មកដឹងអត្ថន័យបង្កប់ទាំងស្រុងក្នុង MV ថ្មី "Delicate” របស់ Taylor Swift

2018-03-12 10:15:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ខណៈពេល Taylor Swift ឈ្នះពានរង្វាន់ដ៏ធំមួយគឺតារាចម្រៀងស្រីប្រចាំឆ្នាំនៅក្នុងកម្មវិធី iHeartRadio Music Awards នាងបានបញ្ចេញវីដេអូចម្រៀងសម្រាប់បទ "Delicate”។ ក៏ប៉ុន្តែតារារូបនេះមិនបានបង្ហាញខ្លួនដើម្បីទទួលពាននៅទីនោះទេ ដោយសារតែនាងតែងតែសម្ងំលាក់ខ្លួនពីសំណាក់មនុស្សខាងក្រៅអស់រយៈពេលជាច្រើនខែមកហើយ។

“Delicate” គឺជាវីដេអូចម្រៀងទី៤ នៅក្នុងអាល់ប៊ុម "Reputation” ហើយក៏ជាបទចម្រៀងដែលនិយាយអំពីនាងផ្ទាល់ខ្លួនតែម្ដង។ បទចម្រៀងនេះបកស្រាយអំពីពេលវេលាក៏ច្របូកច្របល់របស់នាងជាមួយនិងអ្នកកាសែតព្រមទាំងសេចក្ដីស្នេហា។ Taylor បានប្រកាសប្រាប់អ្នកគាំទ្រក្នុងកម្មវិធីមួយកាលពីឆ្នាំមុនថា បទចម្រៀង "Delicate” និយាយអំពីអារម្មណ៍នាងនៅពេលជួបមនុស្សម្នាក់ដែលខ្លួនពិតជាចង់ឲ្យចូលមកកាន់ជីវិតខ្លួន ប៉ុន្តែក្នុងចិត្តព្រួយបារម្ភពីអ្វីដែលអ្នកកាសែតធ្លាប់សរសេរពីនាង។ នេះដូចជាឃ្លាមួយនាងច្រៀងថា "My reputation's never been worsem so you must like me for me.” សំដៅលើភាពល្អក់កករអំពីរូបភាពនាងដែលអ្នកកាសែតតែងតែសរសេរ ហើយប្រសិនជាមានអ្នកណាស្រលាញ់ពេញចិត្តនាងនោះ ត្រូវស្រលាញ់នាងទាំងដែលមានព័ត៌មានអាក្រក់ពីនាងជាច្រើន។

នៅក្នុងវីដេអូក៏បង្ហាញពីនាងព្យាយាមគេចពីអ្នកកាសែតនិងអ្នកគាំទ្រជាច្រើន ហើយចង់មានពេលផ្ទាល់ខ្លួនខ្លះ ពោលគឺនាងបានលុបចោលនូវអ្វីៗទាំងអស់ដែលនាងធ្លាប់បង្ហោះលើបណ្ដាញសង្គមទាំងអស់ មុនបញ្ចេញអាល់ប៊ុមនិងមិនបានបង្ហាញខ្លួននៅក្នុងកម្មវិធីសម្ភាសន៍ល្បីៗ ដើម្បីផ្សព្វផ្សាយអាល់ប៊ុមថ្មីនោះទេ។

បន្ទាប់មក Taylor ក៏ធ្វើដំណើរកាត់អ្នកគាំទ្រជាច្រើន ព្រមទាំងមានអង្គរក្សតាមខ្លួនជាច្រើន ហើយពួកគេនឹងធ្វើតាមសកម្មភាពនាងគ្រប់យ៉ាង ដើម្បីធានាឲ្យនាងមានសុវត្ថិភាព។

ក្រោយមក នាងក៏ចូលក្នុងបន្ទប់មួយ ដោយមានកាន់ក្រដាស១សន្លឹក មើលទៅជាមានវេទមន្ត។ ពេលនោះហើយទើបនាងដឹងថាខ្លួនកំពុងតែបំបាំងកាយដោយមិនមានអ្នកណាម្នាក់មើលនាងឃើញឡើយ គឺប្រៀបដូចជាសុបិនក្លាយជាការពិតអីចឹង។

ដោយសារតែមនុស្សមិនអាចមើលនាងឃើញ Taylor បានបញ្ចេញក្បាច់រាំប្លែកៗជាច្រើនគួរឲ្យអស់សំណើច។ នេះប្រៀបដូចជាអ្វីដែលនាងកំពុងចង់បាននៅពេលនេះ គឺគេចពីមនុស្សគ្រប់គ្នា ដើម្បីចង់បានពេលវេលាផ្ទាល់ខ្លួនជាមួយសង្សារ Joe Alwyn។

រហូតដល់ចុងបញ្ចប់នៃវីដេអូ ទើបគេសង្កេតឃើញមនុស្សគ្រប់គ្នា សម្លឹងមើលនាងដោយសារនាងបានត្រលប់ជាលែងបំបាំងកាយ។

ដូច្នេះអត្ថន័យជារួមនៃវីដេអូចម្រៀងនេះ គឺ Taylor ចង់បញ្ជាក់ប្រាប់អ្នកគាំទ្រឲ្យច្បាស់ពីមូលហេតុ ដែលនាងអវត្តមានពីសំណាក់មនុស្សខាងក្រៅ និងព្យាយាមស្វែងរកពេលវេលាផ្ទាល់ខ្លួន ឲ្យកាន់តែច្រើន៕

អានអត្ថបទ៖

ប្រភព៖ Washingtonpost ប្រែសម្រួល៖ ធារ៉ូ