ងឿងឆ្ងល់គ្រប់គ្នាក្រោយឃើញ ដូណាល់ ត្រាំ យកបន្លែមួយក្តាប់ដាក់ជាប់ហោប៉ៅអាវ

2018-03-19 02:12:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានាធិបតីអាមេរិក លោក ដូណាល់ ត្រាំ បានធ្វើរឿងប្លែកៗ និងចម្រូងចម្រាសជាច្រើន ក្នុងអំឡុងពេលកាន់តំណែងរបស់ខ្លួន។

កាលពីថ្ងៃសុក្រសប្ដាហ៍មុននេះ អ្នកនិយមប្រើប្រាស់អ៊ីនធឺណិតមានការភ្ញាក់ផ្អើល និងងឿងឆ្ងល់យ៉ាងខ្លាំង នៅពេលឃើញប្រធានាធិបតីទី ៤៥ រូបនេះ បង្ហាញខ្លួននៅក្នុងសេតវិមានជាមួយរុក្ខជាតិបៃតងមួយក្ដាប់ ទំនងដូចជាបន្លែ នៅក្នុងហោប៉ៅអាវរបស់លោក។

ផ្ទុយទៅវិញ វាមិនដូចជាអ្វីដែលពួកគេគិតឡើយ។

បើយោងតាមប្រភពព័ត៌មាន បានឲ្យដឹងថា វាគឺជារុក្ខជាតិម្យ៉ាង មានឈ្មោះថា Shamrock ដោយលោក ត្រាំ បានដាក់វានៅក្នុងហោប៉ៅ ដើម្បីគោរពចំពោះការមកដល់សេតវិមានរបស់នាយករដ្ឋមន្ត្រីអៀរឡង់ លោក Leo Varadker។

នៅក្នុងអំឡុងកិច្ចប្រជុំ មេដឹកនាំទាំង ២ រូបបានសរសើរគ្នាទៅវិញទៅមក ដោយលោក ត្រាំ លើកឡើងថា លោក Varadker «បានធ្វើការងារយ៉ាងល្អ»។ ជាមួយគ្នានេះដែរ លោក ត្រាំ ក៏បានសម្ដែងការចាប់អារម្មណ៍ ចំពោះទស្សនកិច្ចទៅកាន់ប្រទេសអៀរឡង់ នាពេលអនាគតដែរ។

គួររំលឹកឲ្យដឹងថា អតីតប្រធានាធិបតីអាមេរិក លោក បារ៉ាក់ អូបាម៉ា ក៏ធ្លាប់បានយករុក្ខជាតិ Shamrock មកដាក់ក្នុងហោប៉ៅបែបនេះដែរ នៅពេលជួបជាមួយនាយករដ្ឋមន្ត្រីអៀរឡង់ លោក Enda Kenny កាលពីឆ្នាំ ២០១៣៕