ពិសេសមែន! សូម្បីផលិតករភាពយន្តចិន ក៏ទាក់ចិត្តនឹងក្បាច់ល្បុក្កតោខ្មែរដ៏រស់រវើក
- 2018-03-09 05:31:18
- ចំនួនមតិ 0 | ចំនួនចែករំលែក 0
ពិសេសមែន! សូម្បីផលិតករភាពយន្តចិន ក៏ទាក់ចិត្តនឹងក្បាច់ល្បុក្កតោខ្មែរដ៏រស់រវើក
ចន្លោះមិនឃើញ
តារាសម្ដែងវាយតប់ឆ្នើមលោក អ៊ូ តារា លើកឡើងថា Agency ផលិតករភាពយន្តចិន បានចាប់អារម្មណ៍លើសមត្ថភាពសម្ដែងដ៏ទាក់ទាញរបស់ក្រុម តួវាយតប់ខ្មែរនៃក្រុម Cambodian Stunt Team ដែលប្រើប្រាស់ទម្រង់មូលដ្ឋានល្បុក្កតោ ដើម្បីសម្ដែងយ៉ាងរស់រវើក។
លោកថា Agency ភាពយន្តចិន បង្ហាញការទាក់ចិត្តនឹងទេពកោសល្យសម្ដែងរបស់តួខ្មែរ នៅពេលពួកគេឃើញការសម្ដែងសម របស់ក្រុម Cambodia Stunt Team ហ្វឹកហាត់សមត្រៀមថតភាពយន្តវាយតប់ថ្មី រឿង ដឹប្រេ The Prey។ លោកថាក្រុមតួខ្មែរ បានចំណាយពេលជិត៣សប្ដាហ៍ហើយ ក្នុងការហាត់សម្ដែង រួមជាមួយតួក្បាច់គុនលោក គូ សាង វី (Gu Shang Wei) ដែលជាជើងឯកប្រដាល់៥សម័យរបស់ចិន រួមនឹងតារាថៃផង ដែលត្រៀមថតក្នុងពេលឆាប់ៗ។
តារាសម្ដែង និងជាគ្រូល្បុក្កតោ រូបនេះបន្ថែមថា ក្រុមអ្នកផលិតភាពយន្តចិន ដែលមកឃើញការហាត់សមឈុតវាយគ្នា របស់ក្រុមតួខ្មែរ និងតួចិន គូ សាង វី Gu Shang Wei ក្នុងឈុតសមរឿង The Prey បង្ហាញចំណាប់អារម្មណ៍ថា ស្នៀតវាយតប់ក្បាច់ល្បុក្កតោរបស់តួខ្មែរ អាចជាទម្រង់ប្លែកថ្មីសម្រាប់វិស័យភាពយន្ត Action។
លោក អ៊ូ តារា ជាអ្នករួមក្រុមតួវាយតប់ខ្មែរ នៃក្រុម Cambodian Stunt Team នឹងចូលរួមសម្ដែងជាមួយតួចិន Gu Shang Wei និងតួវាយតប់ថៃមួយចំនួនទៀត ក្នុងភាពយន្ត Action ថ្មីរបស់ខ្មែរ រឿង The Prey។ ភាពយន្តនេះ ជារឿង Action ថ្មីមួយទៀតនៅកម្ពុជា ដែលមានកំណត់ត្រាចាយច្រើនជិត ១លានដុល្លារអាមេរិក ដឹកនាំដោយអ្នកដឹករឿង Jailbreak លោក Jimmy Hendeson៕