ហេតុផលអ្វីខ្លះដែលអ្នកគាំទ្រមិនអាចរំងាប់ចិត្តនឹកចំពោះ G-Dragon បាន?

2018-02-27 04:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

អស់រយៈពេលមួយខែហើយក្រោយពេលការប្រគំតន្ត្រីចុងក្រោយ "BIGBANG's Last Dance” ហើយតារាចម្រៀង G-Dragon នឹងត្រូវឃ្លាតឆ្ងាយពីអ្នកគាំទ្ររបស់លោកមួយរយៈ ដោយនឹងត្រូវទៅបំពេញកាតព្វកិច្ចបម្រើជូនជាតិរបស់លោកនៅថ្ងៃនេះ។ ការចាកចេញរបស់លោកនេះ បានធ្វើឲ្យអ្នកគាំទ្រមានការនឹករឭកលោកជាខ្លាំង ទោះបីជាលោកទៅបម្រើកងទ័ពត្រឹមតែរយៈពេល ២ឆ្នាំក្ដី។

ហេតុផលអ្វីខ្លះបានជាអ្នកគាំទ្រមិនអាចបំភ្លេចលោកបាន?

១. រូបភាពជាច្រើនដែលលោកបានបង្ហោះ

ទោះបីជារូបភាពដែលតារាចម្រៀងរូបនេះបង្ហោះខ្លះ មានភាពស្មុគស្មាញ មើលមិនយល់ក៏ដោយ ប៉ុន្តែលោកនៅតែជាតារាមួយរូបដែលទទួលបានការតាមដានច្រើនជាងគេលើ Instagram។ រូបភាពដែលលោកបានបង្ហោះទាំងប៉ុន្មានតែងតែធ្វើឲ្យអ្នកតាមដានប្លែកអារម្មណ៍ ដោយសារតែវាមានភាពខុសប្លែកពីគ្នាពីមួយរូបទៅមួយរូបទៀត។

២. តារាមួយរូបដែលចេះដាក់ខ្លួន

ក្រៅពីមានរហស្សនាមជាស្ដេចតារាចម្រៀងកូរ៉េ លោកមិនដែលភ្លេចការគួរសមចំពោះគ្រប់គ្នានោះទេ មិនថាបុគ្គលិករបស់លោក រៀមច្បងអ្នករួមសិល្បៈ និងសូម្បីតែអ្នកគាំទ្រ។ G-Dragon ស្ថិតក្នុងចំណោមតារាដែលមានបុគ្គលិកលក្ខណៈល្អ គ្រប់គ្នាតែងសរសើរថាលោកជាតារាមួយរូបដែលតែងតែនិយាយគួរសមជាមួយអ្នកដទៃ។

៣. កំពូលតារាលេងម៉ូដ

មិនបាច់ប្រាប់ ក៏គ្រប់គ្នាបានដឹងមកហើយ ថាតារាចម្រៀងរូបនេះជាតារាម្នាក់ដែលចូលចិត្តលេងម៉ូដសម្លៀកបំពាក់ខុសប្លែកពីអ្នកដទៃ។ មិនត្រឹមតែសម្លៀកបំពាក់នោះទេ សូម្បីតែមួក ស្បែកជើង គ្រឿងអលង្ការ ក៏លោកលេងម៉ូដឲ្យប្លែកទាក់ទាញផងដែរ។

៤. ការប្រគំតន្ត្រីរបស់លោកតែងមានលក្ខណៈប្លែកខុសគេ

ឆាកប្រគំតន្ត្រីរបស់តារាចម្រៀងរូបនេះតែងតែតុបតែងឡើងខុសប្លែកដូចជានៅក្នុងភពមួយផ្សេងទៀត។ ឆាកប្រគំតន្ត្រីជាផ្នែកមួយដែលលោកតែងតែខ្វល់ខ្វាយដូចជាបទចម្រៀងដូច្នោះដែរ។

៥. ការស្រឡាញ់ចំពោះសត្វចិញ្ចឹមរបស់លោក

សត្វចិញ្ចឹមរបស់តារាចម្រៀងរូបនេះ មានភាពល្បីល្បាញមិនចាញ់លោកនោះទេ ដោយសារតែរូបភាពជាច្រើនដែលបានបង្ហោះលើ instagram នោះ មួយចំនួនជារូបលោកជាមួយសត្វចិញ្ចឹម។

៦. ស្នាមញញឹមដែលមិនអាចបំភ្លេចបាន

គ្រប់គ្នាពិតជាមិនសូវបានឃើញស្នាមញញឹមរបស់លោកនៅពេលសម្ដែងលើឆាកតន្ត្រីនោះទេ ប៉ុន្តែក្នុងវីដេអូបទចម្រៀង ឬក៏ក្នុងកម្មវិធីទូរទស្សន៍មួយចំនួនដែលបានបង្ហាញស្នាមញញឹមរបស់ G-Dragon គឺពិតជាមានភាពទាក់ទាញជាខ្លាំង ដែលគ្រប់គ្នាមិនអាចភ្លេចស្នាមញញឹមមួយនេះបាន។

៧. លោកចាត់ទុកមិត្តភ័ក្ដិដូចជាគ្រួសារ

តារាចម្រៀង G-Dragon ជាតារាមួយរូបដែលស្រឡាញ់មិត្តរបស់លោកខ្លាំងដូចជាក្រុមគ្រួសាររបស់លោកដូច្នោះដែរ។ ហេតុផលនេះហើយ ទើបមិត្តរួមការងារមិនអាចបំភ្លេចលោកបាន មិនមែនសូម្បីតែអ្នកគាំទ្រនោះទេ។

៨. ក្ដីស្រឡាញ់ពិតប្រាកដចំពោះអ្នកគាំទ្រ

ផ្ទុយពីការទទួលកាដូពីអ្នកគាំទ្រ តារាចម្រៀងរូបនេះបានទិញផ្កាជូនអ្នកគាំទ្ររបស់លោក នៅពេលដែលពួកគេបានជូនដំណើរលោកត្រឡប់ទៅវិញ។ លោកបានជូនផ្កាទៅអ្នកគាំទ្រម្នាក់មួយទងៗ។ ជាងនេះទៅទៀត លោកបានកាន់ដៃអ្នកគាំទ្រខណៈកំពុងតែច្រៀងចម្រៀងក្នុងអាល់ប៊ុម "Untitled,2014” របស់លោកថែមទៀតផង។ ការស្រឡាញ់បែបនេះហើយ ទើបអ្នកគាំទ្រមិនចង់ឲ្យលោកចាកចេញទៅ សូម្បីតែត្រឹមរយៈពេល ២ឆ្នាំនោះ៕

ចុចអាន៖

ប្រភព៖ Kdramabuzz ប្រែសម្រួល៖ អន សុភក្ត្រា