ពិតទេ នារីអ្នករាំលើកទឹកចិត្តកូរ៉េខាងជើង ជាទាសករផ្លូវភេទ លោក គីម ជុងអ៊ុន?

2018-02-27 02:55:59
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នករត់ចោលស្រុកចេញពីប្រទេសកូរ៉េខាងជើង បានអះអាងថា នារីជាអ្នករាំលើកទឹកចិត្តកូរ៉េខាងជើង ដែលបានធ្វើឲ្យអ្នកនិយមលេងអ៊ីនធឺណិតភ្ញាក់ផ្អើល និងចាប់អារម្មណ៍ខ្លាំង ដោយសារតែរូបសម្រស់ និង ការច្រៀងសាទរ នៅក្នុងព្រឹត្តិការណ៍កីឡាអូឡាំពិករដូវរងា ក្នុងទីក្រុង Pyeongchang គឺជាទាសករផ្លូវភេទនៅផ្ទះប៉ុណ្ណោះ។

ក្រុមនារីចំនួន ២២៩ នាក់នោះ ត្រូវបានគេលើកឡើងថាជា «ការវាយលុកមន្តអាគម» របស់កូរ៉េខាងជើង ដែលមានបំណងបំបាត់ការព្រួយបារម្ភរបស់សហគមន៍អន្តរជាតិ អំពីគម្រោងនុយក្លេអ៊ែររបស់ខ្លួន។ ទោះបីជាយ៉ាងណាក៏ដោយ អ្នករត់ចោលស្រុក បានបង្ហើបឲ្យដឹងថា ស្រីស្អាតទាំងនោះមានតួនាទីដ៏ក្រៀមក្រំនៅផ្ទះ ដោយពួកគេត្រូវបានបង្ខំឲ្យរួមភេទជាមួយជំនួយការកំពូល របស់មេដឹកនាំ គីម ជុងអ៊ុន។

នៅក្នុងបទសម្ភាសន៍ជាមួយគេហទំព័រ Bloomberg អ្នករត់ចោលស្រុកចំនួន ២ នាក់ បានរៀបរាប់ពីរឿងរ៉ាវដែលនារីទាំងនោះត្រូវគេបង្ខំឲ្យធ្វើជាទាសករ និង ផ្ដល់សេវាផ្លូវភេទ ដល់សមាជិកកិត្តិយសនៃគណបក្សនយោបាយកុម្មុយនិស្តរបស់លោក គីម ជុនអ៊ុន។

លោក Kim Hyung-soo អាយុ ៥៤ ឆ្នាំ ដែលបានរត់ចេញពីកូរ៉េខាងជើង មករស់នៅកូរ៉េខាងត្បូង ជាមួយកូនប្រុសជាអត្តពលិក ក្នុងឆ្នាំ ២០០៩ បាននិយាយថា «អត្តពលិក គឺជាទាសករកីឡារបស់ លោក គីម ជុងអ៊ុន។ សូម្បីតែគ្រូបង្វឹក និងអ្នករាំគាំទ្រ ក៏ជាទាសកររបស់ លោក គីម ជុងអ៊ុន ដែរ។ នៅក្នុងប្រទេសកូរ៉េខាងជើង លោក គីម ជុងអ៊ុន និង របបផ្ដាច់ការ គឺជាពិភពលោកទាំងមូល»។

អ្នករត់ចោលស្រុកម្នាក់ទៀតមានឈ្មោះថា Lee So-yeon អាយុ ៤២ ឆ្នាំ ជាអតីតតន្ត្រីករយោធាម្នាក់ ដែលបានភៀសខ្លួនកាលពីឆ្នាំ ២០០៨ បាននិយាយទៅកាន់ Bloomberg ថា «ក្រុមសិល្បៈកូរ៉េខាងជើង បានមកទីនេះ និងសម្ដែងរបាំ និងបទចម្រៀងជាច្រើន ហើយមើលពីខាងក្រៅវាហាក់បីដូចជាការបង្ហាញដ៏អស្ចារ្យ។»

Lee បានបន្ថែមឲ្យដឹងទៀតថា «ទោះជាយ៉ាងណា ពួកគេត្រូវទៅចូលរួមពិធីជប់លៀង និងផ្ដល់សេវាផ្លូវភេទ ដែលជារឿងដ៏គួរឲ្យឈឺចាប់មួយ។ ពួកគេចូលរួមក្នុងពិធីរបស់គណបក្ស និងត្រូវដេកជាមួយគេនៅទីនោះ ថ្វីបើពួកគេមិនចង់ធ្វើវាក៏ដោយ។ ការរំលោភសិទ្ធិមនុស្សទាំងនោះបានកើតឡើង ដោយពួកគេត្រូវធ្វើតាមអ្វីដែលគេប្រាប់»៕

ចុចអាន៖

ប្រភព៖ nextshark ប្រែសម្រួល៖ សេង ឡុង