្វីដែលគួរឲ្យចាប់អារម្មណ៍នោះ គឺក្លឹបសុទ្ធតែបានស្មើតែក្នុងលទ្ធផល ២ទល់នឹង ២ ពេលប៉ះ Liverpool (Premier League), Juventus (Champions League), និង Rochdale (FA Cup)។

ដោយឡែក ក្លឹបយក្សៗអង់គ្លេសទាំង ៥ទៀត សុទ្ធតែបានភ្លាត់ចាញ់ប្រកួត ក្នុង៥ប្រកួតចុងក្រោយ គ្រាន់តែខ្លះចាញ់តិច ឯខ្លះទៀតចាញ់ច្រើន។ ក្លឹប Manchester City (WDWWL) ចាញ់តែម្ដងគត់ (ការចាញ់ក្លឹប Wigan ធ្វើឲ្យក្លឹបធ្លាក់ពី FA Cup) ក្នុងការប្រកួតដែលខ្លួនលេង ៥ចុងក្រោយ ក្រៅពីហ្នឹងគឺឈ្នះទាំងអស់។

បើគិតក្នុងអំឡុងពេលដូចគ្នា ដូច Manchester City ដែរ Liverpool (LWDWW) ក៏ចាញ់តែ ម្ដងដែរ ក្នុងពេលដូចគ្នា ប៉ុន្តែក្លឹបហង្សក្រហមបានភ្លាត់ឲ្យស្មើមួយប្រកួត។

ចំណែកឯ Manchester United (LWLWD) និង Chelsea (LLWWD) វិញសុទ្ធតែបានចាញ់ ២ប្រកួតដូចគ្នា ខណៈកាំភ្លើង Arsenal (LWLWL) រាងដាបជាងគេឯង បន្តិច ដោយបានចាញ់ដល់ទៅ ៣ប្រកួត ក្នុង ៥ប្រកួតចុងក្រោយ។

នាចុងសប្ដាហ៍នេះ ក្នុងក្របខ័ណ្ឌ Premier League ក្លឹបSpurs នឹងត្រូវប៉ះជាមួយ Crystal Palace ខណៈ បិសាចក្រហមនឹងបើកទ្វារស្វាគមន៍តោខៀវ ចំណែកឯហង្សក្រហមវិញប្រកួតជាមួយ West Ham។

និយាយពី Arsenal វិញ ក្លឹបត្រូវប៉ះជាមួយយក្សផ្ទៃមេឃ Manchester City ក្នុងវគ្គផ្ដាច់ព្រ័ត្រ EFL Cup នៅថ្ងៃអាទិត្យ៕

ប្រភព៖ Sky Sports ប្រែសម្រួល៖ ហ៊ីម រស្មី