iPhone X Plus បើមានមុខងារទាំងនេះ ទាក់ចិត្តអ្នកប្រើមិនតិចទេ

2018-03-11 02:20:00
ចំនួនមតិ 0 | ចំនួនចែករំលែក 0

ចន្លោះមិនឃើញ

បើ Apple អនុវត្តតាមកាលវិភាគធម្មតា iPhone ជំនាន់ថ្មីនឹងប្រកាសចេញនៅដើមខែកញ្ញាឆ្នាំនេះ។ ខួប ១០ ឆ្នាំកាលពីឆ្នាំមុន Apple បានបង្ហាញវត្តមាន iPhone X, iPhone 8 និង 8 Plus។

ឆ្នាំ ២០១៨ Apple អាចនឹងប្រើ Face ID លើ iPhone ថ្មីទាំងអស់។ បើតាមលោក Ming Chi Kuo អ្នកវិភាគដ៏មានឥទ្ធិពល និងលោក Mark Gurman ពី Bloomberg អាចមានម៉ូដែលអេក្រង់ធំពីរ OLED ៦.៥ អ៊ីង និង LCD ៦.១ អ៊ីង ភ្ជាប់ជាមួយមុខងារ 3D Touch និងកាមេរ៉ាក្រោយពីរគ្រាប់ តែតម្លៃអាចទាបជាង iPhone X។

ម៉ូដែល iPhone X អាចនឹងឈប់ផលិត ផ្អែកលើព័ត៌មានលេចធ្លាយថា សម្រាប់អេក្រង់ OLED ៥.៨ អ៊ីង មានការធ្លាក់ចុះ។

Apple ប្រហែលជាប្រកាសចេញ iPhone ពីរ ឬ បីម៉ូដែល នៅខែកញ្ញានេះដាក់ឈ្មោះអ្វីនោះមិនសូវសំខាន់នោះទេ។ មុខងារលើទូរសព្ទម៉ូដែលទាំងនោះ ទើបជាធ្នាក់ទាក់ចិត្តអ្នកប្រើប្រាស់។

ឧបករណ៍ Virtual Reality(VR)

iOS 11 បានបន្ថែម ARKit របស់ Apple ទៅកាន់ iPhone 6S និងម៉ូដែលក្រោយៗ ហើយសន្ទុះកម្មវិធី Augmented Reality កើនឡើងគួរឲ្យកត់សម្គាល់ក្នុង App Store។

ព័ត៌មានក្រៅផ្លូវការថា ក្រុមហ៊ុនកំពុងធ្វើការលើឧបករណ៍ VR។ ដូច្នេះ អាចនឹងឃើញឧបករណ៍ សម្រាប់ដាក់ iPhone ស្រដៀងនឹង Gear VR របស់ Samsung។

មុខងារ Face ID លឿនជាងមុន

Face ID លើ iPhone X ដំណើរការបានល្អ តែមិនទាន់ប្រើបានរលូនដូច Touch ID នោះទេ។ Face ID ឆ្នាំនេះ អាចនឹងមានមុំធំ និងល្បឿនសម្គាល់លឿនជាងមុន។

រន្ធដោត USB Type-C

មានមនុស្សជាច្រើនអាចនឹងខកចិត្ត បើ Apple ប្ដូរពីរន្ធ Lightning ទៅប្រើ USB Type-C ដែលបានក្លាយជាស្តង់ដារសម្រាប់ទូរសព្ទដទៃ។

តែបើប្ដូរ មានន័យថា អ្នកប្រើប្រាស់ផលិតផល Apple អាចសាក iPhone ពី MacBooks ជំនាន់ថ្មី ដោយមិនតម្រូវ Adapter។ ហើយនឹងជួយដល់ការសាកថ្មទូរសព្ទ បានលឿនជាងមុនផងដែរ។

មានខ្សែសាកថ្មី

លើទំព័រ Apple បានពិពណ៌នាពី ល្បឿនសាករហ័ស ដោយថា ការសាកបានលឿន ផ្ដល់ភាពងាយស្រួល ក្នុងការសាកប្រើ iPhone X, iPhone 8 ឬ iPhone 8 Plus។

iPhone អាចសាកបានដល់ទៅ ៥០% ត្រឹម ៣០ នាទី ពេលអ្នកប្រើ Apple USB-C ភ្ជាប់ទៅកាន់រន្ធLightning។

iCloud Storage អាចមានទំហំធំជាងមុន

ទំហំ File រូបភាព និងវីដេអូ កាន់តែធំទៅៗលើជំនាន់ iPhone ថ្មីនីមួយៗ ដូច្នេះចង់មិនចង់ Apple អាចនឹងផ្ដល់ Storage ធំជាងមុន ក្នុងតម្លៃទាប ឬតម្លៃដដែល។

មុខងារ 3D Touch

មុខងារ 3D Touch បង្ហាញដំបូងជាមួយ iPhone 6S ហើយអាចនឹងមានលើ iPhone ថ្មីក្រោយៗទៀត ជាវិធីងាយស្រួលក្នុងការប្រើកម្មវិធី ឬ Settings មួយចំនួន។

Chip លឿនជាងមុន

Apple តែងតែបង្កើនសមត្ថភាព Graphic របស់ iPhone រាល់ពេលចេញជំនាន់ថ្មី។

Chip A11 Bionic មានលើ iPhone 8, 8 Plus និង iPhone X បំពាក់នូវបច្ចេកវិទ្យា 10 Nanometer process ផលិតដោយ ក្រុមហ៊ុនតៃវ៉ាន់ TSMC។

ព័ត៌មានលេចធ្លាយថា TSMC នឹងផលិត Chip A12 ថ្មី បំពាក់លើ iPhone ជំនាន់ក្រោយ ដែលបំពាក់នូវបច្ចេកវិទ្យា 7 Nanometer process ល្បឿនកាន់តែលឿនជាងមុន។

iPhone 8 មាន RAM 2GB ខណៈ iPhone 8 Plus និង iPhone X មាន RAM 3GB។ ហើយ iPhone ថ្មីអាចនឹងមាន RAM 4GB។ ក្រឡេកទៅមើល Galaxy S9 មាន RAM 4GB ហើយ S9 Plus មាន RAM ដល់ទៅ 6GB។

មានអេក្រង់ធំជាងមុន

បើតាមលោក Ming Chi Kuo អ្នកវិភាគដ៏មានឥទ្ធិពល Apple អាចនឹងចេញ iPhone ថ្មីមានអេក្រង់ធំជាង ៥.៨ អ៊ីង។ ម៉ូដែល iPhone X Plus អាចនឹងមានអេក្រង់ OLED ៦.៥ អ៊ីង និងអាចមានម៉ូដែលមួយទៀតមានអេក្រង់ LCD ៦.១ អ៊ីង។

អាចមាន Touch ID បង្កប់ក្រោមអេក្រង់

iPhone X ជា iPhone ដំបូងគ្មានប៊ូតុង Home ហើយក៏មិនមាន Touch ID មុខងារស្កេនក្រយៅដៃនោះដែរ។

Apple ដូចនឹង Samsung បានលើកឡើងថា នៅមានបញ្ហាច្រើនពេលដំណើរការមុខងារស្កេនក្រយៅដៃ ពីក្រោមអេក្រង់។

Apple ប្ដូរមកផ្ដោតលើមុខងារសម្គាល់មុខ ដើម្បីជំនួសភារកិច្ច Unlock ទូរសព្ទ។ យ៉ាងណាមិញ អាចនឹងមាន Touch ID បង្កប់ពីក្រោមអេក្រង់ ព្រោះទូរសព្ទ Vivo បានចេញមុខងារនេះបាត់ទៅហើយ។

ប្រើអេក្រង់ Shatterproof (រឹងមាំ)

អេក្រង់ iPhone X ងាយនឹងបែក ធ្លាក់ត្រឹមតែមួយដង ដោយតម្លៃដូរអេក្រង់ថ្មីថ្លៃគួរសមដែរ។

អ្នកប្រហែលជាចង់ឃើញ iPhone បំពាក់នូវអេក្រង់មាន Shatter-resistant ពិតប្រាកដដូចជា Motorola Z2 Force។

កាមេរ៉ាកាន់តែខ្លាំងជាងមុន

មានមនុស្សមិនតិចទេ សម្រេចចិត្តទិញ iPhone X ផ្អែកលើកត្តាតែពីរប៉ុណ្ណោះ រូបរាង និងកាមេរ៉ានេះឯង។

កាមេរ៉ា iPhone X ដំណើរការបានល្អទាំងមុខ និងក្រោយ។ យ៉ាងណាមិញ យើងចង់ឃើញ សមត្ថភាពរបស់វាលើស្ថានភាពងងឹត និងមុខងារពង្រីក កាន់តែល្អប្រសើរជាងមុន។

ថាមពលថ្មល្អជាងមុន

iPhone X បំពាក់ Chip Processor លឿន និងប្រើអេក្រង់ OLED តែការសាកល្បង ឃើញថា iPhone 8 Plus បែរជាប្រើបានយូរជាង (ថាមពលថ្ម)។

មុខងារនេះគ្មានថ្ងៃមាននោះទេ តែបើមានកាន់តែល្អ

iPhone មិនធ្លាប់មានផ្នែកខាងក្រោយអាចដោះបានងាយស្រួល ក្នុងការប្ដូរថ្ម ឬបន្ថែមមេម៉ូរីកាតនោះទេ។ តែគួរតែមាន ដើម្បីមានភាពងាយស្រួលពេល ថ្មជួបបញ្ហា ព្រោះមួយរយៈក្រោយមកនេះ iPhone ម៉ូដែលចាស់ៗមួយចំនួន ដំណើរការយឺត ក៏ដោយសារថ្មនេះឯង។

អាចមានវត្តមាន រន្ធកាស

មានមនុស្សមួយចំនួនមិនឡើងជំនាន់ iPhone ក៏ដោយសារ គ្មានរន្ធកាស Headphone jack នេះឯង។ ដូច្នេះរំពឹងថា iPhone បន្ទាប់ផ្ដល់រន្ធកាសធ្លាប់មានពីមុនមកវិញ ប៉ុន្តែប្រហែលជាត្រឹមក្ដីស្រមៃ៕