ណែនាំឲ្យស្គាល់កាមេរ៉ា GoPro ទាំង ៦ ប្រភេទ កុំឲ្យពិបាកពេលទៅរកទិញតាមហាង

2018-03-07 01:48:53
ចំនួនមតិ 0 | ចំនួនចែករំលែក 0

ចន្លោះមិនឃើញ

GoPro ជាប្រេនកាមេរ៉ាប្រភេទសកម្មភាព (Action) មានភាពល្បីល្បាញ ដែលអ្នកថតវីដេអូអាជីព ឬមិនអាជីព កំពុងលុងនឹងសមត្ថភាពរបស់វា។ ជាងនេះទៅទៀត សម្ភារៈពាក់ព័ន្ធសម្រាប់ដាក់ភ្ជាប់នឹងឧបករណ៍នានា បង្កលក្ខណៈ ឲ្យការបង្កើតប្លង់វីដេអូបែបច្នៃប្រឌិតកាន់តែមានភាពងាយស្រួល។

មកដល់ពេលនេះ GoPro មានកាមេរ៉ា ៣ ប្រភេទធំរួមមាន Fusion (៣៦០ ដឺក្រេ), Hero Black និង Hero Session។

១) GoPro Fusion

Fusion ជាកាមេរ៉ាអាចថតរូបបាន ៣៦០ ដឺក្រេ បន្សំពី Lens ១៨០ ដឺក្រេពីរគ្រាប់នៅសងខាងតួកាមេរ៉ា។ វាអាចថតវីដេអូមាន Resolution ៥.២K ល្បឿន ៣០ Frames ក្នុងមួយវិនាទី តែក៏អាចជ្រើសរើស Resolution ៣K ល្បឿន ៦០ Frames ក្នុងវិនាទីបានផងដែរ។ ចំណែកការថតរូបភាពធម្មតាទំហំ ១៨ Megapixels។

កាមេរ៉ានេះ អាចត្រាំទឹកជម្រៅ ៥ ម៉ែត្រ, មានថាមពលថ្ម ២ ៦២០mAh ដោយអាចថតបាន ៧០ នាទី មុនពេលត្រូវការសាក។

មុខងារចម្បងរបស់កាមេរ៉ាគឺ OverCapture ដែលអាចឲ្យអ្នកបង្កើតជាវីដេអូថ្មីកម្រិត ១០៨០p ពីក្នុងវីដេអូកម្រិត ៥.២K ត្រង់ផ្នែកណាមួយ។ ម្យ៉ាងទៀត អ្នកអាចពិនិត្យមើលទិដ្ឋភាពជាទម្រង់ ៣៦០, ផែនដីពីចម្ងាយ ឬផ្ទៃរាបបាន។

២) GoPro Hero6 Black

Hero6 Black អាចថតរូបធម្មតាប្រភេទ HDR (High Dynamic Range) និងវីដេអូមាន Resolution ៤K ល្បឿនដល់ទៅ ៦០ Frames ក្នុងមួយវិនាទី និងវីដេអូមាន Resolution 1080p ល្បឿនដល់ទៅ ២៤០ Frames ក្នុងមួយវិនាទី សម្រាប់វីដេអូយឺតៗ (Slow motion)។

កាមេរ៉ាមានបំពាក់ប្រព័ន្ធទប់លំនឹងកម្រិតខ្ពស់ ដើរតួនាទីដូចទៅនឹងឧបករណ៍ Gimbal 3-axis ដែលជួយកាត់បន្ថយការរង្គើដល់ប្លង់វីដេអូ។ វាក៏ជាកាមេរ៉ាដំបូង ដែលអាចថតក្នុងទម្រង់ HEVC (H.265) codec ផងដែរ។

កាមេរ៉ាផ្ដល់រូបភាពច្បាស់ល្អ នេះដោយសារ Chip ថ្មី GP1 ដែលជួយពង្រឹងសមត្ថភាពកាមេរ៉ា បានច្រើនបើប្រៀបនឹងម៉ូដែលមុនៗ។

កាមេរ៉ាអាចជ្រមុជទឹកជម្រៅ ១០ ម៉ែត្រ, មានថាមពលថ្ម ១២២០mAh។

មុខងារ QuikStories លើកាមេរ៉ាមានសមត្ថភាពវិភាគ, សម្គាល់មុខ, កំណត់សំឡេង ជួយជ្រើសរើសតំបន់សកម្មភាពកំពុងកើតឡើងបានល្អប្រសើរក្នុងវីដេអូ។

អ្នកអាចគ្រប់គ្រង Hero6 ដោយប្រើប៊ូតុង ឬ Touchscreen ឬប្រើសំឡេង ដើម្បីឲ្យកាមេរ៉ាអនុវត្តការងារថតរូប។

៣) GoPro Hero5 Black

បើអ្នកមិនខ្វល់នឹងរូបភាពប្រភេទ HDR (High Dynamic Range) ឬ ល្បឿនចាប់ Frame ខ្ពស់របស់វីដេអូ អ្នកអាចពិចារណា Hero5។

កាមេរ៉ាអាចថតរូបទំហំ ១២ Megapixels និងវីដេអូមាន Resolution 4K។ វាមានសម្ភារៈជាច្រើនសម្រាប់បំពាក់នឹងឧបករណ៍នានា ងាយស្រួលក្នុងការថត។

កាមេរ៉ាអាចជ្រមុជទឹកជម្រៅ ១០ ម៉ែត្រ, មានថាមពលថ្ម១២២០mAh។ កាមេរ៉ានេះមិនមានបំពាក់ Chip GP1 នោះទេ។ យ៉ាងណាមិញ អ្នកអាចកាត់តរូបលើទូរសព្ទតាមកម្មវិធី GoPro បានទាំងលើ iOS និង Android។

៤) GoPro Hero4 Black

Hero4 មិនមានបំពាក់ប្រព័ន្ធការពារជ្រាបទឹកលើតួកាមេរ៉ានោះទេ តែសមត្ថភាពផ្សេងៗក៏មិនអន់ដែរ។

កាមេរ៉ាអាចថតវីដេអូមាន Resolution ៤K ល្បឿន ៣០ Frames ក្នុងមួយវិនាទី, រូបភាពធម្មតាទំហំ ១២ Megapixels អាចថតជាប់ៗគ្នាបានល្បឿន ៣០ Frames ក្នុងមួយវិនាទី និង SuperView មាន Aspect ratio ពី ៤:៣ ទៅ ១៦:៩។

វាក៏មានមុខងារគួរឲ្យចាប់អារម្មណ៍ផ្សេងទៀត រួមមានប្លង់ទិដ្ឋភាពបង្ហាញជាលក្ខណៈ Ultra wide, Medium ឬ Narrow។ ហើយអាចប្រើ Wi-Fi, Bluetooth, អាចការពារជម្រាបទឹកដោយប្រអប់ ជម្រៅ ៤០ម៉ែត្រ, មេម៉ូរីកាតអាចប្រើបានដល់ ៦៤GB និងថាមពលថ្មមាន ១១៦០mAh។

មុខងារសំខាន់ផ្សេងៗរួមមាន Auto low-light mode, night mode, time lapse mode, អាចថតរូបភាព និងវីដេអូដំណាលគ្នាបាន, វីដេអូទៅមកដដែលៗ (Looping) និង បង្វិលរូបភាពស្វ័យប្រវត្តិ។ មួយវិញទៀត អ្នកក៏អាចភ្ជាប់ឧបករណ៍បំពងសំឡេងប្រើបានផងដែរ។

៥) GoPro Hero5 Session

Hero5 Session មានទំហំតូច តែអាចផលិតវីដេអូបានយ៉ាងល្អ។ វាអាចប្រើ QuikStories និងភ្ជាប់ជាមួយកម្មវិធី GoPro លើទូរសព្ទបាន។

កាមេរ៉ាអាចជ្រមុជទឹកជម្រៅ ១០ ម៉ែត្រ, អាចប្រើ Wi-Fi និង Bluetooth ព្រមទាំងអាចថតប្រើ Mode ទាំងនេះបានមាន Photo, Burst Mode, Night Photo, Video, Looping, Time Lapse Photo, Time Lapse Video និង Night Lapse Photo។

វីដេអូថតបាននឹងល្អ និងអាចកាត់បន្ថយសំឡេងរំខានពីខាងក្រៅបានល្អប្រសើរ។

កាមេរ៉ានេះក៏អាចបញ្ជាដោយសំឡេងបានផងដែរ។ ជារួម គ្រាន់តែតូច ធូរថ្លៃជាង និងអត់មាន Touchscreen បើប្រៀបនឹង Hero5 Black។

៦) GoPro Hero Session

Hero Session មានរូបរាង ទំហំ ដូចទៅនឹង Hero5 Session ដែរ គ្រាន់តែបាត់បង់មុខងារមួយចំនួន។

កាមេរ៉ាអាចថតវីដេអូមាន Resolution ១៤៤០p ល្បឿន ៣០ Frames ក្នុងមួយវិនាទី, ១0៨០p ល្បឿន ៦០ Frames ក្នុងមួយវិនាទី។ ចំណែករូបភាពធម្មតាមានទំហំ ៨Megapixels បើថតរូបជាប់ៗគ្នាចាប់បានល្បឿន ៣០ Frames ក្នុងមួយវិនាទី ព្រមទាំងមាន SuperView ផងដែរ គ្រាន់តែមានដែនកំណត់។

កាមេរ៉ាអាចបង្ហាញទិដ្ឋភាពប្រភេទ Ultra wide និង Medium, អាចប្រើ Wi-Fi និង Bluetooth, ជ្រមុជទឹកជម្រៅ ១០ ម៉ែត្រ, មេម៉ូរីប្រើបានដល់ទៅ ៦៤GB និងថាមពលថ្មមាន ១០០០mAh។ យ៉ាងណាមិញ កាមេរ៉ានេះមិនអាចប្រើឧបករណ៍បំពងសំឡេងភ្ជាប់ប្រើក្រៅបាននោះទេ តែក៏មានមុខងារល្អៗ ដទៃទៀតពាក់ព័ន្ធការថតផងដែរ។

ជារួម អ្នកអាចពិនិត្យមើលលំដាប់ថ្នាក់ជំនាន់ចាប់ពីខ្ពស់ទៅទាប ពាក់ព័ន្ធនឹងលក្ខណៈសម្បត្តិ និងតម្លៃ ដើម្បីឲ្យត្រូវនឹងអ្វីអ្នកចង់បាន៕