នរណាស័ក្ដិសមជំនួស ទិត្យ ឌីណា និង ពលរដ្ឋ បើមិនមែន ធារី និងគ្មាន គួច សុកុម្ភៈ?

2018-03-15 07:37:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមជម្រើសជាតិកម្ពុជា នឹងត្រូវប្រកួតជាមួយក្រុមជម្រើសជាតិ អាហ្វហ្គានីស្ថាន នាការប្រកួតចុងក្រោយក្នុងព្រឹត្តិការណ៍ AFC Sian Cup 2019 នៅទឹកដីរបស់អាហ្វហ្គានីស្ថានថ្ងៃទី២៧ ខែមីនា ឆ្នាំ២០១៨។ ទាក់ទងការប្រកួតដោយគ្មានតារាឆ្នើម ទិត្យ ឌីណា និងច្រឹង ពលរដ្ឋ តើកីឡាកររូបណាស័ក្តិសមជំនួសបំផុត?

លោក ប្រាក់ សុវណ្ណារ៉ា

ទាក់ទងការជ្រើសរើសរបស់លោកប្រាក់ សុវណ្ណារ៉ា គ្រូបង្វឹកជម្រើសជាតិត្រូវបានគេមើលឃើញថា គ្មានខ្សែបម្រើកណ្ដាល ទិត្យ ឌីណា របស់ក្រុមប៉ូលិស ស្របពេល ច្រឹង ពលរដ្ឋ ក៏ត្រូវទទួលការព្យាបាលរបួសមិនអាចចូលរួមជាមួយជម្រើសជាតិបាន ជាមួយគ្នានោះក៏គ្មានវត្តិមាន គួច សុកុម្ភៈ ដែរ។ ចំណុចនេះត្រូវបានអតីតគ្រូបង្វឹកបឹងកេតរូបនេះបញ្ជាក់ថា លោកមើលឃើញខ្សែបម្រើកំពុងឡើងជើងពីររូបអាចជំនួសតំណែង ទិត្យ ឌីណា បានយ៉ាងល្អគឺ សុខ ហៀង និង ម៉ាត់ នូរុណ។

ចំណែកអ្នកដែលលោកគិតថា អាចជំនួសតួនាទីរបស់ ច្រឹង ពលរដ្ឋ គឺ អ៊ន ចាន់ប៉ូលីន។ ជុំវិញការជ្រើសរើសកីឡាករចូលជម្រើសជាតិលើកនេះលោក ប្រាក់ សុវណ្ណារ៉ា បានបន្ថែមថា លោករើសយកកីឡាករល្អបំផុតចំនួន ១១ នាក់ដែលអាចបានលេងលើទីលាន និង ៣ នាក់សម្រាប់ទុកបម្រុង។ ចំពោះកីឡាករផ្សេងៗ លោករើសចូលក្នុងន័យផ្ដល់ឱកាសឲ្យក្មេងៗបានជាប់ជម្រើសជាតិប៉ុណ្ណោះ។

មុនការប្រកួតតទល់ជាមួយអាហ្វហ្គានីស្ថាន កម្ពុជាត្រូវប្រកួតជាមួយឡាវ ក្នុងការប្រកួតមិត្តភាពនៅទឹកដីឡាវ នាថ្ងៃទី២១ ខែមីនា ឆ្នាំ២០១៨ ៕