រឿងភាគទាំង១៥ពីបណ្ដាញទូរទស្សន៍ Netflix ដែលអ្នកមិនគួររំលង

2018-02-27 03:35:00
ចំនួនមតិ 0 | ចំនួនចែករំលែក 0

ចន្លោះមិនឃើញ

Netflix គឺជាក្រុមហ៊ុនផលិតភាពយន្ត និងដាក់ឲ្យទស្សនិកជនទស្សនាដោយបង់ថវិកាប្រចាំខែ។ គិតមកត្រឹមពេលនេះ Netflix មានទីតាំងទូទាំងពិភពលោក ក្នុងនោះក៏មានប្រទេសកម្ពុជាផងដែរ។ អ្នកអាចទស្សនាភាពយន្តជាច្រើនរាប់មិនអស់ ព្រមទាំងភាពយន្តថ្មីដែល ក្រុមហ៊ុននេះបញ្ចេញដើមទុនផលិតផ្ទាល់ខ្លួនតែម្ដង។ រឿងភាគជាច្រើនដែលផលិតចេញ ទទួលបានការគាំទ្រយ៉ាងច្រើនសន្ធឹកសន្ធាប់ពីសំណាក់អ្នកទស្សនាទូទាំងពិភពលោក។

នេះជាបណ្ដារឿងភាគទាំង២០ លើ Netflix អ្នកមិនគួររំលង៖

រឿងល្អបំផុតទាំង៥ បើយោងទៅតាមចំនួនអ្នកទស្សនាទូទៅ

១. “Black Mirror” ឆ្នាំ ២០១១ ដល់បច្ចុប្បន្ន

រឿងភាគនេះវិភាគពីបច្ចេកវិទ្យាថ្មីៗ ដែលអាចនឹងដាក់ឲ្យមនុស្សប្រើប្រាស់នៅថ្ងៃអនាគត និងផលវិបាកដែលអាចកើតឡើងដោយសារតែបច្ចេកវិទ្យាទាំងនោះ។

២. “House of Cards” ឆ្នាំ ២០១៣ ដល់បច្ចុប្បន្ន

ជារឿងភាគដែលផ្ដោតសំខាន់លើលោក Francis Underwood ជាមនុស្សដ៏មានឥទ្ធិពលម្នាក់ក្នុងសភា។ វាជារឿងភាគមួយដែលមិនត្រឹមតែឲ្យទស្សនិកជន គ្រាន់តែទស្សនាប៉ុណ្ណោះទេ ប៉ុន្តែត្រូវទស្សន៍ទាយនិងវិភាគនូវចំណុចជាច្រើនដែលលាក់កំបាំង។

៣. “Godless” ឆ្នាំ ២០១៧

បើសិនជាអ្នកចូលចិត្តរឿងភាគ និយាយអំពីការបាញ់ប្រហារនិងខោវប៊យ រឿងនេះគឺល្អបំផុត។ មិនត្រឹមតែប៉ុណ្ណោះ "Godless” ក៏បង្ហាញពីភាពខ្លាំងពូកែ និងស្មារតីនៃការប្រយុទ្ធរបស់នារីៗក្លាហានជាច្រើនរូបផងដែរ។

៤. “13 Reasons Why” ឆ្នាំ ២០១៧ ដល់បច្ចុប្បន្ន

ជារឿងភាគនិយាយអំពីតួអង្គម្នាក់ឈ្មោះ Hanna Bakerដែលបានធ្វើអត្តឃាតហើយបន្សល់នូវកាស្សែតចំនួន១៣ដុំ និយាយបរិយាយអំពីមនុស្ស និងរឿងរ៉ាវទាំងឡាយធ្វើឲ្យនាងសម្រេចចិត្តសម្លាប់ខ្លួនបែបនេះ។

៥. “Narcos” ឆ្នាំ ២០១៥ ដល់បច្ចុប្បន្ន

រឿងភាគនេះនិយាយពីលោក Pablo Escobar ជាមេកន្ទ្រាញជួញដូរគ្រឿងញៀនដ៏មានឥទ្ធិពលម្នាក់ សូម្បីតែរដ្ឋាភិបាលក៏មិនហ៊ាននឹងលោកដែរ។ លោកបានបង្កើតអាណាចក្រផ្ទាល់ខ្លួនមួយ និងលក់គ្រឿងញៀនទៅឲ្យសហរដ្ឋអាមេរិក។ ភាពយន្តនេះដកស្រង់ចេញពីហេតុការណ៍ទាំងស្រុងដែលបានកើតឡើង។

រឿងភាគទាំង៥ ដែលនារីៗនឹងចូលចិត្ត

៦. “Orange Is The New Black” ឆ្នាំ ២០១៣ ដល់បច្ចុប្បន្ន

រឿងភាគនេះផ្ដោតសំខាន់ទៅលើតួអង្គ Piper Chapman ដែលត្រូវជាប់គុក ដែលផ្ទុកតែអ្នកទោសស្រីប៉ុណ្ណោះ។ រឿងនេះបង្ហាញអំពីសេចក្ដីស្នេហា ការជម្នះឧបសគ្គផ្សេងៗ ដើម្បីឲ្យរស់រានមានជីវិត។

៧. “The Crown” ឆ្នាំ ២០១៦ ដល់បច្ចុប្បន្ន

“The Crown” បរិយាយអំពីជីវិតរបស់ម្ចាស់ក្សត្រី Elizabeth II និងរឿងរ៉ាវពីចក្រភពអង់គ្លេស។ រឿងភាគនេះមានបញ្ចូលគ្រប់សាច់រឿង តាំងពីពេលនាងរស់នៅតាំងពីក្មេងរហូតដល់សព្វថ្ងៃ។ រឿងភាគដែរទទួលបានពានមួយពីកម្មវិធី Golden Globe Awards ជារឿងភាគបែប Drama ល្អជាងគេ។

៨. “Unbreakable Kimmy Schmidt” ឆ្នាំ ២០១៥ ដល់បច្ចុប្បន្ន

រឿងភាគនេះនិយាយអំពីតួអង្គឯក Kimmy Schmidt ដែលបានចំណាយពេល១៥ឆ្នាំនៅក្នុងត្រង់សេ ក្រោមដីដោយសារមនុស្សបោកប្រាស់សាសនាម្នាក់។ បន្ទាប់ពីនាងត្រូវគេដោះលែង នាងបានផ្លាស់ទីលំនៅទៅទីក្រុង New York ដើម្បីស្វែងយល់ពីជីវិតថ្មីដែលនាងមិនធ្លាប់បានឆ្លងកាត់។

៩. “Master of None” ឆ្នាំ ២០១៥ ដល់បច្ចុប្បន្ន

ជារឿងភាគម្នាក់បង្ហាញពីតួអង្គ Dev ទាក់ទងនារីម្នាក់ដោយមើលទៅពួកគេដូចជាគ្មានអនាគតជាមួយគ្នានោះទេ។ ទោះបីជាយ៉ាងណាក៏ដោយ ក៏ Dev នៅតែអាចកែប្រែជីវិតខ្លួនឲ្យស្រស់បំព្រងទោះបីជាមានរឿងអ្វីកើតឡើងក៏ដោយ។

១០. “Love” ឆ្នាំ ២០១៦ ដល់បច្ចុប្បន្ន

តួអង្គឯក Mickey និង Gus មើលទៅមិនដូចជាមនុស្សល្អប៉ុន្មាននោះទេ ពួកគេសុទ្ធតែមានបញ្ហារៀងៗខ្លួន។ ដោយមានបញ្ហាដូចគ្នាយ៉ាងនេះ តើពួកគេរស់នៅជាមួយឲ្យចុះសម្រុងតាមរបៀបណាទៅ? “Love” គឺជារឿងភាគមួយដែលធ្វើឲ្យអ្នកជក់ចិត្តដកមិនរួចតាំងពីដើមដល់ចប់។

សម្រាប់អ្នកចូលចិត្តរឿងប្រឌិតបែបវិទ្យាសាស្ត្រផ្សេងៗ

១១. “Stranger Things” ឆ្នាំ ២០១៦ ដល់បច្ចុប្បន្ន

កើតឡើងនៅទសវត្សទី ៨០ មានក្មេងប្រុសម្នាក់ឈ្មោះ Will បានបាត់ខ្លួនដោយអាថ៌កំបាំង។ គ្រួសារនិងមិត្តភ័ក្ដិ Will បានខិតខំប្រឹងប្រែងរក គ្រប់ទីកន្លែង ក៏ប៉ុន្តែក្រោយមកពួកគេក៏ជួបជាមួយអភូតហេតុផ្សេងៗជាច្រើននឹកស្មានមិនដល់។

១២. “Sense8” ឆ្នាំ ២០១៥ – ២០១៨

រឿងភាគនេះបង្ហាញពីមនុស្ស៨នាក់ រស់នៅប្រទេសនិងទីក្រុងខុសគ្នាទូទាំងពិភពលោក និយាយភាសាខុសគ្នានិងមានវប្បធម៌ខុសគ្នា។ ប៉ុន្តែពួកគេទាំងអស់គឺអាចទាក់ទងគ្នាបាន ដោយអាចប្រើប្រាស់ភាសានិងជំនាញរបស់គ្នាទៅវិញទៅមក។ រឿងភាគនេះគឺពិតជាគួរចាប់អារម្មណ៍និងសម្បូរទៅដោយតួអង្គស្អាតៗនិងសិចស៊ីមកពីសឹងតែគ្រប់ជាតិសាសន៍។

១៣. “Jessica Jones” ឆ្នាំ ២០១៥ ដល់បច្ចុប្បន្ន

Jessica Jones មិនត្រឹមតែជាភ្នាក់ងារស៊ើបការណ៍ផ្ទាល់ខ្លួនប៉ុណ្ណោះទេ នាងមានកម្លាំងពិសេសដូចជា Superhero ម្នាក់ប៉ុន្តែសុខចិត្តរស់នៅជីវិតបែបសាមញ្ញ។ ប៉ុន្តែដោយសារតែអតីតកាលរបស់នាងតែងតែមកលងបន្លាចនាងជាញឹកញាប់ Jessica ត្រូវតែដោះស្រាយបញ្ហានេះជៀសមិនផុត។

១៤. “Daredevil” ឆ្នាំ ២០១៥ ដល់បច្ចុប្បន្ន

តួឯកសំខាន់រឿងនេះគឺ Matt Murdock ដែលបានពិការភ្នែកដោយសារគ្រោះថ្នាក់ជាយថាហេតុមួយ។ ប៉ុន្តែដោយសារតែហេតុការណ៍នោះ Matt ស្រាប់តែមានញាណពិសេស ហើយក៏ក្លាយខ្លួនជា Superhero ម្នាក់ដែលចេញកម្ចាត់ជនអាក្រក់ពេលយប់ និងជាមេធាវីម្នាក់នៅពេលថ្ងៃ។

១៥. “Luke Cage” ឆ្នាំ ២០១៦ ដល់បច្ចុប្បន្ន

បន្ទាប់ពីបរាជ័យពីការពិសោធន៍មួយ Luke Cage បានគេចពីគុកនិងស្វែងរកជីវិតខ្លួនឯងឡើងវិញ។ មិនខុសពី Daredevil និង Jessica Jones ប៉ុន្មានតួអង្គនេះក៏មានកម្លាំងពិសេសដូចគ្នាផងដែរ អ្វីដែលគួរឲ្យចាប់អារម្មណ៍បំផុតនោះ គឺពួកគេរស់នៅក្នុងពិភពជាមួយគ្នា ព្រមទាំងទាក់ទងគ្នានៅពេលខ្លះ៕

អានអត្ថបទ៖

ប្រភព៖ Brightside ប្រែសម្រួល៖ ធារ៉ូ