៦ឃ្លានេះប្រុសៗអន់ចិត្តបំផុត ពេលឮពីសង្សារ តែចេះតែទ្រាំៗទៅធ្វើម៉េចស្រលាញ់គេ

2018-03-07 03:00:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាសង្សារនឹងគ្នា គឺជាដំណាក់កាលដ៏ផ្អែមល្ហែម ក្នុងជីវិតគូ ទាមទារឲ្យមានការយល់ចិត្តគ្នាបំផុត ទើបអាចឈានដល់ដំណាក់កាលក្លាយជាប្ដីប្រពន្ធ។ ភាពរកាំរកូសអាចកើតមានមិនចេះចប់ ក្នុងដំណាក់កាលនេះ ជួនកាលកើតឡើងពីការអន់ចិត្ត នៃភាគីណាម្នាក់។ ខាងក្រោមនេះ គឺជាឃ្លាទាំង ៦ ដែលបុរសៗអន់ចិត្តខ្លាំងបំផុត ពេលឮពីសង្សាររបស់ខ្លួន៖

១. អូនឃើញសង្សារមិត្តភក្ដិអូនឡើងកាលីបជាងបងឯងទៀត៖ ពាក្យមួយឃ្លានេះនារីៗមិនគួរនិយាយ ទៅកាន់សង្សារឡើយ ព្រោះនេះជាការប្រៀបធៀបសង្សារខ្លួន ជាមួយអ្នកដទៃ។ ភាគីបុរសពេលឭមួយប្រយោគនេះហើយ គឺចុកឈាមបំផុត ហើយគិតថាខ្លួនឯងមិនមានអ្វីដូចគេ។

២. បងឯងមិនដែលធ្វើអីឲ្យអូន Surprise ដូចសង្សារគេសោះ៖ មួយឃ្លានេះ ក៏មិនគួរនិយាយដូចគ្នា ពេលខ្លះមនុស្សប្រុសមិនពូកែ Surprise មិនមែនមានន័យថាគេមិនស្រលាញ់សង្សារខ្លួនឡើយ តែបង្ហាញតាមរយៈការយកចិត្តទុកដាក់ ព្រួយបារម្ភ គ្រប់ពេលវេលាទៅវិញទេ។

៣. រវាងគ្រួសារបងឯង និងអូនបងឯងរើសមួយណា៖ មនុស្សស្រីមួយចំនួនឧស្សាហ៍និយាយបែបនេះ ក្នុងគោលបំណងចង់ដឹងថា សង្សារស្រលាញ់ខ្លួនខ្លាំងទេ ឬមួយក៏ពេលខ្លះខាងប្រុសចំណាយពេលនៅជាមួយគ្រួសារច្រើនជាងខ្លួន។ ប្រុសៗអន់ចិត្តខ្លាំងបំផុត ពេលឭពាក្យបែបនេះពីមនុស្សជាទីស្រលាញ់ ព្រោះនារីជាទីស្រលាញ់ហាក់មិនយល់ពីទំហំចិត្ត ដែលគេមានចំពោះនាងសោះ។

៤. បើស្រលាញ់ការងាររៀបការជាមួយការងារទៅ៖ ស្នេហាក៏សំខាន់ ចំណែកឯការងារក៏កាន់តែសំខាន់ ព្រោះបើគ្មានលុយ តើអាចស្វែងរកអនាគតជាមួយមនុស្សជាទីស្រលាញ់ដោយរបៀបណា? ដូចនេះបើខាងប្រុសរវល់ខ្លាំងជាមួយការងារ មិនសូវមានពេលជួបនារីៗមិនគួរនិយាយបញ្ឆេះបែបនេះឡើយ។ ផ្ទុយមកវិញត្រូវផ្ដល់កម្លាំងចិត្ត ទើបជារឿងដ៏ប្រសើរបំផុត។

៥. បងឯងអត់ពូកែរកលុយ៖ មួយប្រយោគនេះ ហាក់បន្តុះបង្អាប់សង្សារខ្លួនយ៉ាងខ្លាំង ថាជាមនុស្សគ្មានសមត្ថភាព មិនអាចរកលុយឲ្យច្រើនទិញសម្ភារៈនិយមដែលខ្លួនត្រូវការ។ មនុស្សប្រុសនឹកតូចចិត្តខ្លួនឯង បន្ទោសខ្លួនឯង ហើយពេលខ្លះគេសឹងតែចង់ចាកចេញពីនារីនោះទៀតផង។

៦. ចេះតែស្រលាញ់ទៅបើអស់ជម្រើសហើយ៖ ពេលខ្លះនារីៗគិតថា គ្រាន់តែនិយាយលេងជាមួយសង្សារខ្លួន តែមិនដឹងទេថា បេះដូងខាងប្រុសកំពុងខ្ទេចខ្ទាំជាបំណែកៗអស់ហើយ។ មានន័យថា មកពីគេគ្មានជម្រើសទើបគេមកស្រលាញ់ មិនមែនស្រលាញ់ដោយចេញពីបេះដូងឡើយ។

សូមបញ្ជាក់ថា ៦ឃ្លាខាងលើនេះ គឺ Sabay បានធ្វើបទសម្ភាសពីយុវជនមួយចំនួន ជុំវិញបញ្ហានេះ ហើយភាគច្រើនបំផុត បានលើកឡើងដូចរៀបរាប់ខាងលើនេះ៕

អត្ថបទ៖ វឌ្ឍនៈ