ដូនជីតវ៉ាក្ដីប្រឆាំង Katy Perry បានដួលស្លាប់ភ្លាមៗក្នុងតុលាការ

2018-03-11 04:17:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ដូនជីកាតូលិកអាយុ ៨៩ឆ្នាំម្នាក់ដែលគេស្គាល់ថាជាអ្នកតតាំងជម្លោះជាមួយតារាចម្រៀង Katy Perry រយៈពេលប៉ុន្មានឆ្នាំមកនេះ បានទទួលមរណភាពហើយ អំឡុងពេលចូលរួមក្នុងដំណើរការកាត់ក្ដីក្នុងតុលាការ។

លោកយាយ Catherine Rose Holzman ដូនជីម្នាក់ក្នុងចំណោម ដូនជី ២នាក់ ដែលជាដៃគូជម្លោះជាមួយតារាចម្រៀងអាមេរិក Katy Perry បានដួលស្លាប់ភ្លាមៗ កាលពីថ្ងៃសុក្រ ក្នុងពេលកំពុងជំនំជម្រះក្ដីក្នុងតុលាការ ទាក់ទងនឹងករណីតវ៉ាក្ដីជាមួយតារាស្រីរូបនេះ។

ដូនជី Rita និង Catherine

រឿងនេះ កើតឡើងចេញពីការមិនចុះសម្រុងគ្នា រវាង Katy និងដូនជីក្នុងការទិញលក់ វិហារសំណាក់ធម៌មួយកន្លែងរបស់ដូនជី។ ដោយសារដូនជី ២រូប ក្នុងនោះគឺលោកយាយ Catherine និង Rita Callanan ចង់លក់វិហារឲ្យទៅម្ចាស់ភោជនីយដ្ឋានម្នាក់មានឈ្មោះថា Dana Hollister ប៉ុន្តែស្របពេលជាមួយគ្នានោះម្ចាស់បទ "Roar” ក៏ចាប់អារម្មណ៍នឹងព្រះវិហារនោះដែរ។ ជាក់ស្ដែងបញ្ហារកាំរកូស ក៏បានចាប់ផ្ដើមឡើងដោយសារដូនជីទាំង ២មិនចង់លក់ឲ្យ Katy ទេ។

រឿងរ៉ាវនេះបានបន្តរហូតដល់បច្ចុប្បន្ន ប៉ុន្តែគួរឲ្យស្ដាយនៅថ្ងៃដែលតុលាការលើកយកករណីនេះមកជំនំជម្រះ លោកយាយ Catherine ក៏បានទទួលមរណភាពតែម្ដង ជាហេតុធ្វើឲ្យគ្រប់គ្នា មានការស្លុតចិត្តជាខ្លាំង។ ទោះជាយ៉ាងណា ករណីនេះក៏នៅតែបន្តតាមដាន និងដោះស្រាយដើម្បីរកខុសត្រូវ និងឈានទៅរកផ្លូវបញ្ចប់៕

ចុចអាន៖

ប្រភព៖ Metro ប្រែសម្រួល៖ យី សុធារី