ប្រាក់ សុវណ្ណារ៉ា ប្រាប់កីឡាករជម្រើសជាតិទាំងអស់ត្រូវស្វែងយល់ចំណុចនេះ

2018-03-19 04:02:16
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ប្រាក់ សុវណ្ណារ៉ា គ្រូបង្វឹកក្រុមជម្រើសជាតិកម្ពុជាទម្លាយថា ក្រុមជម្រើសជាតិកម្ពុជាទាំងអស់ត្រូវស្វែងយល់ និងធ្វើយ៉ាងណាសម្របខ្លួនឲ្យបានក្នុងការតទល់ជាមួយ អាហ្វហ្គានីស្ថាន នៅលើទឹកដីប្រទេសតាជីគីស្ថាន ដែលមានសីតុណ្ហភាពជាង ១០ C' ។

គ្រូបង្វឹករូបនេះបានឲ្យដឹងថា នៅទឹកដីខាងលើមានអាកាសធាតុត្រជាក់ស្ងួត វាខុសស្រលះពីទឹកដីកម្ពុជានាពេលបច្ចុប្បន្ន។ ដូច្នេះវាជាកង្វល់មួយដែលកីឡាករទាំងអស់ត្រូវតែព្យាយាមសម្រប ដើម្បីរក្សាកម្លាំងក៏ដូចជាសមត្ថភាពរបស់ខ្លួន ដើម្បីត្រៀមការប្រកួត។

ទោះជាមានការព្រួយបារម្ភចំណុចនេះក្ដីលោកមើលឃើញថា សមត្ថភាពកីឡាករកម្ពុជានៅពេលនេះមានការរីកចំរើន ពិសេសកីឡាករទាំង ៤ រូបដែលបានផ្លាស់ទៅលេងនៅម៉ាឡេស៊ីសុទ្ធតែបានលេងក្នុងជម្រើស ១១ នាក់ដំបូង។ លោកមិនទាន់ហ៊ានសន្និដ្ឋានថា ការជួបអាហ្វហ្គានីស្ថានលើកនេះទទួលបានលទ្ធផលល្អដូចកាលជួបលើកទី១ ដែលលេងនៅទឹកដីកម្ពុជាឬយ៉ាងណានោះទេ។

កម្ពុជាបានយកឈ្នះ អាហ្វហ្គានីស្ថាន ១-០ កាលនៅទឹកដីកម្ពុជាម្ដងហើយ។ សម្រាប់ជំនួបមិត្តភាពក្រុមជម្រើសជាតិកម្ពុជា នឹងហោះទៅទឹកដីឡាវ ម៉ោង ៣:០០ នាទីរសៀលនេះ ដើម្បីត្រៀមការប្រកួតមិត្តភាពជាមួយក្រុមនេះ នាថ្ងៃទី២១ ខែមីនា ឆ្នាំ២០១៨។ រួចបន្តដំណើរទៅប្រកួតផ្លូវការជាមួយអាហ្វហ្គានីស្ថាននៅលើទឹកដីប្រទេសតាជីគីស្ថានថ្ងៃទី២៧ ខែមីនា ឆ្នាំ២០១៨ នៃព្រឹត្តិការណ៍ AFC Asian Cup 2019 វគ្គជម្រុះក្នុងពូល C៕