គួរឲ្យស្ដាយ តារាចម្រៀង Rock and Roll ខ្មែរម្នាក់ គ្រោះថ្នាក់ចរាចរណ៍ស្លាប់យប់មិញ

2018-03-20 04:28:18
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងរ៉ុកខេនរ៉ូល អ្នកនាង តាក់ ចន្ធី បានបាត់បង់ជីវិតគួរឲ្យសោកស្ដាយ ក្នុងគ្រោះថ្នាក់ចរាចរណ៍មួយកាលពីរំលងអាធ្រាត្រឈានចូលថ្ងៃទី២០ ពីយប់មិញ។ នេះបើតាមទំព័រ "សិល្បករកម្ពុជា" របស់លោក អ៊ឹម ជីវ៉ា។

តាមព័ត៌មានពីប្រភពដដែល ដំបូងឡើយតារាចម្រៀងខ្មែរអ្នកនាង តាក់ ចន្ធី បានធ្វើដំណើតាមម៉ូតូកង់បី pass app មកដល់ស្តុបទន្លេបាសាក់ ផ្លូវម៉ៅសេទុង សង្កាត់ទួលទំពូង១ ខណ្ឌចំការមន រាជធានីភ្នំពេញ ក៏មានរថយន្តម៉ាក ព្រុសមួយគ្រឿងជិះឡើងលឿនមកបុកម៉ូតូកង់បីដែលមានអ្នកនាង តាក់ ចន្ធី ជិះលើនោះ បណ្តាលអ្នកនាង មានគ្រោះថ្នាក់ធ្ងន់រហូតដល់ស្លាប់។

អ្នកនាង តាក់ ចន្ធី គឺជាតារាចម្រៀងរ៉ុកឃែនរ៉ូលពេញនិយមម្នាក់ ក្នុងនោះបើទោះបី ក្នុងស្រុក មិនសូវមានអ្នកស្គាល់ច្រើន ប៉ុន្តែអ្នកនាងមានការពេញនិយមខ្លាំងនៅបរទេស ពិសេសប្រទេសបារាំង ដែលអ្នកនាងទទួលបានការគាំទ្រយ៉ាងច្រើនពីសំណាក់ភ្ញៀវអន្តរជាតិ ហើយនោះ ជាហេតុដែលអ្នកនាងជារឿយៗ ត្រូវបានទទួលការអញ្ជើញទៅចេញច្រៀងនៅក្រៅប្រទេសជាញឹកញាប់។

តាមលោក អ៊ឹម ជីវ៉ា ដដែល អ្នកនាង តាក់ ចន្ធី គឺជាតារាមួយរូបដែលមានជីវភាពក្រីក្រតស៊ូក្នុងជីវិតលំបាកបំផុត។ អ្នកនាង រស់នៅក្នុងផ្ទះជួលមួយកន្លែង និងមាននាទីជាម្ដាយ ជាមេគ្រួសាររ៉ាប់រងបន្ទុកដែលមានគ្នារហូតដល់៨អ្នកទាំងស្រុង។

រូបភាព៖ទំព័រសិល្បករកម្ពុជារបស់លោក អ៊ឹម ជីវ៉ា

សពអ្នកនាង តាក់ ចន្ធី ត្រូវបានក្រុមគ្រួសារដឹកទៅកាន់ស្រុកកំពង់ត្របែកខេត្តព្រៃវែង ដើម្បីធ្វើបុណ្យទៅតាមប្រពៃណី។

អ្នកនាង តាក់ ចន្ធី ធ្លាប់បានបង្ហាញវត្តមានក្នុងការប្រគំតន្ត្រីមួយនៅក្នុងស្រុក ក្នុងពិធីជប់លៀងក្រុមការងារផលិតរឿង "Befor the Fall” របស់ផលិតកម្ម Rock កាលពីឆ្នាំ ២០១៥។ គ្រានោះ អ្នកនាង បានបង្ហើរសំនៀងដ៏ក្រអួន ក្នុងបទចម្រៀងរបស់ខ្មែរ ធ្វើឲ្យជនជាតិបរទេសរាំលេងយ៉ាងសប្បាយ។

ទស្សនាវីដេអូខាងក្រោម អំពីការសម្ដែងរបស់អ្នកនាង តាក់ ចន្ធី កាលនៅរស់...!